Read Ntcham Exode 38 Bible Online

Exode 38 - Ntcham bible

Exode 38

¹Boonee ní u dū akasiya dɔŋu ki kpáá saraawɔkaa faŋŋu ŋun jaŋŋi naatil ŋmèe. Dijandi diba nìn cáá meetab bili nì dijandi, ní ŋu-fɔkɔŋŋu yilpu nìn sá meeta ubɔ nì dijandi.

²Ŋu-jaŋŋi naatil kpiŋŋi puee, u nìn kpítì ki lēē iyin an jɔ́m̀, i nì nsaraafan sá tiwambaantiil mmɔm, ní u dū tasa kúti ki nyūntì.

³U nìn dū tasa kúti ki mɔ́ɔ́ tin kɔkɔ bi làá nīn cáa tūǹ nsaraafan pu tundee. An dàkà yii asambil ŋin poon bi làá nīn fà ŋkpam min bi wùn̄ee fantam ki ŋáańee nì peelab nì asambil ŋin poon bi làá nīn ŋáań fatiku ki cáa yàantée, nì njiimu mun cáá anyinee nì nsambiyaamu mun poon bi tùutī talaaluee.

⁴U nìn dū tasa kúti ki mɔ́ɔ́ kilàaŋ́ŋi ní ki ŋá ki-jaŋŋi naatil pu abɔmbil, ní ki dūu nákáǹ nsaraafan taapu ki māntìi tú ní an jɔ́mìń ki dāa ŋmāntì ŋu-kansikin.

⁵U nìn mɔ́ɔ́ abɔmbil anaa ki dūu bá tasa kúti làaŋ́kee kpiŋŋi naatil pu kí ŋmā kí dū ikpandɔ kí bɔ̄ poon.

⁶U nìn dū akasiya dɔŋu ki kpítì ikpandɔ, ki dū tasa kúti ki nyūntì-i.

⁷Ní ki dū ikpandɔee ki bɔ́ abɔmbil ŋin bí nsaraafan jaŋŋi puee poon bí ŋmā kí nīn yòontí-ŋu. Bi nìn dū idɔ ki kpáá nsaraafan ní ŋu-poon dɔ̄ fám tiba kpá poon.

⁸U nìn dū tasa kúti ki mɔ́ɔ́ kusampeeu nì kun pu ku tɔ́kɔ́ee. Bi nìn dū binimpoobi bin nìn tūǹ ditundi circir kɔŋkooŋŋu punyɔkɔki nyɔkɔpuee gitiŋi ní ki túń an tuuŋŋi.

⁹Míǹ boonee ní u dū gulfa un dàfèe ki lùn̄ satab ki dūu bàkā ŋgan pú, ŋfɔkɔn nìn sá meetab imuŋku ili nì saalaa ní.

¹⁰U nìn dū mbɔmbilɔ̀kɔkaamu nì tibakaal tin bi dū animbil kúti ki mɔ́ɔ́yee ki cúú satabee ki dūu sākaǹ tasa kúti ki mɔ́ɔ́ an bí kii idɔjaatee mmuŋku. Idɔjaatee nìn cáá titílkaal mmuŋku tin bi dū tasa kúti ki mɔ́ɔ́yee.

¹¹U nìn ŋá míǹ mbaantiim ŋgiil pú jandi mun. Niin mun nìn cáá satab meetab imuŋku ili nì saalaa ki sàkā idɔ mmuŋku in tílkaati sá tasa kútee, nì in pu animbil kúti bɔmbilɔkɔkaamu nì ti-bakaati bée.

¹²Ŋwìiń jeetilaŋki watil muee, satab fɔkɔŋŋu nìn sá meetab mmuŋku nì biŋmoo, ki nìn sàkā idɔjaati in tɔ́kɔ́ titílkaal saalaa mun puee ní. Idɔjaati bɔmbilɔkɔkaamu nì i-bákaati nìn sá animbil kúti ní.

¹³Circir kɔŋkooŋŋu cindi ŋwaan pu dijandi din bí ŋwìiń nyalaŋki púee mun nìn cáá meetab mmuŋku nì biŋmoo ní.

¹⁴Ajan liitil pu satab fɔkɔŋŋu nìn sá meetab biluli nì dijandi, nì idɔjaati ita nì i-taapu tílkaati tita.

¹⁶Gulfab bin dàfèe ní bi nìn dūu lùn̄ satab ki sākaǹ ki māntìi tú circir kɔŋkooŋŋu cindi.

¹⁷Tasa kúti ní bi nìn dūu mɔ́ɔ́ idɔjaati tílkaati, ní ki dū animbil kúti ki mɔ́ɔ́ mbɔmbilɔ̀kɔkaamu nì tibakaal, ní ki mɔ́ɔ́ tikúti ki cíkiǹ idɔjaati yilpu. Bi nìn dū animbil kúti bɔmbilɔkɔkaamu ní ki cúú idɔjaati kɔkɔ ki kpáfì.

