Read Ntcham Exode 36 Bible Online

Exode 36 - Ntcham bible

Exode 36

¹«Beesaleel nì Ooliyaab nì bininjab bin kɔkɔ ti-Dindaan pú dinyil nì iciinee làá tɔ̄ circir kɔŋkooŋŋu tuuŋŋi mmɔntiim án kàl̄ deedee, kii ti-Dindaan nín tīī mara yii bí ŋá puee.»

²Mooyiisi nìn yíiń Beesaleel nì Ooliyaab nì bininjab bin kɔkɔ ti-Dindaan nìn tīī dinyil bi dū bi-ba ki tīī kí tɔ̄ ditundi nì dipɔbil dibee.

³Ní Mooyiisi dū tiwan tin kɔkɔ Isirayeel yab nìn cáań ki ŋá saraa bí dūú tɔ̄ circir kɔŋkooŋŋu tuuŋŋee ki tīī-bi. Kutaafaau kamaayee, binib nìn gbíntìi cāabìń tiwan nì dipɔbil diba.

⁴Niinee bitɔntɔnliibi bin Unimbɔti tīī iciin bi bíi tūǹ circir kɔŋkooŋŋu tuuŋŋee gbēeǹ bi-tuuŋŋi pu,

⁵ki cūtìi ká Mooyiisi ki bí-u yii: <Binib bíi cāabìń tiwan an wīikí tikpil ki jítiǹ min ti-Dindaan bālifì bí dūú tɔ̄ ditundee pu kpataaa.>

⁶Ní Mooyiisi tīī mara bi dūu nāatì binib kɔkɔ dinaapaal poon yii: <Bininjab nì binimpoobi kɔkɔ ń gbèen̄ kí taa ti cáań tiwan tin bi làá dūú tɔ̄ circir kɔŋkooŋŋu tuuŋŋee.> Niinee ní báà ŋma gbēeǹ kaa ti bíi cāabìń.

⁷Di sá yii tiwan tin bi nìn cáań bí dūú tɔ̄ atuun kɔkɔ nín sá puee nìn wīikí tikpil. An nìn wīikí ki lákatì.

⁸Bitɔntɔnliibi bin nìn cáá iciin tikpilee nìn bɔ́ntì circir kɔŋkooŋŋu ŋaabui. Bi nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee ki lùn̄ aŋaajan saalaa, ní ki lùn̄ keerubimbi ki nákáǹ ŋi-pu.

⁹Aŋaajanee fɔkɔŋŋu nìn sá meetab ubɔ kpá saalku ní ŋi-waaŋŋu sá meetab bili. Ŋi-kɔkɔ nìn ŋmà ní.

¹⁰Bi nìn dū aŋaajan aŋmoo ki ŋáĺ ki kpáfì, ní ki dū aŋmoo ŋin kíǹee mun ki ŋáĺ ki kpáfì.

¹¹Bi nìn dū ŋŋaacalimu mun máǹ gùŋgumee ki kpákám̀ aŋaajan aŋmoo ŋin bi ŋáĺ ki kpáfì mpeekaamee diŋaajandi din lúŋkèe nyɔɔgbandi, nì ŋin bi ŋáĺ ki kpáfì nliliitiimee din pééyee nyɔɔgbandi.

¹²Bi nín ŋáĺ aŋaajan aŋmoo aŋmoo ki kpáfì puee kamaa nyɔɔgbandi nìn cáá ŋŋaacalimuee imuŋku ili nì saalaa, ní ajanliitilee ŋaacalimmu nìn ŋmà.

¹³Bi nìn dū sindaariya ki mɔ́ɔ́ titábikaal imuŋku ili nì saalaa ki cúú ajanliitil ki kpáfì, ní tanti kɔkɔ dūu ŋá tiwambaantiil.

¹⁴Boonee bi nìn dū tiŋɔkuti ki lùn̄ aŋaajan saalaa nì diba ki dūu ŋá tantililiiti un làá nīn bìintí circir kɔŋkooŋŋu puee.

¹⁵Diŋaajandi kamaa fɔkɔŋŋu nìn sá meetab saalku, ní ŋwaan sá meetab bili.

¹⁶Bi nìn dū ajan aŋmoo ki ŋáĺ ki kpáfì ubaanti, ní ki dū aluu mun ki ŋáĺ ki kpáfì ubaanti.

¹⁷Bi nìn dū ŋŋaacalimu imuŋku ili nì saalaa ki kpákám̀ aŋaajan aŋmoo ŋin bi ŋáĺ ki kpáfèe diŋaajandi din lúŋkèe nyɔɔgbandi, nì aluu ŋin bi ŋáĺ ki kpáfèe din pééyee nyɔɔgbandi.

¹⁸Bi nìn dū tasa kúti ki mɔ́ɔ́ titábikaal ki dūu nákáǹ ŋŋaacalimu pu ki dūu cúú diŋaajandi din kíǹee ki táb́, ní an dūu ŋá tiwambaantiil.

