Read Ntcham Exode 3 Bible Online

Exode 3 - Ntcham bible

Exode 3

¹Mooyiisi nìn bí ki kpàá u-coo Jeetroo, Madiyan tiŋki tandaaŋwu piii nì u-ŋoobui. Dalbee u yōoǹ tiwaŋkuti ki jítì kuteeu pu ki tin bàn̄ Ooreeb, Unimbɔti jool pu.

²Niin ní ti-Dindaan tuuŋŋu nyántì ŋu-ba ki dàkā-u ŋŋmin kisugbooi poon. Mooyiisi ká aŋmilimbil nyēē kisugbooyee poon, ama ní kíǹ ki-ba kaa bíi wù.

³Ní Mooyiisi bí yii: «M làá sútí kí pìl̄ kí kpèè maamaaci bɔti tin di bíi jītí niin ní ŋŋmi gà kisugbooi poon lìblib ama ní kaa bíi wùee.»

⁴Ti-Dindaan nín ká yii u sútìń kí kpèèyee ní u yíiń-u kisugbooyee poon yii: «Mooyiisi! Mooyiisi!» Ní Mooyiisi kíí-u yii: «M sèé!»

⁵Ní Unimbɔti bí-u yii: «Taa sútí kí pìl̄ kisugbooi nee. Tákatí a-naatakaŋ, kun puee laakin a yú nee sá circir paaŋŋu ní.

⁶Man di sá a-baa Nimbɔtiu, Abraam nì Isaaki nì Jaakɔb Nimbɔtiu.» Niinee Mooyiisi fātì u-nimbiin, kun puee u nìn fāŋkì kí kpèè Unimbɔti.

⁷Ní ti-Dindaan bí yii: «M ká m-nibul din bí Eejipitee falaau, ki gbìl̄ Eejipiti yab nín sàantí-bi bi gbáà ibiil iŋyee. Tiŋman m nyí falaa un bi bíi jīǹee.

⁸An puee m sīntìń kí fōō-bi Eejipiti yab ŋaan, kí nyāntí-bi kitiŋ nee poon kí cáá-bi kí cùnnì kitiŋ kin ŋān̄ ki sá kikpaaŋŋee poon. Kitiŋ gbanti poonee, nnaabiim nì tisiil di còol̀. Niin ní Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kóò.

⁹Isirayeel yab biilii bāań-mi, ní man m-ba ká Eejipiti yab nín bí ki sàantí-bi puee.

¹⁰Kɔŋkɔnnee m làá tɔ̄-si Faaroo cee á cù Eejipiti kí nyāntí man nibul Isirayeel yab.»

¹¹Ní Mooyiisi bí Unimbɔti yii: «Man di sá ŋma ní kí cù Faaroo cee kí nyāntí Isirayeel yab Eejipiti tiŋkin?»

¹²Ní Unimbɔti bí yii: «M làá nīn bí a-cee. Kun làá nīn sá-si kudaaŋŋu á béé yii man di tú-see di sá a yaa láa nyántì Isirayeel yab Eejipiti tiŋkinee, dijool nee pu ní ni làá dāá jāam̀ man Unimbɔti.»

¹³Ní Mooyiisi bí Unimbɔti yii: «Too, m làá cù Isirayeel yab cee kí tùkù-bi yii: <Ni-naanjab Nimbɔtiu di túnní-mi ni-cee.> Bi làá bàlifì-mi yii: <Bi yíì-u yii ba? M làá kíí-bi yii ba?>»

¹⁴Ní Unimbɔti kíí Mooyiisi yii: «M SÁ UN SÉE NÍ». Á tùkù Isirayeel yab yii: «M SÁ di túnní-mi ni-cee.»

¹⁵Unimbɔti gíti bí Mooyiisi yii: «TI-DINDAAN ni-naanjab Nimbɔtiu, Abraam Nimbɔtiu nì Isaaki Nimbɔtiu nì Jaakɔb Nimbɔtiu di túnní-mi ni-cee. Man yindi dee kí nīn cáa cá jaanjaan. Diyindi gbanti ní iyunti kamaa nib làá nīn yíì-mi.

¹⁶Kɔŋkɔnnee, cù kí kpāfì Isirayeel kpilib, kí tùkù-bi yii ni-Dindaan ni-naanjab Nimbɔtiu, Abraam Nimbɔtiu nì Isaaki Nimbɔtiu nì Jaakɔb Nimbɔtiu nyántì u-ba ki dàkā-si ní ki tùkū-si yii: <M ká Eejipiti yab nín bí ki sàantí-ni puee, kɔŋkɔnnee m làá fīī-ni.

¹⁷M làá nyāntí-ni kitiŋ kin poon bi bí ki sàantí-ni nee kí cáá-ni kí cùnnì kitiŋ kin poon Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kóòyee. Kitiŋ gbanti poon ní nnaabiim nì tisiil còol̀.>

¹⁸«Isirayeel yab làá gbìl̄ kí tīiǹ-si. Niinee si nì bikpilib ń cùú ká Eejipiti yab bɔtiu ní kí tùkù-u yii: <Ti-Dindaan Eebru yab Nimbɔtiu, ti-Nimbɔtiu lēē u-ba ki dàkā-ti. Míǹ puee pɔ̄-ti nsan tí dū iwiin ita kí còom̀ kí cù kuteeun kí ŋá saraabi kí tīī-u.>

¹⁹Ama m nyí Eejipiti yab bɔtiu nín kaa làá kíí ní cùee, asee m yaa dàkā-u mpɔn.

²⁰An puee m làá tàntī m-ŋal ki dū maamaacib nín bí tɔbin u-ba u-ba puee kí ŋá bi-kansikin niin, ní án fáá Eejipiti tiŋki. Míǹ boonee ní ú yàntī ní nyā kí nīn cá.

²¹M làá yàntī gba ni-nibul ń ká diyimɔɔl Eejipiti yab cee, ní ni yaa làá dāá nyēe, ní taa láa nyā nì iŋaŋkulim.

²²Unimpu kamaa làá dāá bàlifì ueejipitinimpu u nì un kóò ki pìl̄ee nì un kóò u-dumpuee animbil kúti nì sindaariya wanti nì abɔkuti, kí dūú ŋá ni-jipɔmbi nì ni-bisalib wunti pu. Ni nín làá ŋá pu kí fūkul̀ Eejipiti yabee dee.»