Read Ntcham Exode 32 Bible Online

Exode 32 - Ntcham bible

Exode 32

¹Samaa nín ká yii Mooyiisi yúntìń dijool pu kaa bíi bàńee ní bi cūtìi kpáfì Aarɔn cee ní ki bí-u yii: «Kpèè doo, mɔ́ɔ́-ti unimbɔti ubɔ ú nīn līī ti-nyɔkɔpu, di sá taa nyí tin di yaa bāań Mooyiisi un di nyántìń-ti Eejipiti tiŋkinee[100].»

²Ní Aarɔn bí-bi yii: «Lēēmaan ni-nimpoobi nì ni-bisalib nì ni-jipɔmbi sindaariyabɔmbiliŋ bi-tafaliŋ pu kí cáaḿmaan-mi.»

³Dicilpu niin ní Isirayeel yab gbákal̀ bi-bɔmbiliŋ bi-tafaliŋ pu ki cáań ki tīī-u.

⁴Aarɔn fōō tiwan gbantee bi-ŋaanee ní ki dūntì ki dūu sītì tiwan tin bi ŋá ki nántiǹ dinabilee poon, ní an nyántì dinabil. Niinee ní samaa téeń yii: «Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!»

⁵Aarɔn ká mimmee ní ki máń nsaraafan dinabilee nimbiin ní ki bí yii: «Foolee ti làá fu jī ti-Dindaan jiŋaaliu.»

⁶Kutaa wúntì kutaafaau pɔ̀lpɔlee ní samaa ŋá bisaraawɔkaabi nì mpèé saraabi. Boonee ní bi kāl̀ ki jíń ki nyùn̄. Bi dóòyee ní ki dūu gùl̄ agbiil pu[101].

⁷Niinee ti-Dindaan bí Mooyiisi yii: «Sìntī malaa, di sá a-nibul din a nyántìń Eejipiti tiŋkinee bíi ŋáań ikpitikpaan.

⁸Bi pūtì kpáàa dū nsan ŋun m dàkā-bee ki fá. Bi dūntì tikúti ki mɔ́ɔ́ dinabil, ki gbāaǹ di-nimbiin, ki ŋá-dì saraabi ki lī yii: <Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee!»

⁹Ti-Dindaan gíti tùkū Mooyiisi yii: «M ká yii dinibul nee sá din gáatèe ní.

¹⁰Kɔŋkɔnnee, yàntī ḿ fōō bi-pu mbiim kí kúntí-bi. Boonee m làá dī sii pu kí náań ditimbuŋkpaandi.»

¹¹Ama ní Mooyiisi gbāam̀ ti-Dindaan Unimbɔti ú jī kimɔtii ní ki bí yii: «Ti-Dindaan, ba pu ní a fōō dinibul din a nyántìń Eejipiti tiŋkin nì a-pɔŋkpaaŋŋu nì a-kpabilee pu mbiim míǹ?

¹²A yaa ŋá mimmee Eejipiti yab làá lì yii: <Unimbɔti là kí cáá-bi kí tɔ̄ mbusu poonee pu ní u nyántì-bi ti-tiŋkin. U là kí cáá-bi kí cūnnì ntimu mun bí ajoon puee kí sàaǹ-bi kí kúntí-bi kitiŋ pu ní.> An puee m-Dindaan, sɔ̀ŋkì a-pɔbil, kí gíiǹ mbusu un a bàà làá dūú tɔ̄ a-nibul puee kí yà.

¹³Téetí Abraam nì Isaaki nì Jaakɔb pu, a-tɔntɔnliibi bin a nìn pūtì ki pōoǹ-bi yii: <M làá bùtī ni-maaliŋun yab bí nīn wīikí kii iŋmalbijaa in bí kutagbɔŋu puee. M làá dū kitiŋ kin m pōoǹ-bee kí tīī-bi bí nīn kíǹ ki yì kí nīn pée cáa cá jaanjaan[102].>»

¹⁴Niinee ti-Dindaan nín bàà bɔ́ntì kí dū mbusu un kí tɔ̄-bee ní u yāntì kaa ti ŋá míǹ[103].

¹⁵Mooyiisi nìn yíkìń dijool pu ki nín kpákatiń ki ŋúbiń titaŋkpapilindi tili u-ŋaan ajan liitil pu bi ŋmàn̄ dipoondi marab.

¹⁶Unimbɔti u-ba di nìn kpítì titaŋkpapilindi gbanti. Úǹ u-ba di nìn tí ŋmàn̄ ti-pu kii kigaai ní bi dūu cáká ki ŋmàn̄ee.

¹⁷Joosuwa nín gbìl̄ samaa kuŋkuuntii puee ní u bí Mooyiisi yii: «Pīlifì, ijanjakuŋkuunti di tùm̀ ti-naapaal puee.»

