Read Ntcham Exode 40 Bible Online

Exode 40 - Ntcham bible

Exode 40

¹Ti-Dindaan bí Mooyiisi yii:

²«Uŋmapeepeekaa wimpeekaaŋu dalee, á dū tanti un poon dipoondi taŋkpapilinti kēe kí cóoń.

³Á dū dakaa un poon Dipoondi marab kēe kí yóoń ŋŋaapìtikaa boon án nīn lìkī bí taa nín̄ wāĺ.

⁴Á cáań teebil un pu bi làá nīn pāantí kpɔnɔb m-nimbiinee kpɔnɔb ń nīn pá. Á cáań fitilab tɔ́kɔŋkaati ní kí tūū fitilab.

⁵Á dū sindaariya saraafaŋŋu ŋun pu bi tùutī talaalubee kí yóoń dakaa un poon Dipoondi marab kēe nyɔkɔpu, ní kí dū ŋŋaasakaŋkaa kí sàkan̄ circir kɔŋkooŋŋu punyɔkɔki pu.

⁶Á dū saraawɔkaa faŋŋu kí yóoń circir kɔŋkooŋŋu punyɔkɔki nyɔkɔpu.

⁷Á dū kusampeeu kí yóoń circir kɔŋkooŋŋu nì nsaraafan kansikin, ní kí lúń nnyim kí gbéeǹ.

⁸Á dū iŋaabu in bi dū gulfab ki lùn̄ee kí màntīí gíb́ circir kɔŋkooŋŋu cindi, ní kí dū ŋŋaasakaŋkaa kí sàkan̄ kipunyɔkɔpu.

⁹«Á dū ŋkpam min bi cáa sìtī unil yil pu kí dū-u kí sú-mee kí sìtī circir kɔŋkooŋŋu nì tin kɔkɔ bí poonee pu. Míǹ ní a làá ŋá ní kí dū ŋu nì ŋu-wanti kɔkɔ kí sú-mi ní tí kpántí circir.

¹⁰Á dū ŋkpamee kí sìtī nsaraafan nì tin kɔkɔ bi cáa tūǹ ŋu-pu ditundee, mimmee a dū-ŋu ki sú-mi dee, ní ŋú kpántí circir.

¹¹Ŋkpamee ní á tí dūú sìtī kusampeeu nì kun pu ku tɔ́kɔ́ee pu ní kú kpántí circir.

¹²Á cáań Aarɔn nì u-jipɔmbi kí yóoń dikpafindi tantiu punyɔkɔki nyɔkɔpu, ní kí yàntī bí fàl̀ kí kpántí circir.

¹³Boonee á dū circir wampeeŋkaati kí pèen̄ Aarɔn, ní kí dū ŋkpam kí sìtī u-yil pu kí dū-u kí sú-mi ú nīn tūǹ man tundi.

¹⁴Á yàntī u-jipɔmbi ń sútiń kí pìl̄-si, ní á dū poon bɔkutifɔkɔŋ kí pèen̄-bi.

¹⁵Á dū ŋkpam kí sìtī bi-yiliŋ pu kii a nín ŋá bi-baa puee, kí dū-bi kí sú-mi bí nīn sá bisaraaŋaliibi ki tūǹ man saraaŋatundi. Ŋkpam min a sītì bi-yiliŋ pu ki dū-bi ki sú-mee làá yàntī bí kpántí man saraaŋaliibi kí nīn pée cáa cá jaanjaan.»

¹⁶Mooyiisi túń atuun kɔkɔ an kāl̀ deedee kii ti-Dindaan nín tīī-u mara ú ŋá puee.

¹⁷Isirayeel yab nín nyáń kuyuŋun Eejipiti tiŋkinee, an tú dibindi uŋmapeepeekaa wimpeekaaŋu dal ní bi cóoǹ circir kɔŋkooŋŋu.

¹⁸Mooyiisi nìn dū circir kɔŋkooŋŋu ki cóoǹ. U nìn dū titílkaal ki tíĺ ní ki dū tifukuŋkaal ki fúuń ní ki dū ikalim ki cúú ní ki dū idɔjaati ki cóoǹ.

¹⁹U nìn kpátì tanti ŋaabui ki bīiǹ, ní ki dū iŋaabiiŋkaa ki páaǹ, kii ti-Dindaan nín nìn tīī-u mara puee.

