Read Ntcham Exode 7 Bible Online

Exode 7 - Ntcham bible

Exode 7

¹Ní ti-Dindaan bí Mooyiisi yii: «Pīlifì, m làá dū-si kí kpántí kii Unimbɔtee ní Faaroo cee, ní a-maan Aarɔn ń nīn sá a-bɔnaatiliu.

²Sii di làá tùkù Aarɔn tin kɔkɔ m sòon̄ nì see ní úǹ ń dūú nàatī Faaroo, án nín làá ŋá pu ú yàntī Isirayeel yab ń nyā u-tiŋkinee.

³Ŋyunti gbantee ní man ḿ yàntī Faaroo pɔbil ń pɔ̄ɔkì ní ḿ bùtī m-daanti nì m-maamaacib Eejipiti tiŋkin[12].

⁴Ama Faaroo kaa làá pīlifiǹ-ni. M làá dàkà Eejipiti yab m-pɔŋŋu, kí dáaĺ bi-tafal ŋkpitim pu, ní kí nyāntí m-nibul Isirayeel yab Eejipiti tiŋkin bí nīn nóó tɔb akiti akiti kii bijanjaliibee.

⁵M yaa láa dàkā-bi m-pɔŋŋu míǹ ki nyántì Isirayeel yab bi-kansikinee, niin ní bi dāa béetí yii man di sá ni-Dindaan.»

⁶Ní Mooyiisi nì Aarɔn ŋá kii ti-Dindaan nín tīī-bi mara bí ŋá puee deedee.

⁷Ŋyunti ŋun bi nìn cūtìi sòon̄ nì Faarooyee, Mooyiisi nìn cáá abin imuŋku inaa, ní Aarɔn cáá abin imuŋku inaa nì abin ata.

⁸Ti-Dindaan bí Mooyiisi nì Aarɔn yii:

⁹«Faaroo yaa bālifì-ni yii ní ŋá maamaaci ubɔee, á tùkù Aarɔn yii ú yòon̄ u-kpandɔŋu kí lúkú kitiŋ Faaroo nimbiin, ŋu làá kpántí ukoobu.»

¹⁰Niinee Mooyiisi nì Aarɔn nín cá Faaroo cee, ní ki ŋá kii ti-Dindaan nín bí yii bí ŋá puee. Aarɔn dū u-kpandɔŋu ki lúkú kitiŋ Faaroo nì u-kpambaliŋ nimbiin, ní ŋu kpántì ukoobu.

¹¹Ní Faaroo yíiń bibɔɔbi nì bikpaŋkpantiibi bin bí Eejipitee, ní bi mun dū bi-kpaŋkpantiiku ki ŋá míǹ mbaantiim.

¹²Báà ŋma dū u-kpandɔŋu ki lúkú ní ŋu kpántì ukoobu. Ama ní Aarɔn kpandɔŋu dū bíǹ kpandɔi ki nátì.

¹³Nì míǹ kɔkɔee, Faaroo pɔbil gbíntìi pɔ̄ɔ̄ waa gbìl̄ ki tīiǹ Mooyiisi nì Aarɔn kii ti-Dindaan nín pée lī puee.

¹⁴Ní ti-Dindaan bí Mooyiisi yii: «Faaroo pɔbil pɔ̄ɔ̄, waa là kí yàntī Isirayeel yab ń búntí.

¹⁵Fool kutaafaauee, á fu kíntí Faaroo ŋyunti ŋun ní u cá dimɔɔgbandee. Ní cīití-u Niil mɔɔl caŋin. Á fu nín̄ ŋúb́ ŋkpandɔ ŋun a dūu kpántì ukoobuee a-ŋaan.

¹⁶Á fu tùkū-u yii: <Ti-Dindaan Eebru yab Nimbɔtiu di túnní-mi ḿ dāá tùkù-si yii á yàntī u-nibul ń cù kuteeun kí jāam̀-u, ama ní ki dāa sāā díǹ nee, aa pílifiǹ-u.

¹⁷M làá dū m-kpandɔŋu nee kí fáá Niil nyim ní mí kpántí fatiku. Ti-Dindaan bí yii ḿ ŋá míǹ ní á béé yii úǹ di sá ti-Dindaan[13].

¹⁸Ijɔm in kɔkɔ bí Niil mɔɔlinee làá kpú, ní nnyim ń bīil̀ ní Eejipiti yab kaa làá ti ŋmā kí nyɔ̀ nnyim gbanti.>»

¹⁹Ti-Dindaan gíti bí Mooyiisi yii: «Tùkù Aarɔn yii ú yòon̄ u-kpandɔŋu kí tàntī Eejipiti yab nyiŋfii nì bi-buŋyi nì bi-nyimbɔbiliŋ kɔkɔ pu, án nín làá ŋá pu Eejipiti nyiŋfii kɔkɔ ń kpántí fatiku ki kpáaǹ bi-booŋŋi nì bi-lɔnti poonee.»

²⁰Mooyiisi nì Aarɔn ŋá kii ti-Dindaan nín bí yii bí ŋá puee. Aarɔn yōoǹ u-kpandɔŋu ki fáá nnyim min dɔ̄ Niil mɔɔlinee Faaroo nì u-kpambaliŋ nimbiin, ní ibun kɔkɔ nyim kpántì fatiku.

²¹Ní ijɔm in kɔkɔ bí dimɔɔlinee kpíì, ní dimɔɔl nyim núukì. Ní Eejipiti yab kaa ti ŋūǹ kí nyɔ̀-mì. Niinee Eejipiti tiŋki kɔkɔ dūu kpántì fatiku.

²²Ama Eejipiti yab kpaŋkpantiibi mun dū bi-kpaŋkpantiiku ki ŋá míǹ mbaantiim. Faaroo pɔbil pɔ́ɔkì waa pílifì Mooyiisi nì Aarɔn, kii ti-Dindaan nín pée lī puee.

²³Faaroo fātìi nín gítí u-dumpu kaa fātìi tɔ́ tin jítèe poon tiba.

²⁴Ní Eejipiti yab kíĺ ki bíi gbì anyimbɔbil Niil mɔɔl caŋin ki nyàab̀ nnyim kí nyɔ̀, kun puee baa nìn gíti ŋūǹ kí nyɔ̀ dimɔɔl nyim.

²⁵Ti-Dindaan nìn yāntì Niil mɔɔl kpántì fatiku míǹ ki tin sāā iwiin iluli.

²⁶Míǹ boonee[14] ní ti-Dindaan bí Mooyiisi yii: «Cùú tùkù Faaroo yii: <Man ni-Dindaan bí yii á yàntī m-nibul ń nyā kí cùú jāam̀-mi.

²⁷A yaa yíì yii bí taa cùee, m làá yàntī kpaabi ń dāá kpátí kí gbí a-tiŋki kɔkɔ poon.

²⁸Kpaabi làá gbí Niil mɔɔl poon, ní kí nyānní kí dāan̄ kí kɔ́ a-dumpu nì a-diikun nì a-dooŋu pu, kí kɔ́ a-kpambaliŋ dumpui nì a-tiŋki kɔkɔ nib dumpui, ní kí kɔ́ bi-faŋyi nì bi-sambiliŋ poon.

²⁹Kpaabee làá jɔ̄m̀ kí tɔ́kɔń sii nì a-tiŋki kɔkɔ nib nì a-kpambaliŋ kɔkɔ pu.>»