Read Ntcham Exode 29 Bible Online

Exode 29 - Ntcham bible

Exode 29

¹«A nín làá dī pu ní kí dū Aarɔn nì u-jipɔmbi kí sú-mi bí kpántí man saraaŋaliibee sèé. «Á yòon̄ dinajapɔmbil nì ipijaa ili in laaba kaa wɔ̀b̄ee,

²nì kpɔnɔ un kaa cáá ŋkpɔnɔnyɔkɔee, nì kalaabi bin bi dū ŋkpam ki ŋmālim̀ ki búuń ŋkpɔnɔnyɔkɔ kpá poonee, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee. Bilee yim ní bí dūú ŋá an kɔkɔ.

³Á dū kɔkɔ kí ŋá kukabiku kubɔn kí cáań circir kɔŋkooŋŋun, kí kpáaǹ dinajapɔmbil nì ipijaa ilee.

⁴«Á cáań Aarɔn nì u-jipɔmbi circir kɔŋkooŋŋu punyɔkɔki nyɔkɔpu kí fàl̀-bi nnyim bí nyā kí nīn bí circir.

⁵Á dū abɔkuti ŋin bi ŋáĺ ki dūu sú-mee kí pèen̄ Aarɔn, an dàkà yii poon bɔkutil nì dibɔkutifɔkɔl nì eefoodi nì kilɔbiki, ní kí dū eefoodi dambalau kí cúú.

⁶Á dū ŋŋaabu kí fìn̄ u-yil ní kí dū tikpáakaal tin dàkà yii bi dū-u ki sú-mee kí cúú ŋŋaabuee.

⁷Míǹ boonee ní á yòon̄ ŋkpam min bi cáa sìtī unil yilpu kí dū-u kí sú-mee kí sìtī u-yil pu.

⁸A yaa ŋá míǹ ki dóòyee ní á yàntī u-jipɔmbi ń sútiń kí pìl̄-si, ní á dū bi-bɔkutiŋ poon yaŋ kí pèen̄-bi.

⁹Á dū bi-dambalab kí gbìn̄-bi, ní kí dū bi-fuulimmu kí cíkiń-bi. Míǹ boonee á dū Aarɔn nì u-jipɔmbi kí kàan̄ bí nīn bí m-tundin. Kí yòon̄ ŋyunti gbantee, bi kpántì m-saraaŋaliibi dee kí nīn cá jaanjaan.

¹⁰«Á cáań dinajapɔmbilee dikpafindi tantiu nyɔkɔpu, ní Aarɔn nì u-jipɔmbi ń dū bi-ŋalii kí páań di-yil pu.

¹¹Á làntì dinajapɔmbilee man nimbiin niin circir kɔŋkooŋŋu punyɔkɔki nyɔkɔpu.

¹²Á lēē fatiku kí dū a-ŋambiki kí sēē kí jòotì nsaraafan yiŋyi naatil pu. Boonee ní á kpáatí fatiku un kíǹee kí pɔ̀l̄ nsaraafan taapu.

¹³Á yòon̄ ŋkpam min kɔkɔ bīī ina puee nì mpɔɔlam nì aceebil liitil nì ŋkpam min bīī ŋi-puee kí cáá wà ŋŋmi nsaraafan pu.

¹⁴An di làá nīn sá bisaraaŋaliibi kpitii pɔ̄tam saraau. Ama á yòon̄ dinajapɔmbilee nanti nì di-gbaŋŋu nì di-binti kɔkɔ kí cáá wà ŋŋmi dinaapaal kpaanceetiŋu.

¹⁵«Boonee ní á cáań upijapeekaa ní Aarɔn nì u-jipɔmbi ń dū bi-ŋalii kí páań di-yil pu.

¹⁶Á làntì-dì, ní kí dū fatiku kí yàaǹ nsaraafan kɔkɔ pu kí màntīí tū.

¹⁷Á càkà di-nanti anaŋkún anaŋkún, kí fíntí di-nai nì di-yakaŋ kí dūú páań anaŋkúnee nì diyil pu.

