Read Ntcham Exode 33 Bible Online

Exode 33 - Ntcham bible

Exode 33

¹Ti-Dindaan bí Mooyiisi yii: «Yīkì doo, sii nì dinibul din a nyántìń Eejipiti tiŋkinee, kí nīn cá kitiŋ kin m pūtì ki pōoǹ Abraam nì Isaaki nì Jaakɔb yii m làá dūú tīī bi-maaliŋun yabee[104].

²M làá tɔ̄ń m-tuuŋŋu ŋú lìntī ni-nyɔkɔpu kí jà Kanaan yab nì Amɔɔr yab nì Eeti yab nì Peeriisi yab nì Eefi yab nì Jeebusi yab.

³Ní cùú kɔ́ kitiŋ kin poon nnaabiim nì tisiil còol̀ee. Ama man kaa làá nóó-ni kí cù, kun puee ni sá dinibul din pɔbil gbìfèe ní. Án làá yàntī ḿ kpɔ̀ kí céetí-ni nsanni.»

⁴Samaa nín gbìl̄ mbusu bɔti gbantee ní bi kāl̀ kii bi ká dikpoolee, ní báà ubɔ kaa dū tiwannyaandi ki ŋá u-ba pu.

⁵Di sá ti-Dindaan bí Mooyiisi ń tùkù Isirayeel yab yii: «Ni sá dinibul din pɔbil gbìfèe ní. M yaa bí yii m làá nīn còom̄ ni-kansikin, án kaa làá gāā dikàakil ní ḿ kpɔ̀ kí céetí-ni. Míǹ puee lēēmaan tiwannyaandi ni-wunti pu ḿ kpèè min ní m làá ŋá-nee.»

⁶Kí yòon̄ Ooreeb jool caŋin niin ní Isirayeel yab kíĺ kaa ti dū tiwannyaandi ki ŋá bi-wunti pu.

⁷Isirayeel yab yaa nìn bàn̄ laakin ki gāā dinaapaalee, Mooyiisi nìn yòontí tanti ní kí cùnnì kí cóoń dinaapaal boon ndandati. Bi nìn yíì-u yii <circir kɔŋkooŋŋu>. Un yaa nìn là kí bàlifì ti-Dindaan cee tibee nìn nyēē dinaapaalin ní kí cù circir kɔŋkooŋŋun.

⁸Ŋyunti kamaa Mooyiisi yaa nìn yíkìi cá circir kɔŋkooŋŋunee, samaa nìn yíkí ní báà ŋma yú u-tantiu nyɔkɔpu, ní bi-nimbiliŋ cɔ́ u-pu áli ú tin kɔ́ circir kɔŋkooŋŋun.

⁹Ŋyunti ŋun u yaa kɔ́ee ní ditagbancancaal ń sìntīń kí dāá yūĺ circir kɔŋkooŋŋu punyɔkɔki nyɔkɔpu, ní ti-Dindaan ń nīn bíi sòoǹ nì Mooyiisi.

¹⁰Isirayeel yab yaa nìn ká ditagbancancaalee sīntìń ki yúl̀ circir kɔŋkooŋŋu punyɔkɔki nyɔkɔpuee, ní bi-kɔkɔ ń tàtīí dòon̄ dicincibil bi-tantib nyɔkɔpui.

¹¹Ti-Dindaan nìn sòoǹ nì Mooyiisi bi-nimbiiŋyi túĺ tɔb kii unil nì u-juti nín sòoǹ nì tɔb puee ní. Boonee ní Mooyiisi ń fàtīí nīn gítí dinaapaal pu, ní Nuuni jipɔɔn Joosuwa un nìn bí ki tútúǹ-uee ń gbíntí circir kɔŋkooŋŋun.

¹²Mooyiisi bí ti-Dindaan yii: «Kpèè, sii di bí-mi yii ḿ kpòotī dinibul nee, ama ní kaa yāntì m béè un ní a làá tɔ̄ń ú céeǹ-mee. Ama si mun di bí-mi yii: <M nyí-si tiŋan>, ní ki gíti lī yii: <A ká diyimɔɔl m-cee.>

¹³Míǹ puee m yaa lafun ká diyimɔɔl a-cee, á yàntī ḿ béé a-landɔkɔi nín sá puee. Mimmee m làá béé-si tiŋan ní kí páatí diyimɔɔl gbanti pu. Á nīn nyí yii ditimbundi nee sá a-nibul ní.»

¹⁴Ní Unimbɔti kíí Mooyiisi yii: «Mama m-ba di làá céeǹ-ni ní kí tīī-si diŋuŋfil.»

¹⁵Ní Mooyiisi bí-u yii: «Sii a-ba yaa kaa bí ti-cee kí céeǹ-ti, á taa lì yii tí yīkì doo kí nīn cá.

¹⁶Ba di làá dàkà yii man nì a-nibul ká diyimɔɔl a-cee? See a yaa céeǹ-ti baba di làá gàntì man nì a-nibul nì anibul ŋin kɔkɔ bí kitiŋ puee nib kansikin.»

¹⁷Ní ti-Dindaan kíí Mooyiisi yii: «M làá ŋá min a dáá bālifì-mi nee kí tīī-si, di sá a ká m-cee diyimɔɔl, ní man di baasii lēē-si.»

¹⁸Ní Mooyiisi bí yii: «M gbàam̄-si, yàntī ḿ ká a-nyooti.»

¹⁹Ní Unimbɔti bí-u yii: «M làá yàntī m-ŋanti nín sá puee kɔkɔ ń jītí a-nimbiin á ká, ní kí yíiń man ni-Dindaan yindi a-nimbiin. M sūǹ un saai m là kí sɔ̄ee saai, ní ki ŋáań tiŋan un m là kí ŋá tiŋanee[105].

²⁰Ama aa ŋūǹ kí wāl̀-mi nì a-nimbiliŋ yéè kpìrrr, di sá unil kaa ŋūǹ kí wāl̀-mi ki gbíntìi bí dimaŋfalin.»

²¹Ti-Dindaan gíti bí yii: «Kpèè mpaan ŋubɔ bí doo ki pìl̄-mi. Tɔ́kɔń ditaŋkpakpaandi nee pu kí nīn yú.

²²Ŋyunti ŋun m-nyooti yaa láa bíi jītée, ḿ dāá dū-si kí báĺ ntaŋkpalɔkɔn ní kí dū m-ŋal kí bìin̄ a-nimbiin ní kí jītí.

²³Boonee ní ḿ dāá cúú m-ŋal kí bìitī ní á wāl̀ m-boon, an yaa kíǹ m-nimbiinee, ubɔ kpá kí ká-ŋu.»