Read Ntcham Exode 31 Bible Online

Exode 31 - Ntcham bible

Exode 31

¹Ti-Dindaan bí Mooyiisi yii:

²«Kpèè, m lēē Uurii jipɔɔn Beesaleel, Uur un sá Juuda naakookunee naantiiu.

³M dū m-Fam ki ŋá u-ni tikpil ki yāntì ú nīn cáá iciin, ki yáb̀ ditundi poon, kí nīn cáá dinyil ní kí nīn cáá ilandɔkɔ kí ŋmā kí tɔ̄ atuun nín bí pu aba abee kɔkɔ.

⁴Ú nīn cáá ilandɔkɔ kí ŋmā kí dū sindaariya nì animbil kúti nì tasa kúti kí tɔ̄ atuun.

⁵Ú ŋmā kí kpítí ataŋkpanyaan bí nīn cáa nākantí tiwan pu, ní kí kpítí idɔ. U làá nīn sá unil un ŋūǹ ki ŋáań tikɔkɔ mmɔntiiminee ní.

⁶M dū Ayiisamaaki un sá Daani naakookunee jipɔɔn Ooliyaab ki ŋàl̄-u ú nīn tútúǹ-u. Míǹ mbaantiim ní m tīī bitɔntɔnliibi biba mun ŋŋmam bí ŋmā kí ŋá tin kɔkɔ m làá tùkù-ni ní ŋée, an dàkà yii:

⁷Dikpafindi tantiu nì Dipoondi dakaau nì u-bìil nì circir kɔŋkooŋŋu wanti kɔkɔ,

⁸nì teebil nì u-wanti nì fitilab tɔ́kɔŋkaati tin sá sindaariyamɔntee nì ti-wanti kɔkɔ, nì nsaraafan ŋun pu bi tùutī talaaluee,

⁹nì nsaraafan ŋun pu bi ŋáań saraawɔkaayee nì ŋu-tɔntɔŋwanti kɔkɔ, nì kusampeeu nì tin pu ku tɔ́kɔ́ee,

¹⁰nì bisaraaŋaliibi wampeeŋkaati nì usaraaŋakpil Aarɔn circir wampeeŋkaati nì u-jipɔmbi mun yati tin bi làá nīn pèentí ki ŋáań disaraaŋal tundee,

¹¹nì ŋkpam min bi cáa sìtī binib yiliŋ pu kí dū-bi kí sú Unimbɔtee, nì talaalutuukaa un bi tùutī circir kɔŋkooŋŋunee. Bitɔntɔnliibi ń ŋá kii m nín tīī-si mara yii bí ŋá puee ní deedee.»

¹²Ti-Dindaan bí Mooyiisi

¹³ń tùkù Isirayeel yab yii: «Ní nīn tɔ́ ŋwiŋŋuŋfikaa tiŋan. Di sá yii ŋwiŋŋuŋfikaa sá kudaaŋŋu kubɔ ní man nì ni kansikin kí nīn pée cáa cá jaanjaan. Ŋu dàkà yii man ni-Dindaan di yāntì ni bí circir.

¹⁴An puee ní nīn tɔ́ ŋwiŋŋuŋfikaa, ŋú nīn sá circir wiiŋŋu ki tīī-ni. Un di yaa kpēē-ŋu fám ki túń ditundi ŋwiin gbantee, bí kpɔ̀-u. Tiŋman un di yaa túń ditundi ŋwiin gbantee, bí nyāntí-u m-nibul kansikin.

¹⁵Ní dū iwiin iluu kí tɔ̄ atuun, winluli dalee, ní dūú ŋùŋfì. Ŋúǹ sá ŋwiin ŋun ni dūu sú man ni-Dindaanee ní. Un kamaa di yaa túń ditundi ŋwiŋŋuŋfikaa dalee, bí kpɔ̀-u.

¹⁶Isirayeel yab ń nīn ŋúb́ ŋwiin gbanti kí nīn pée cáa cá jaanjaan. Di sá yii an sá tibɔti tin bóob́ ki yóoǹ án nīn bí ki cá jaanjaanee ní.

¹⁷Ŋwiŋŋuŋfikaa làá nīn sá kudaaŋŋu ní man nì Isirayeel yab kansikin kí nīn pée cáa cá jaanjaan. Di sá yii m dū iwiin iluu ní ki náań yilpu nì taapu, ní ŋwinluluútee, m kāl̀ ki ŋūŋfì[99].»

¹⁸Unimbɔti sòon̄ nì Mooyiisi míǹ Siinaayi jool pu ki dóòyee, ní ki dū titaŋkpapilindi tili tin pu u dū u-ŋambiki ki ŋmàn̄ dipoondi marab ki nákáǹee ki tīī-u.