Read Ntcham Exode 35 Bible Online

Exode 35 - Ntcham bible

Exode 35

¹Mooyiisi kpáfì Isirayeel yab kɔkɔ ní ki bí-bi yii: «Kpèèmaan ti-Dindaan nín yóoǹ mara yii ní ŋá puee sèé:

²<A cáá iwiin iluu kí tɔ̄ ditundi, ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man ni-Dindaanee. Un kamaa yaa túń ditundi ŋwiin gbantee, bí kpɔ̀-u[115].

³Laakin kamaa ni yaa kóòyee, ubɔ ń taa kpāā ŋŋmi ŋwiŋŋuŋfikaa dal.>»

⁴Mooyiisi bí Isirayeel yab kɔkɔ yii: «Kpèèmaan ti-Dindaan nín yóoǹ mara yii ní ŋá puee sèé:

⁵<Ní lēēmaan ni-kansikin tigaajati tin ni cááyee poon kí ŋá ti-Dindaan saraa. Bin làá tīīyee ń tīī nì dipɔbil diba. Bí tīī sindaariya nì animbil kúti nì tasa kúti,

⁶nì bigulifamambi nì gulfab bin bí gùŋgumee nì bigulifamambi cínciŋ nì bigulifapimbi bin bí fálfalee nì tiŋɔkuti,

⁷nì ipigban in bi mántèe nì igban in dàfì tikpilee nì akasiya dɔi,

⁸nì ŋkpam min bi làá nīn cáa ŋáań fitilabinee nì talaalu kpam min bi làá nīn cáa sìtī binib yiliŋ pu kí dū-bi kí sú ti-Dindaanee nì talaalub bin bi làá nīn tùutēe,

⁹nì ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi nì kilɔbiki kin pāantí usaraaŋakpil bindi puee.

¹⁰Bitɔntɔnliibi bin yáb̀ee kɔkɔ ń kpāfì kí tɔ̄ ditundi din ti-Dindaan bālifì yii ní tɔ̄ee.

¹¹Bí kpāfì kí ŋá circir kɔŋkooŋŋu nì ŋu-biiŋkaati nì ŋu-tabikaati nì ŋu-fukuŋkaati nì ŋu-kalimii nì ŋu-dɔjaatii nì i-tílkaati,

¹²nì Dipoondi dakaau nì u-kpandɔi nì u-bìil nì ŋŋaasakaŋkaa ŋun pìtī circir laŋki nì circir páaa laŋki kansikinee,

¹³nì teebil nì u-kpandɔi nì tin kɔkɔ bi cáa tūǹ ditundi u-puee nì kpɔnɔb bin bi cāabìń ki pāantí ti-Dindaan nimbiinee,

¹⁴nì fitilab tɔ́kɔŋkaati nì ti-wanti kɔkɔ nì fitilab nì bi-kpam,

¹⁵nì talaalutuukaa saraafaŋŋu nì ŋu-kpandɔi nì ŋkpam min bi sìtī unil yil pu kí dū-u kí sú Unimbɔtee nì talaalutuukaa nì ŋŋaabu ŋun sàkā circir kɔŋkooŋŋu punyɔkɔkee,

¹⁶nì saraawɔkaa faŋŋu nì ŋu-làaŋ́ki kin sá tasa kútee nì ŋu-kpandɔi nì tin kɔkɔ bi cáa tūǹ ŋu-pu ditundee nì kusampeeu nì tikúti tin pu ku tɔ́kɔ́ee,

¹⁷nì iŋaabu in bi làá dūú màntīí gíb́ circir kɔŋkooŋŋu cindee nì i-dɔjaatii nì tikúti tin bi làá dūú tíĺ idɔjaa taapuee nì sata un bi làá dūú sàkan̄ dicindi punyɔkɔkee,

¹⁸nì circir kɔŋkooŋŋu kpakpaaŋi nì ŋu-cindi kpakpaaŋi nì ŋu-ŋmiii,

¹⁹nì tiwampeeŋkaal tin bi làá nīn pèentí ki tūǹ atuun circir kɔŋkooŋŋunee nì usaraaŋakpil Aarɔn wampeeŋkaati nì u-jipɔmbi yati tin bi làá nīn pèentí ki tūǹ disaraatundee.>»

²⁰Niinee ní Isirayeel yab nyáń Mooyiisi cee.

