Read Ntcham Exode 30 Bible Online

Exode 30 - Ntcham bible

Exode 30

¹«Boonee á dū akasiya dɔŋu kí kpáá nsaraafan ŋun pu bi làá nīn tùutī talaalubee.

²Á kpáá-ŋu ŋu-jaŋŋi naatil ń nīn ŋmà, dijandi kamaa ń nīn cáá dimeetajandi ní ŋfɔkɔn ń nīn sá meeta ubɔ. Nsaraafan nì ŋu-yiŋyi ń nīn sá mmɔm.

³Á dāá dū sindaariyamɔnti kí nyùntī ŋu-yilpu nì ŋu-boon kí màntīí tū nì ŋu-yiŋyi, ní kí dū sindaariya kí kpākam̀-ŋu kí màntīí tū.

⁴Á mɔ́ɔ́ sindaariya bɔmbiliŋ ali kí bā bi nín kpákám̀ nsaraafan taapu puee ajan liitil pu, bí nīn cáá ikpandɔ ki bōotí ki yòontí-ŋu.

⁵Á dū akasiya dɔŋu kí kpítí ikpandɔee ní kí dū sindaariya kí nyùntī-i.

⁶Á dū nsaraafan gbanti kí yóoń ŋŋaasakaŋkaa ŋun lìkī Dipoondi dakaau nì u-bìilee nimbiin, laakin man nì si làá nīn kpáfée.

⁷Kutaafaau kamaa Aarɔn yaa kɔ́ kí ŋāŋkì fitilabee, ú péé péé kí tūū talaalub nsaraafan gbanti pu kí wàatī.

⁸Kujoou kamaa u yaa làá tí tūū fitilabee ú tí ŋá míǹ. Ní nīn pée tùutī talaalub man ni-Dindaan nimbiin míǹ kí nīn pée cáa cá jaanjaan.

⁹Ní taa tūū talaalu ubɔ fám nsaraafan gbanti pu. Ní taa ŋá saraawɔkaa ŋu-puɔɔɔ, kí taa ŋá tijimpin saraau ŋu-puɔɔɔ, kí taa fá ndamam ŋu-pu.

¹⁰Dibindi kamaayee, Aarɔn ń dū kuwaŋkuluu kun u dūu ŋá ikpiti pɔ̄tam wiŋkpaaŋŋu saraauee fatikuu kí fá nsaraafan yiŋyi pu kí ŋá-i circir. Kí nīn pée cáa cá jaanjaanee, ní nīn ŋáań ikpiti pɔ̄tam saraau ki ŋáań nsaraafan circir diba dibindi kamaa poon. Nsaraafan gbanti máaǹ kí nīn sá circir páaa wanti tin ni dūu sú man ni-Dindaanee ní.»

¹¹Ti-Dindaan gíti bí Mooyiisi yii:

¹²«A yaa làá dāá kàaǹ Isirayeel yabee, báà ŋma ń dāá pà kunimbiŋmiiu kubɔ kí dā u-maŋfal, mimmee dikàandi kaa làá dāá cáań-ni mbusu ubɔ.

¹³Unil un kamaa bi yaa kàan̄ee ń dāá pà bi nín ŋmàntī animbil circir kɔŋkooŋŋun[98] puee dijandi. An nimbiliŋee dāa sá bí dūú ŋá man ní saraa.

¹⁴Bininjab bin kɔkɔ bi yaa láa kàan̄ kí yòon̄ abin mmuŋku kí nīn cée ń dāá pà animbil gbanti kí tīī man ni-Dindaan.

¹⁵Bigaajab ń taa tīī án páań, bisoodambi mun ń taa tīī ŋgim, ubɔ ń taa nín̄ cáá dipɔndi. Báà ŋma ń pà ti-Dindaan saraau pɔndi kí fīī u-maŋfal.

¹⁶A yaa láa fōō Isirayeel yab ŋaan animbil gbantee, á nīn cáa kpèé circir kɔŋkooŋŋu. Án di làá yàntī ḿ nīn téetí Isirayeel yab pu ki bìintí bi-pu.»

¹⁷Boonee ní ti-Dindaan gíti tí bí Mooyiisi yii:

¹⁸«Á dāá dū tasa kúti kí mɔ́ɔ́ kusampeeu kun poon bi làá nīn ŋáań nnyim bisaraaŋaliibi fíntí bi-bee, nì kun pu ku tɔ́kɔ́ee. Á dāá dū-ku kí yóoń circir kɔŋkooŋŋu nì nsaraafan kansikin, kí lúń nnyim kí gbéeǹ.

