Read Ntcham Exode 6 Bible Online

Exode 6 - Ntcham bible

Exode 6

¹Ti-Dindaan bí Mooyiisi yii: «Kɔŋkɔnnee a làá ká m nín làá ŋá Faaroo puee. M-pɔŋkpaaŋŋu ŋun m làá dàkà-uee pu ní u làá yàntī m-nibul ń nyā. Mpɔŋkpaan gbanti di làá yàntī ú jà-ni kí nyāntí u-tiŋkin!»

²Unimbɔti gíti bí Mooyiisi yii: «Man di sá NI-DINDAAN.

³M nìn nyántì m-ba ki dàkā Abraam nì Isaaki nì Jaakɔb yii man di sá UNIMBƆTI MPƆŊKƆDAAN. Ama maa nìn lēē ki dàkā-bi yii bi yíì-mi <NI-DINDAAN[11]>.

⁴M nìn pōoǹ-bi dipoondi yii m làá dū Kanaan tiŋki kin bi nìn kóò ki sá binicambee kí tīī-bi.

⁵M gbìl̄ Eejipiti yab nín tīī Isirayeel yab atuun ŋin pɔ̄ɔ̄ bi bí ki tūǹ ki yáliŋkée pu, ní maa súntì dipoondi din m nìn pōoǹ-bee pu.

⁶An puee, tùkù Isirayeel yab yii: <Man di sá ni-Dindaan. M làá nyāntí-ni Eejipiti yab tuuŋŋi ŋin pɔ̄ɔ̄yee poon ní kí fīī-ni kí nyāntí ni-yuŋkun. M làá dū m-pɔŋkpaaŋŋu nì m-tuŋkpaaŋŋi kí fīī-ni kí líí.

⁷M làá dū-ni ki ŋá m-nibul ní kí nīn sá ni-Nimbɔtiu ní ní béé yii man ni-Dindaan ni-Nimbɔtiu di nyántì-ni Eejipiti yab tuuŋŋi ŋin pɔ̄ɔ̄yee poon.

⁸M làá cáá-ni kí cùnnì kitiŋ kin poon m nìn pūtì yii m làá tīī Abraam nì Isaaki nì Jaakɔbee. Nimbi ní m làá dū kitiŋ gbanti kí tīī ní nīn kíǹ ki yì. Man ni-Dindaan di lī míǹ.>»

⁹Mooyiisi cáań an bɔtee ki lī Isirayeel yab cee, ama kuyuŋu gìŋ́ŋi ŋin poon bi bée kaa yāntì bi pílifiǹ-u.

¹⁰Ní ti-Dindaan fātìi gíti sòon̄ nì Mooyiisi yii:

¹¹«Cù kí tùkù Faaroo, Eejipiti bɔtiu yii ú yàntī Isirayeel yab ń nyā u-tiŋkin.»

¹²Ní Mooyiisi kíí-u yii: «Isirayeel yab gba kaa pílifiǹ-mi, Faaroo di dāa nín pílifíǹ man un kaa ŋūǹ kí sòoǹ mmɔntiimin naaa?»

¹³Niinee ní ti-Dindaan tùkū Mooyiisi nì Aarɔn bi nín làá sòoǹ Isirayeel yab nì Faaroo, Eejipiti yab bɔtiu pu ní Isirayeel yab ń nyā Eejipiti tiŋkinee.

¹⁴Isirayeel yab naakɔti kpilib yiŋŋi sèé. Jaakɔb jipɔŋkpiliu Rubeen jipɔmbi di sá Anɔki nì Palu nì Eetisirɔn nì Kaarmii. Rubeen naakookun yab naanjab yiŋŋi dee.

¹⁵Simeeyɔn jipɔmbi di sá Jeemuyeel nì Jamiini nì Oodi nì Jaakin nì Sookaar nì Saayuul, ukanaannimpu jipɔɔn. Simeeyɔn naakookun yab naanjab yiŋŋi dee.

¹⁶Leefii jipɔmbi ki nóó nì bi-naantitɔntɔkɔŋ yiŋŋi di sá Geersɔn nì Keeyaati nì Meerarii. Leefii ŋá abin dilaataal nì mmuŋku nì saalaa nì aluli ní ki nín kpíì.

¹⁷Geersɔn jipɔmbi di sá Liibinii nì Simeeyii. Báà ŋma sá u-maaliŋun yab naanja.

¹⁸Keeyaati jipɔmbi di sá Amiiraam nì Yitiseeyaar nì Eebrɔn nì Usiyeel. Keeyaati ŋá abin dilaataal nì mmuŋku nì saalaa nì ata ní ki nín kpíì.

¹⁹Meerarii jipɔmbi di sá Maalii nì Musii. Leefii dicaŋŋi yab nì bi-naantitɔntɔkɔŋ yiŋŋi dee.

²⁰Amiiraam cáá u-baa niisal Jookeebeedi ní u màl̄-u Aarɔn nì Mooyiisi. Amiiraam ŋá abin dilaataal nì mmuŋku nì saalaa nì aluli ní ki nín kpíì.

²¹Yitiseeyaar jipɔmbi yiŋŋi di sá Kooree nì Neefeegi nì Sikirii.

²²Usiyeel jipɔmbi yiŋŋi di sá Miisayeel nì Eeliisafan nì Sitirii.

²³Aarɔn cáá Eelseeba, Amiinadaab bisal, Naasɔn niisal. U nìn màl̄-u Nadaab nì Abiyuu nì Eeleeyasaar nì Itamaar.

²⁴Kooree jipɔmbi yiŋŋi di sá Asiir nì Eelkana nì Abiyasafi. Kɔree dicaŋku yab naanjab yiŋŋi dee.

²⁵Aarɔn jipɔɔn Eeleeyasaar cáá Putiyeel bisalib ubɔ, ní u màl̄-u Fineeyaasi. Leefii naakookun yab kpilib yiŋŋi dee.

²⁶Mooyiisi nì Aarɔn gbanti ní ti-Dindaan bí yii: «Ní nyāntímaan Isirayeel yab Eejipiti tiŋkin, bí nīn nóó tɔb akiti akiti kii bijanjaliibee.»

²⁷Mooyiisi nì Aarɔn di nìn tí cūtìi sòon̄ nì Faaroo Eejipiti yab bɔtiu yii ú yàntī Isirayeel yab ń nyā u-tiŋkin.

²⁸Ti-Dindaan nín nìn sòon̄ nì Mooyiisi Eejipiti tiŋkinee,

²⁹u nìn bí-u yii: «Man di sá ni-Dindaan. Á tùkù Faaroo Eejipiti yab bɔtiu tin kɔkɔ m sòon̄ nì see.»

³⁰Ní Mooyiisi kíí-u yii: «Man kaa ŋūǹ kí sòoǹ mmɔntiim, mana ní Faaroo làá ŋmā kí pīlifiǹ-mi?»