Read Ntcham Exode 5 Bible Online

Exode 5 - Ntcham bible

Exode 5

¹Míǹ boonee ní Mooyiisi nì Aarɔn cūtì Faaroo cee, ní ki bí-u yii: «Ti-Dindaan Isirayeel yab Nimbɔtiu bí yii: <Yàntī m-nibul ń cù kuteeu pu kí jī jiŋaal kí tīī-mi tinyool.>»

²Ní Faaroo kíí-bi yii: «Ŋma di sá ni-Dindaan ní ḿ pīlifì tin u sòoǹee kí yàntī Isirayeel yab ń nīn cá ní? Maa nyí-u kaa làá yàntī Isirayeel yab ń nyā.»

³Ní Mooyiisi nì Aarɔn bí yii: «Eebru yab Nimbɔtiu lēē u-ba ki dàkā-ti. Míǹ puee pɔ̄-ti nsan tí còom̀ iwiin ita kuteeu pu kí cùú ŋá saraabi kí tīī ti-Dindaan ti-Nimbɔtiu. An yaa kaa ŋá míǹ, u ŋūǹ kí yàntī bìlbil kúm ń dāá kpɔ̀-ti, àá tí kpú kujaaun».

⁴Ní Eejipiti yab bɔtiu bí-bi yii: «Mooyiisi nì Aarɔn, ba pu ní ni bí ki sàal̄ ni-yab bí taa ti tɔ̄ ditundi ní? Cùú nīn tūm̀maan ni-tundi.»

⁵Ní Faaroo nìkī ki lī yii: «Kɔŋkɔnnee binibee būtì kitiŋ nee puee ní naa ti là bí tɔ̄ bi-tuuŋŋaa!»

⁶Yaadal wiiŋŋu ní Faaroo tīī Eejipiti kàliŋkpilib nì Isirayeel yab tɔntɔŋkpilib mara nee yii:

⁷«Ní taa ti tīī Isirayeel yab timool bí ŋmàlim̀ titan kí mā brikisib kii ni nín kpààa ŋáań puee. Bí nīn kíǹ ki cá bi-ba ki nyàabìń timool.

⁸Ama ní yàntī bí nīn māā brikisib bin nyɔkɔm bi pée kpààa māāyee, ní taa bàtī. Bi sá biwutijoodambi ní, an pu ní bi bí ki lì yii: <Ti là kí cùú ŋá saraabi kí tīī ti-Nimbɔtiu.>

⁹Bi yaa dū atuun ki lúuń-bee, baa ti kāntí mpaan kí dàkafì bi-nyimɔmbɔti pu.»

¹⁰Bikàliŋkpilibee nì bitɔntɔŋkpilibee nyáń Faaroo ceeyee ní ki cūtì ki bí Isirayeel yab yii: «Faaroo bí yii bí taa ti tīī-ni timool.

¹¹Nimbi ni-ba ń cù laakin ni làá kánní-tèe kí nyàabìń, ama taa làá bàtī brikisib bin ni kpààa māāyee nyɔkɔm pu.»

¹²Niinee ní Isirayeel yab yàl̄ ki kɔ́ Eejipiti tiŋki kɔkɔn ki kùl̀ timool tin bi làá dūú ŋmàlim̀ kí mā brikisibee.

¹³Ní Eejipiti yab tɔntɔŋkpilibee kā bi-pu ki lì yii: «Ní pée mā bi nín nìn cāabìń-ni timool ni māā brikisib bin nyɔkɔmee deedee, ubɔ ń taa fɔ́tí!»

¹⁴Faaroo kàliŋkpilib nìn gbáà ki kpáaǹ Isirayeel yab tɔntɔŋkpilib bin bi lēē bí nīn kpèé bi-nabiyaamuee ki lì yii: «Ba pu ní naa ŋúń ki máń fool nì díǹ brikisib bàn̄ kii dooooyee ni nín kpààa māā puee?»

¹⁵Ní Isirayeel yab tɔntɔŋkpilib bin Eejipiti yab lēē bí nīn kpèé bi-nabiyaamuee dɔ́miń ki bíi yáliŋkí Faaroo cee ki lì yii: «Ti-baa, ba pu ní a bí ki sàantí timbi a-tɔntɔnliibi mimmee?

¹⁶Baa ti tìì-ti timool, ama ní ki là yii tí nīn gbíntìi māā brikisib bin nyɔkɔm ti nìn kpààa māāyee, ní ki gbáà-ti. A-yab bíi ŋáań tin kaa kítèe!»

¹⁷Ní Faaroo kíí-bi yii: «Biwutijoodambi, ni sá biwutijoodambi ní! An pu ní ni lì yii: <Ti làá cùú ŋá saraabi kí tīī ti-Dindaan.>

¹⁸Kɔŋkɔnnee, cùú nīn tūm̀maan ditundi. Baa làá ti tīī-ni timool, ama ni làá nīn gbíntìi māā brikisib bin nyɔkɔm ni nìn kpààa pée māāyee ní.»

¹⁹Isirayeel yab tɔntɔŋkpilib bin bi nìn lēē bí nīn kpèé bi-nabiyaamuee ká yii laakin bi bí nee an pɔ́ɔkiǹ-bi, kun puee bi nìn bí-bi yii: «Ní taa bàtī brikisib bin ni kpààa māā ŋwiin kamaayee nyɔkɔm pu.»

²⁰Bi nyáń Faaroo ceeyee ní ki cūtìi ká Mooyiisi nì Aarɔn, bíǹ yú ki cí-bi.

²¹Bi nìn nyáń Mooyiisi nì Aarɔn pu ki bí-bi yii: «Ti-Dindaan di wāĺ tin ni ŋá nee kí sòoǹ ni-bɔti! Ni yāntì Faaroo nì u-yab kaa ti là bi-nimbiliŋ ń wāl̀-ti. Ni ŋman dū kitàataajiki ní ki ŋá bi-ŋaan bí fōō kí kpɔ̀-ti.»

²²Niinee ní Mooyiisi fātì ti-Dindaan pú ki bí-u yii: «M-Dindaan, ba pu ní a ŋá samaa nee tikpitil míǹ? Ba pu ní a nín túnní man dee?

²³Doooo m nín cūtì Faaroo cee ki sòon̄ a-yil puee, úǹ bí ki sàantí Isirayeel yab ní, ní sii kaa pée ŋá tiba kí fīī a-nibul.»