²¹Bin nìn cáá tiniti ki làá tīī nì dipɔbil dibee nìn cáań ti-Dindaan bi-wanti bí dūú cóoń circir kɔŋkooŋŋu, kí tɔ̄ atuun ŋin kɔkɔ sá bí dūú tɔ̄ee ní kí dūú ŋáĺ circir wampeeŋkaati.

²²Míǹ ní bininjab nì binimpoobi bin cáá tinitee yōoǹní akimbil nì falfatib nì mbɔmbiyaamu nì abɔmbil nì sindaariya wanti tin sá tiwannyɔkɔntikaalee ki dī akoobil nín sá puee ki dūu ŋá saraa ki tīī ti-Dindaan.

²³Bin kɔkɔ nìn cáá bi-dumpui bigulifamambi gùŋgumee nì gulfab bin máǹ wèeeeyee nì bin máǹ cínciŋee nì bin pīiǹee nì tiŋɔkuti nì ipigban in bi mántèe nì igban in dàfèe, nìn cáań ki tīī.

²⁴Bin kɔkɔ nìn lēē animbil kúti nì tasa kúti ki yóoǹ kí dūú ŋá ti-Dindaan saraayee nìn cáań. Bin kɔkɔ nìn cáá akasiya dɔyee nìn cáań bí dūú tɔ̄ atuun.

²⁵Binimpoobi bin nìn nyí diwanlulee nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee nì bin pīiǹee ki lùn̄ ki cáań.

²⁶Binimpoobi bin nyí diwanlulee nìn dū bi-pɔbiliŋ ki tīī ki dū tiŋɔkuti ki lùn̄ tiwan.

²⁷Samaa kpilib nìn cáań ataŋkpanyaan ŋin bi yíì soowamee nì ataŋkpanyaan aba mun bí dūú nákań eefoodi lɔbiki kin pāantí usaraaŋakpil bindi puee,

²⁸nì talaalub bin sɔ́fèe nì fitilab kpam nì min bi làá nīn cáa sìtī unil yil pu kí dū-u kí sú Unimbɔtee nì talaalutuukaa.

²⁹Isirayeel yab kɔkɔ, bininjab nì binimpoobi nìn dàkā tiniti ki cáań tin kɔkɔ máaǹ bí dūú tɔ̄ atuunee ki ŋá saraa ki tīī ti-Dindaan nì dipɔbil diba.

³⁰Mooyiisi bí Isirayeel yab yii: «Kpèèmaan ti-Dindaan lēē Uurii jipɔɔn Beesaleel, Uur un sá Juuda naakookunee naantiiu.

³¹U tīī-u u-Fam tikpil, ú nīn yáb̀ ki cáá iciin kí ŋmā kí tɔ̄ atuun nín bí a-ba a-ba puee kɔkɔ mmɔntiimin.

³²U cáá nlandɔkɔ kí dū sindaariya nì animbil kúti nì tasa kúti kí dūú tɔ̄ atuun.

³³U ŋūǹ kí kpítí ataŋkpee kí nákań, kí dū ndɔ kí kpítí kí dūú tɔ̄ atuun ŋí nīn bí a-ba a-ba.

³⁴Ti-Dindaan pú-u ŋŋmam ú dàkà bi nín nāantí tiwan kí dūú tɔ̄ atuun puee kii u nín tí pú Ayiisamaaki un sá Daani naakookunee jipɔɔn Ooliyaab puee.

³⁵U pú-bi dinyil bí ŋmā kí kpítí ataŋkpanyaan kí dūú ŋá tikɔkɔ, kí ŋmā kí lēē tiwan kɔkɔ naŋku tiba pu, ní kí ŋmā kí dū gulfa un máǹ gùŋgumee, nì un máǹ wèeeeyee nì un máǹ cínciŋee nì un pīiǹee kí dūú lù àá kí gbá tiwanee. U pú-bi dinyil bí ŋmā kí tɔ̄ bin kɔkɔ kíǹee tuuŋŋi.