²⁰Mooyiisi nìn dū titaŋkpapilindi tin pu bi ŋmàn̄ marab saalaayee ki tākaǹ dakaayee poon, ní ki dū dakaa kpandɔi ki bɔ́ dakaayee bɔmbiliŋin, ní ki dū u-bìil ki púkuǹ.

²¹U nìn cáá dakaayee ki kɔ́ǹ ki yóoǹ circir kɔŋkooŋŋun, ní ki dū ŋŋaasakaŋkaa ki pītì bí taa nín̄ wāĺ dakaayee, kii ti-Dindaan nín nìn tīī-u mara puee.

²²U nìn cáá teebil un pu bi pāantí kpɔnɔb ti-Dindaan nimbiinee ki kɔ́ǹ ki yóoǹ circir kɔŋkooŋŋun ŋgan pú, ŋŋaapìtikaa nyɔkɔpu pú.

²³U nìn dū kpɔnɔb bin bi pāantí ti-Dindaan nimbiinee ki páaǹ teebilee pu, kii ti-Dindaan nín nìn tīī-u mara puee.

²⁴U nìn cáá fitilab tɔ́kɔŋkaati ki kɔ́ǹ ki yóoǹ circir kɔŋkooŋŋun, ŋgiil pú teebil nyɔkɔpu.

²⁵U nìn tūū fitilab ti-Dindaan nimbiin, kii ti-Dindaan nín nìn tīī-u mara puee.

²⁶U nìn cáá sindaariya saraafaŋŋu ki kɔ́ǹ ki yóoǹ circir kɔŋkooŋŋun, ŋŋaapìtikaa nyɔkɔpu.

²⁷U nìn tūū talaalub ŋu-pu, kii ti-Dindaan nín nìn tīī-u mara puee.

²⁸U nìn dū ŋŋaasakaŋkaa ki sākaǹ circir kɔŋkooŋŋu punyɔkɔpu.

²⁹U nìn dū nsaraafan ki yóoǹ circir kɔŋkooŋŋu punyɔkɔpu, ní ki ŋá saraawɔkaa nì tijin saraau ŋu-pu, kii ti-Dindaan nín nìn tīī-u mara puee.

³⁰U nìn dū kusampeeu ki yóoǹ circir kɔŋkooŋŋu nì nsaraafan kansikin, ní ki lúń nnyim ki gbéeǹ bí nīn jòotī ki fíntí.

³¹Nnyim gbanti ní Mooyiisi nì Aarɔn nì u-jipɔmbi nìn jòotī ki fíntí bi-ŋalii nì bi-taaŋi.

³²Ŋyunti kamaa bi yaa làá kɔ́ circir kɔŋkooŋŋun kí sútí kí pìl̄ nsaraafanee, see bí fíntí míǹ, kii ti-Dindaan nín nìn tīī Mooyiisi mara puee.

³³Mooyiisi nìn dū iŋaabu in bi lùn̄ee ki sākaǹ ki māntìi gíb́ circir kɔŋkooŋŋu cindi nì nsaraafan, ní ki dū ŋŋaasakaŋkaa ki sākaǹ circir kɔŋkooŋŋu cindi punyɔkɔpu. Míǹ ní Mooyiisi nìn túń circir kɔŋkooŋŋu tuuŋŋi kɔkɔ ki dóò.

³⁴Niinee ní ditagbandi dɔ́miń ki bīiǹ circir kɔŋkooŋŋu pu, ní Unimbɔti nyooti kɔ́ ki gbí ŋu-poon[117].

³⁵Mooyiisi kaa nìn ŋūǹ kí kɔ́ circir kɔŋkooŋŋun, di sá yii ti-Dindaan nyooti nìn gbí ŋu-poon.

³⁶Kí yòon̄ ŋyunti gbantee, ditagbandee yaa nìn yíkìi dāntì circir kɔŋkooŋŋu yilpuee, ní Isirayeel yab ń yīkì dinaapaal din pu bi nìn bée kí nìkī bi-saŋkindi.

³⁷Ama ditagbandee yaa kaa nìn yíkìi dāntèe, bi nìn kā míǹ ní ki cí daliŋkin di làá yīkì kí dàntēe.

³⁸Ti-Dindaan tagbandee nìn bīī circir kɔŋkooŋŋu pu ŋwiimpu, ama ní kunyeeuee an sá ŋŋmi ní Isirayeel yab kɔkɔ wāĺ. An nìn pée bí míǹ ní bi cōom̀ bi-saŋkindi kɔkɔ.