¹⁸Biwanluliibi nìn dū gulfa un dàfì ki máǹ gùŋgumee, nì un máǹ cínciŋee, nì un máǹ wèeeeyee ní ki lùn̄ circir kɔŋkooŋŋu cindi punyɔkɔki ŋaasakaŋkaaŋu. Ŋu-púuŋŋu nìn sá meetab saalaa ní ŋfɔkɔn sá meetab bili nì dijandi kii dicindi satab nín nìn bí puee.

¹⁹I nìn sàkā tasa kúti dɔjaatii inaa in tɔ́kɔ́ tasa kúti tílkaati tinaa mun puee ní. Tibakaal nìn sá animbil kúti ní bi dū animbil kúti ki nyūntì idɔjaatee yilpu nì mbɔmbilɔ̀kɔkaamuee.

²⁰Circir kɔŋkooŋŋu kpakpaaŋi nì dicindi naabakaku kpakpaaŋi kɔkɔ nìn sá tasa kúti ní.

²¹Bi nín nìn dū tiwan tin ki cóoǹ circir kɔŋkooŋŋu ŋun poon bi làá dū Dipoondi marab kí ŋée nín nyáń puee sèé. Mooyiisi nìn yāntì Leefii yab di túń ditundi gbanti. Bi-kpiliu di nìn sá usaraaŋakpil Aarɔn jipɔɔn Itamaar.

²²Kuur un sá Juuda naakookunee naantiiu Uur jipɔɔn Beesaleel di nìn túń atuun ŋin kɔkɔ ti-Dindaan nìn tīī Mooyiisi mara yii ú tɔ̄ee deedee.

²³Ayiisamaaki un sá Daani naakookunee jipɔɔn Ooliyaab di nìn tútuǹ-u. U nìn sá ukpiŋkpiiti ní ki nìn ŋūǹ ki lèekī tiwan naŋku tiba pu, ki nìn ŋūǹ kí dū gulfa un máǹ gùŋgumee nì un máǹ cínciŋee nì un máǹ wèeeeyee nì gulfapiin kí dūú lù sata àá kí dūú gbá tiwan pu.

²⁴Sindaariya un kɔkɔ Isirayeel yab nìn cáań bí dūú tɔ̄ circir kɔŋkooŋŋu tuuŋŋi kɔkɔee nìn nyáń kiiloobi alaataa anii nì bita kpá imuŋku inaa nì graambi alaataa ata, ki nóó nì circir kɔŋkooŋŋu nimbiliŋ ŋmàntitam.

²⁵Isirayeel yab bin bi nìn kàan̄ee nín nìn cáań animbil kúti bi ŋmāntì an nyáń puee sá kiiloobi kutukub bita nì saalku nì bili nì graambi alaataa aluli nì imuŋku ili nì saalaa, ki nóó nì circir kɔŋkooŋŋu nimbiliŋ ŋmàntitam.

²⁶An dàkà yii Isirayeel yab bininjab kutukub alaataa aluu nì bita nì bininjab alaataa aŋmoo nì imuŋku ili nì saalaa bin bi nìn kàan̄ kí yòon̄ abin mmuŋku kí nīn cáa cée, unil kamaa yil pu sá graambi biŋmoo dee.

²⁷Bitɔntɔnliibi nìn dū animbil kúti kiiloobi kutukub bita ní ki mɔ́ɔ́ circir kɔŋkooŋŋu dɔjaatii tílkaati dilaataal, nì poon ŋaasakaŋkaaŋu dɔjaatii tílkaati. Mimmee titílkaal kamaa nìn fōō kiiloobi mmuŋku nì saalaa dee.

²⁸Ní kiiloobi saalku nì bili nì graambi alaataa aluli nì mmuŋku nì saalaa bin kíǹee, bi nìn dūu mɔ́ɔ́ tibakaal nì tin bi mɔ́ɔ́ ki cíkiǹ idɔjaa yilpuee nì mbɔmbilɔ̀kɔkaamu mun bi dūu cúú idɔjaati ki kpáfèe.

²⁹Isirayeel yab nín nìn cáań tasa kúti tiŋyee kɔkɔ nìn kpáfì kiiloobi kutukub bili nì dilaataal nì mmuŋku nì binaa.

³⁰Bitɔntɔnliibi nìn dūu mɔ́ɔ́ circir kɔŋkooŋŋu punyɔkɔki dɔjaatii taapu tílkaati nì tasa kúti saraafaŋŋu nì ŋu-tasa kúti làaŋ́ki, nì tiwan tin kɔkɔ bi cáa tūǹ ŋu-pu ditundee,

³¹nì circir kɔŋkooŋŋu cindi dɔjaatii taapu tílkaati kɔkɔ, nì di-punyɔkɔki dɔjaatii taapu tílkaati nì ŋu-kpakpaaŋi nì circir kɔŋkooŋŋu nì dicindi naabakaku kpakpaaŋi.