¹⁹Nnyim gbanti ní Aarɔn nì u-jipɔmbi làá dāá nīn jòotī ki fíntí bi-ŋalii nì bi-taaŋi.

²⁰Kí wàatī bí kɔ́ dikpafindi tantiu poonee, bí fíntí bi-ba ní kí taa kpú. Ŋyunti ŋun bi yaa làá sútí kí pìl̄ nsaraafan kí ŋá saraawɔkaa kí tīī-mee,

²¹bí fíntí bi-ŋalii nì bi-taaŋi ní kí taa kpú. An sá mara ní m yóoǹ Aarɔn nì u-maaliŋun yab kí nīn pée cáa cá jaanjaan.»

²²Ti-Dindaan tí bí Mooyiisi yii:

²³«Á nyàab̀ bitalaalumɔntiibi nee: miiri un bí cúlculee kiiloobi biŋmoo, nì siinamoom un sɔ́fèe kiiloobi bili nì dijandi, nì kanneel un sɔ́fèe kiiloobi bili nì dijandi,

²⁴nì kaasi kiiloobi biŋmoo kí nóó nì circir kɔŋkooŋŋu ŋmàntitam. Nyàab̀ ɔliifi kpam liitirib biluu.

²⁵Á dūú ŋmàlim̀ kí ŋá ŋkpam min sɔ́fèe kii utalaaluŋal nín ŋáań puee ní bí nīn cáa sìtī binib yiliŋ pu kí dū-bi kí sú man Unimbɔti.

²⁶Á bàtī ŋkpam gbanti kí sìtī dikpafindi tantiu nì dipoondi dakaau pu.

²⁷Á bàtī kí sìtī teebil nì u-wanti kɔkɔ, nì fitila tɔ́kɔŋkaati nì ti-wanti kɔkɔ, nì nsaraafan ŋun pu bi tùutī talaalubee pu.

²⁸Á tí bàtī kí sìtī nsaraafan ŋun pu bi ŋáań bisaraawɔkaabee nì tin kɔkɔ bi cáa tūǹ ŋu-pu ditundee, nì kusampeeu nì kun pu ku tɔ́kɔ́ee pu.

²⁹Á dū tiwan gbanti kɔkɔ kí sú-mi ní tí kpántí circir páaa wanti, ní tin kamaa yaa pée gbēē-tèe ń kpántí circir wanti.

³⁰Á dāá bàtī ŋkpam gbanti kí sìtī Aarɔn nì u-jipɔmbi yil pu kí dū-bi kí sú-mi bí nīn bí m-tundin.

³¹«Á dāá tùkù Isirayeel yab yii: <Ŋkpam nee di sá min bi làá nīn cáa sìtī binib yiliŋ pu kí dū-bi kí sú-mee. Man baba tundi ní ni làá nīn cáá-mì ki ŋáań kí nīn pée cáa cá jaanjaan.

³²Ubɔ ń taa dū ŋkpam gbanti kí ŋmìtī u-wunti. Míǹ ní ubɔ ń taa dū talaalub kí ŋmàlim̀ kí ŋá ŋkpam gbanti juti. Mi sá circir kpam ní, ni mun ń béé yii mi lafun sá circir kpam.

³³Un kamaa di yaa ŋá ŋkpam gbanti juti, ní ki dū-mì ki sītì unifantanti ubɔ puee, bí nyāntí-u m-nibul kansikin.>»

³⁴Ti-Dindaan bí Mooyiisi yii: «Nyàab̀ tin kɔkɔ pée sɔ́fèe, an dàkà yii siitakiti nì ooniikisi nì galbanum nì talaalutuukaa umɔnti, an nì tin béeyee ń nīn ŋmà, á dūú kūtì.

³⁵Á dū ŋyaam kí ŋmàlim̀ kí ŋá talaalumɔnti kii utalaaluŋal nín ŋáań puee, án nīn bí circir.

³⁶Á lēē dijandi diba kí ŋá talaalu un sá ŋyimee kí dūú yóoń circir kɔŋkooŋŋun, dipoondi dakaau nimbiin, laakin man nì si làá nīn kpáfée. Talaalu gbanti ń nīn sá ni-cee circir wanti.

³⁷Ubɔ ń taa dū tin bi dūu ŋmālim̀ ki ŋá talaalu nee ki mun ń ŋmàlim̀ míǹ kí ŋá talaalu ubɔ kí nīn cáa ŋáań tin úǹ u-ba lèe. Ama án nīn sá circir wanti tin sá ti-Dindaan baba wantee.

³⁸Un di yaa ŋá talaalu gbanti kí nīn tíkì u-sɔnsɔfiŋuee, bí nyāntí udaan m-nibul kansikin.»