¹⁹Boonee ní bi mántì tipigban ki dūu bīiǹ tanti un bīī circir kɔŋkooŋŋu puee, ní ki dū ŋgban ŋun dàfèe ki páaǹ.

²⁰Ní bi dū akasiya dɔŋu ki kpáá idɔjaati ki cóoǹ án nīn ŋúb́ circir kɔŋkooŋŋu.

²¹Idɔjaatee fɔkɔŋŋu nìn sá meetab biŋmoo, ní i-waaŋŋu sá santimeetab biŋmoo kpá imuŋku inaa.

²²Bi nìn cáká idɔ ili in cāatèe taapui ní i kɔ́ĺ tɔb ili ili. Bi nìn ŋá idɔjaatee kɔkɔ pu míǹ ní.

²³Bi nìn kpáá idɔjaati mmuŋku circir kɔŋkooŋŋu ŋgiil pú,

²⁴ní ki dū animbil kúti ki mɔ́ɔ́ titílkaal imuŋku ili. Tíǹ pu ní bi nín kpáá idɔjaati puee làá nīn tɔ́kɔ́. Bi nín kpáá idɔjaati puee kamaa nìn cáá titílkaal tili tin poon ní laakin bi cákée làá kɔ́ee.

²⁵Bi nìn gíti kpáá idɔjaati mmuŋku circir kɔŋkooŋŋu ŋgan pú.

²⁶Bi nìn dū animbil kúti ki mɔ́ɔ́ titílkaal imuŋku ili, ndɔjaati kamaa titílkaal tili.

²⁷Bi nìn kpáá idɔjaati iluu ki cóoǹ circir kɔŋkooŋŋu boon pú jandi din bí ŋwìiń jeetilaŋki púee.

²⁸Bi nìn kpáá idɔjaati ili ki cóoǹ akpin pu poon pú án nīn tíkí circir kɔŋkooŋŋu.

²⁹Idɔjaati gbanti taapui nìn dátiǹ tɔb, ama ní ki tin dūu kpáfì yilpu dibɔɔbaantiil dibɔmbipeepeekaalin. Míǹ ní idɔjaatiliitilee nìn sá tiwambaantiil ní ki nìn sá titíkiŋkaal.

³⁰Mimmee idɔjaatee nìn sá inii dee, ní i-taapu tílkaati nìn sá animbil kúti ní ki nìn sá saalku nì ubɔ, an dàkà yii ndɔjaati ŋubɔ, titílkaal tili.

³¹Bi nìn dū akasiya dɔŋu ki kpítì ikalim iŋmoo ki cúú idɔjaati in bi kpááyee circir kɔŋkooŋŋu jandi diba.

³²Bi nìn kpítì ikalim iŋmoo mun ki cúú dijandi din kíǹee, ní ki kpítì iŋmoo mun ki cúú boon ŋwìiń jeetilaŋki pú.

³³Ŋkalim ŋun nìn bí kansikinee nìn jítì idɔjaati in bi kpááyee kansikin nì kansikin ní, kí yòon̄ circir kɔŋkooŋŋu kílilaŋki kí tin cáá kátí.

³⁴Bi nìn dū sindaariya ki nyūntì idɔjaati in bi kpááyee nì ikalimee pu, ní ki dū sindaariya ki mɔ́ɔ́ mbɔmbiyaamu mun poon ní bi dū ikalimee ki bɔ́ee.

³⁵Bi nìn dū gulfab bin máǹ gùŋgumee nì bi máǹ wèeee nì bi máǹ cínciŋee nì gulfab bin bí fálfal ki dàfèe ki lùn̄ ŋŋaasakaŋkaa, ki lùn̄ keerubimbi ki nákáǹ ŋŋaabuee pu.

³⁶Bi nìn dū-ŋu ki sākaǹ akasiya dɔjaai inaa in bi dū sindaariya ki nyūntì sindaariya babikaati túuńee. Bi nìn dū animbil kúti ki mɔ́ɔ́ titílkaal tinaa ki dūu tíĺ taapu.

³⁷Bi nìn dū gulfab bin bí fálfal ki dàfèe, nì bin máǹ gùŋgumee nì bin máǹ cínciŋee nì bin máǹ wèeeeyee ki lùn̄ ŋŋaasakaŋkaa ŋubɔ mun, usatalul nyáantì-ŋu ní bi dūu sākaǹ circir kɔŋkooŋŋu punyɔkɔki nyɔkɔpu.

³⁸Bi nìn kpítì akasiya dɔjaatii iŋmoo, ki dū sindaariya ki nyūntì-i ki dūu cóoǹ, ní ki dū titábikaal tin bi dū sindaariya ki mɔ́ɔ́yee ki bá, ní ki dū tasa kúti ki mɔ́ɔ́ titílkaal tiŋmoo ki tíĺ idɔjaatee taapu. Idɔjaati gbanti pu ní bi nìn dū ŋŋaasakaŋkaayee ki sākaǹ.