¹⁸Á dū upijamɔnee kí wà ŋŋmi nsaraafan pu. An di sá saraawɔkaa un ni ŋá ki tīī-mee, saraa un sɔnsɔfiŋu sɔ̀ŋkī man ni-Dindaan pɔbilee[97].

¹⁹«Boonee ní á cáań upìjaliliiti, ní Aarɔn nì u-jipɔmbi ń dū bi-ŋalii kí páań upìjee yil pu.

²⁰Á làntì-u kí lēē fatiku kí jōō Aarɔn nì u-jipɔmbi tafalam ŋŋaŋgiil yaŋ pu, nì bi-ŋambijaliŋ ŋŋaŋgiil yaŋ pu nì bi-taŋambijaliŋ ŋŋaŋgiil yaŋ pu, ní kí dū fatiku kí yàaǹ nsaraafan kɔkɔ pu kí màntīí tū.

²¹Á dāá lēē fatiku un bí nsaraafan puee nì ŋkpam min bi cáa sìtī binib yiliŋ pu kí dū-bi kí sú-mee, kí yàaǹ Aarɔn nì u-bɔkutiŋ pu, ní kí yàaǹ u-jipɔmbi nì bi-bɔkutiŋ pu. Mimmee a dū Aarɔn nì u-jipɔmbi nì bi-wampeeŋkaati ki sú-mi dee.

²²Á dāá lēē upìjee kpam nì dijugbindi nì ŋkpam min bīī ina puee, nì mpɔɔlam nì aceebil nì ŋkpam min bīī ŋi-puee, nì diŋaŋgiitaal, kun puee an sá upìja un bi dūu ŋá saraa kí kàan̄ bisaraaŋaliibi bí nīn bí m-tundinee ní.

²³Á lēē kpɔnɔb bin bi púĺ kaa ŋá ŋkpɔnɔnyɔkɔ poon an kā kukabikun ki yú m-nimbiinee ubɔ, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee ubɔ, nì kalaabi bin bi dū ŋkpam ki ŋmālim̀ ki búuńee ubɔ.

²⁴Á dū tiwan gbanti kɔkɔ kí ŋúbiǹ Aarɔn nì u-jipɔmbi ní kí yàntī bí dúkutí yilpu kí fíiǹ fíiǹ man ni-Dindaan nimbiin.

²⁵Boonee, á fàtīí fōō bi-ŋaan kí dūú kūtì saraawɔkaa un pá nsaraafan puee kí wà ŋŋmi. An saraau sɔnsɔfiŋu sɔ̀ŋkī man ni-Dindaan pɔbil ní.

²⁶Á yòon̄ upìjaliliiti un a dūu ŋá Aarɔn yil pu saraa ki dū-u ki sú-mee bindi kí dúkutí kí fíiǹ fíiǹ man ni-Dindaan nimbiin. Dijandi gbantee, á yòon̄, a-yati dee.

²⁷«Á dū upìja un a dūu ŋá saraa ki kāaǹ Aarɔn nì u-jipɔmbi disaraaŋal tundinee bindi din a fíiǹ fíiǹee nì u-ŋaŋgiitaal din a lēēyee kí sú man ni-Dindaan.

²⁸Án sá mara ní m yóoǹ ki tīī Isirayeel yab kí nīn pée cáa cá jaanjaan, yii mpèé saraabi bin bi làá nīn ŋáań ki tìì-mee, bí nīn lèekī tinan gbanti míǹ ki tìì Aarɔn nì u-jipɔmbi.

²⁹«Aarɔn kúm boonee, u-saraaŋabɔkutiŋ làá nīn sá ki tīī u-jipɔmbi ní. Bí dāá pèen̄-ŋi ŋwiin ŋun bi làá sìtī bi-yil pu ŋkpam kí dū-bi kí sú-mi bí kíĺ disaraaŋal tundee.

³⁰U-jipɔmbi kansikin un làá fōō u-yil kí kpántí usaraaŋakpil kí kɔ́ dikpafindi tantiun kí lēē saraa <circir laŋkee> ń dāá pèen̄ asaraaŋabɔkuti gbanti iwiin iluli.