¹⁸Ní Mooyiisi bí-u yii: «Aayee, doo kaa sá dijajil kuŋkuuntii, kaa tí sá bin bi jáń ki pɔ́ɔkiǹee yaliŋkii. Ilan pu ní man gbìl̀ nee.»

¹⁹Bi tóob́ dinaapaalee ní Mooyiisi ká dinabil yú ní samaa bí ki ŋōō ní u fōō diŋuul ŋkpitim pu. U nìn dū titaŋkpapilindi tin u ŋúb́ u-ŋaanee ki lúkú, ní ki gbáń ki wīī-tì dijool taapu niin.

²⁰Ní u cūtìi yōoǹ dinabil din samaa mɔ́ɔ́yee ki tɔ́ ŋŋmin ní an wùn̄. U nìn nàn̄-dì dúsi dusi, ki dūu sītì nnyimin ní ki yāntì Isirayeel yab nyùn̄.

²¹Ní Mooyiisi bālifì Aarɔn yii: «Ba ní dinibul nee ŋá-si ní a téé-dì ki tɔ́ ikpitikpaan in bí nee poon míǹ?»

²²Ní Aarɔn kíí Mooyiisi yii: «M-dindaan, taa fōō m-pu diŋuul. Sii a-ba nyí yii dinibul nee kaa pée pɔ̄ɔ̄ tin kaa ŋān̄ee diŋál.

²³Bi bí-mi yii: <Mɔ́ɔ́-ti unimbɔti ubɔ ú lìntī ti-nyɔkɔpu, di sá yii Mooyiisi uninja un di nyántìń-ti Eejipiti tiŋkinee, taa nyí tin di yaa bāań-uee.>

²⁴Niinee ní m bālifì-bi yii: <Ŋma di cáá sindaariya?> Dicilpu niin ní bi túutì abɔmbil bi-tafaliŋ pu ki cáań ki tīī-mi, ní m dūu tɔ́ ŋŋmin ní dinabil nee nyánní.»

²⁵Mooyiisi ká yii fìkil fikil kɔ́ samaa ní Aarɔn yāntì bi ŋá bi nín là puee, ki dū bi-ba ki tīī binannanliibi ń bèel̀.

²⁶Niinee ní Mooyiisi cūtìi yúl̀ dinaapaal punyɔkɔki nyɔkɔpu ní ki téeń yii: «Bin kɔkɔ bí ti-Dindaan jandee ń dāan̄ man cee!» Ní Leefii naakookun yab kɔkɔ dɔ́miń ki yúl̀ u-cee ki māntìi tú-u.

²⁷Ní u bí-bi yii: «Kpèèmaan, ti-Dindaan Isirayeel Nimbɔtiu nín lī puee sèé yii: <Báà ŋma ń dū u-tàataajiki kí gbìn̄, kí yìiǹ dinaapaal jaŋŋi kɔkɔ poon kí kpɔ̀ u-nabiki nì u-bɔɔ nì u-kɔŋkɔnnaatɔ.>»

²⁸Leefii yab nìn ŋá kii Mooyiisi nín nìn lī puee, di sá yaadal wiiŋŋuee, bi nìn kūū binib kutukub bita.

²⁹Niinee ní Mooyiisi bí Leefii yab yii: «Díǹ nee ni dū ni-ba ki sú ki túń ni-Dindaan tundi, kun puee naa yíì ki ŋúń ki kūū ni-jipɔmbi nì ni-nabiyaamu. An puee ti-Dindaan ń bìin̄ ni-pu díǹ.»

³⁰Kutaa wúntèe ní Mooyiisi bí samaa yii: «Ikpitikpaan ní ni baasii ŋá. Kɔŋkɔnnee m làá fàtīí jɔ̄m̀ dijool pu ti-Dindaan cee, an yaa yíì u làá fōō-mi kí dū ni-kpitii kí pɔ̄-ni.»

³¹Niinee Mooyiisi fātìi nín gítí ti-Dindaan cee, ní ki bí-u yii: «Àaa ti-Dindaan, a-nibul ŋá ikpitikpaŋkpaan ní, bi dū sindaariya ki mɔ́ɔ́ unimbɔti.

³²Ama m gbāam̀-si, dū bi-kpitii kí pɔ̄-bi. An yaa kaa ŋá mimmee, á kpìtī man yindi dimaŋfal gbɔŋku kun a ŋmàn̄ee poon.»

³³Ní ti-Dindaan bí Mooyiisi yii: «Un yīntiǹ-mee yindi ní m làá kpìtī m-gbɔŋku poon.

³⁴Too kɔŋkɔnnee, nín̄ cá kí yòon̄ dinibul kí cùnnì laakin m bí á cáá-bi kí cùnnèe. M làá yàntī m-tuuŋŋu ń nīn līī a-nyɔkɔpu. Ama dalba m làá dāá dáaĺ bi-tafal bi-kpitii gbanti pu.»

³⁵Ti-Dindaan dáaĺ dinibul tafal Aarɔn nín nìn mɔ́ɔ́-bi dinabil diŋyee pu.