³¹«Á dū upìjaliliiti un bi dūu ŋá saraa ki kāaǹ usaraaŋakpil ú nīn bí m-tundinee nanti kí tɔ́kɔń mpaan ŋun bi lēē ŋu sá circiree.

³²Ní Aarɔn nì u-jipɔmbi ń ŋmɔ́ tinan gbanti nì kpɔnɔb bin kā kukabikunee dikpafindi tantiu punyɔkɔki nyɔkɔpu.

³³Bí ŋmɔ́ tin ní bi dūu ŋá saraa bí ká bi-kpitii pɔ̄tam kí dū-bi kí sú-mi bí kíĺ disaraaŋal tundee. Unifantanti ń taa jī saraabi jinti gbanti, di sá yii tì sá circir ní.

³⁴Saraa un bi ŋá ki kāaǹ-bi bisaraaŋaliibee nanti nì kpɔnɔb yaa kíǹ ní kutaa wúntèe, bí dūú wà ŋŋmi. Bí taa jī tijin gbanti, di sá yii tì sá circir ní.

³⁵«Á ŋá Aarɔn nì u-jipɔmbi kí nóó nì m nín tīī-si mara puee deedee. Á dū iwiin iluli kí ŋá akoobil ŋin sá á ŋá-bi ní bí nín kpántí bisaraaŋakpilibee.

³⁶«Ŋwiin kamaayee, á dū unaja kí ŋá ikpiti pɔ̄tam saraau, ní kí ŋá saraa nsaraafan pu kí ŋá-ŋu circir. Boonee á dū ŋkpam kí sìtī ŋu-pu kí dū-ŋu kí sú-mi.

³⁷Á dū iwiin iluli ní kí ŋá akoobil gbanti mun. Míǹ boonee nsaraafan kpántì circir páaa dee ní tin kamaa yaa pée gbēē-ŋuee kpántì circir wanti.»

³⁸«Saraabi bin a làá bɔ́ntí kí páań nsaraafan puee sèé. Ŋwiin kamaayee, á dū apibil ali ŋin cáá dibindi dibee kí ŋá saraa nsaraafan pu.

³⁹Á dū diba kí ŋá saraa kutaafaau, ní kí dū din kíǹee kí ŋá saraa kujoou.

⁴⁰Á dū ŋyim kiiloobi bita kí dū ɔliifi kpam min wāĺ kílkilee liitiri ubɔ nì dijandi kí búuń ŋyimee kí dūú kūtì dipibipeepeekaalee pu kí ŋá saraa. Á dū ndamam liitiri ubɔ nì dijandi mun kí fá saraapeekaayee ŋátam poon.

⁴¹Saraaliliitee, kujoou ní a làá ŋá úǹ kí tīī-mi. Tiwan tin kɔkɔ a kútì ki ŋá saraapeepeekaayee, tíǹ tibaantiil ní a làá tí dūú kūtì kí ŋá saraaliliiti mun. An di sá saraawɔkaa un sɔnsɔfiŋu sɔ̀ŋkī m-pɔbilee.

⁴²Saraawɔkaa gbanti ní ni làá nīn pée ŋáań kí nīn cáa cá jaanjaan circir kɔŋkooŋŋu punyɔkɔki nyɔkɔpu man ni-Dindaan nimbiin. Niin ní man nì ni làá nīn kpáfí ní ḿ nīn sòoǹ nì si.

⁴³«Man nì Isirayeel yab làá kpāfì mpaan gbanti pu, ní m-nyooti ń dāá ŋá mpaan gbanti circir.

⁴⁴M làá dāá ŋá dikpafindi tantiu nì nsaraafan circir, ní kí ŋá Aarɔn nì u-jipɔmbi circir bí nīn bí m-saraaŋatundin.

⁴⁵M làá dāá nīn kóò Isirayeel yab kansikin, ní kí nīn sá bi-Nimbɔtiu.

⁴⁶Bi làá dāá béé yii man bi-Dindaan di sá bi-Nimbɔtiu un di nyántìń-bi Eejipiti tiŋkin kí nīn kóò bi-kansikinee. «Man di sá bi-Dindaan bi-Nimbɔtiu.»