Read Ntcham Exode 8 Bible Online

Exode 8 - Ntcham bible

Exode 8

¹Ti-Dindaan[15] bí Mooyiisi yii: «Tùkù Aarɔn yii ú tàntī u-kpandɔŋu kí túĺ ikpin nì ibun nì anyimbɔbil ní kpaabi ń nyā kí gbí Eejipiti tiŋki kɔkɔ.»

²Ní Aarɔn tāntì u-kpandɔŋu ibun kɔkɔ pu, ní kpaabi nyáń ki gbí Eejipiti tiŋki kɔkɔ.

³Ní Eejipiti yab kpaŋkpantiibi mun ŋá bi-kpaŋkpantiiku ki nyántì kpaabi kí gbéeǹ Eejipiti tiŋki poon kii Aarɔn nín ŋá puee.

⁴Faaroo yíiń Mooyiisi nì Aarɔn ní ki bí-bi yii: «Mèèmaan ni-Dindaan ú kúntí man nì m-nibul tiŋkin kpaabi. Boonee m làá yàntī Isirayeel yab ń nyā kí cùú ŋá saraabi kí tīī-u.»

⁵Ní Mooyiisi kíí-u yii: «Yóoń-mi ŋyunti ŋun a là ḿ dāá mèè kí tīī si nì a-kpambaliŋ nì a-nibulee, án nín làá ŋá pu ti-Dindaan ń kúntí kpaabi a-cee nì a-diiŋŋinee. Án làá pée kíń kpaabi bin kā Niil mɔɔlinee ŋmaniŋma ní.»

⁶Ní Faaroo bí yii: «Á fu mèè fool.» Ní Mooyiisi bí-u yii: «An ŋān̄, m làá fu mèè kí tīī-si ní á béé yii ti-Dindaan ti-Nimbɔtiu nì ubɔ kaa ŋmà.

⁷Kpaabi làá fu wāŋkì kí wàatī sii nì a-diiŋŋi nì a-kpambaliŋ nì a-nibul, ní án fu kíń kpaabi bin bí Niil mɔɔlinee ŋmaniŋma.»

⁸Mooyiisi nì Aarɔn nyáń Faaroo cee ní Mooyiisi mēē ti-Dindaan ú kúntí kpaabi bin u dūu dáaĺ Faaroo tafalee.

⁹Ti-Dindaan nìn ŋá Mooyiisi nín nìn mēē-u puee ní kpaabi nìn kpíì adiinni nì imɔŋki nì tisatin.

¹⁰Ní bi kóoǹ ki bíl̀ akpuku akpuku, ní kitiŋ fōō ki núukì.

¹¹Ama ŋyunti ŋun Faaroo ká yii digìńdi bíi nyìkitī u-puee ní u pɔ́ɔkì u-pɔbil kaa ŋá min Mooyiisi nì Aarɔn lēe, kii ti-Dindaan nín nìn pée tùkū-bi puee.

¹²Ti-Dindaan bí Mooyiisi yii: «Tùkù Aarɔn ú dúkutí u-kpandɔŋu kí fáá kitiŋ dikpɔŋkpɔndi ń yīkì kí kpántí inaacib kí gbí Eejipiti tiŋki kɔkɔ.»

¹³Ní bi ŋá kii ti-Dindaan nín lī puee. Aarɔn dúkutì u-ŋal ki dū ŋkpandɔ ŋun u ŋúb́ee ki fáá kitiŋ ní dikpɔŋkpɔndi yíkì ki kpántì inaacib ki bīiǹ binib nì tiwaŋkuti pu. Eejipiti tiŋki kɔkɔ poonee, dikpɔŋkpɔndi nìn kpántì inaacib ní.

¹⁴Ní Eejipiti yab kpaŋkpantiibi mun nìn mākaǹ kí dū bi-kpaŋkpantiiku kí kpántí inaacib, ama ní kaa ŋúń. Inaacib nìn mɔ̄tìi dɔ́miń ki bīiǹ binib nì tiwaŋkuti pu.

¹⁵Bikpaŋkpantiibi bí Faaroo yii: «An sá Unimbɔti pɔŋŋu di bíi tūǹ ditundi din bí nee.» Ama nì míǹ kɔkɔee, Faaroo nìn pɔ́ɔkì u-pɔbil. Waa nìn pílifiǹ Mooyiisi nì Aarɔn, kii ti-Dindaan nín nìn pée tùkū-bi puee.

¹⁶Ti-Dindaan bí Mooyiisi yii: «Fool kutaafaau pɔ̀lpɔlee, á fu péé ki kíntí Faaroo ŋyunti ŋun u yaa fu nyáń ki cá dimɔɔgbandee kí tùkù-u yii: <Ti-Dindaan bí yii á yàntī m-nibul ń búntí kí cùú jāam̀-mi.

¹⁷A yaa kaa yāntì bi búntèe, m làá yàntī ikpiŋki ń fu nyā sii nì a-kpambaliŋ nì a-tiŋki nib pu nì a-diiŋŋin. Ikpiŋki gbanti làá kpátí kí gbí Eejipiti yab diiŋŋin kí kpáaǹ kitiŋ laakin bi yúee.

¹⁸Ama yaadalee, m làá gàntī Gooseen tiŋki laakin m-nibul kóòyee. Baa làá ká ikpiŋki gbanti báà ubɔ niin, ní á béé yii man ni-Dindaan bí kitiŋ nee poon.

¹⁹Niinee m làá dāá fīī m-yab ní digàntil ń dòon̄ man nibul nì sii yal kansikin. Fool ní kudaaŋŋu gbanti làá fu ŋá.>»

²⁰Ní ti-Dindaan lafun ŋá kii u nín lī puee. U yāntì ikpiŋki dɔ́miń ki gbí Faaroo cindin nì u-kpambaliŋ diiŋŋin, ní Eejipiti tiŋki kɔkɔ dūu kpántì ikpiŋki ŋma.

²¹Niinee ní Faaroo yíiń Mooyiisi nì Aarɔn ní ki bí-bi yii: «Cùmaan kí ŋá saraabi kí tīī ni-Nimbɔtiu kitiŋ nee poon, ní taa nyā!»

²²Ní Mooyiisi kíí-u yii: «Aayee, an kaa ŋān̄ tí ŋá míǹ, kun puee saraabi bin ti làá ŋá kí tīī ti-Dindaan ti-Nimbɔtiuee sá mbusukpaan ní Eejipiti yab cee. Bi yaa ká ti bíi ŋáań an saraabee, bi làá yāŋkì-ti ataŋkpee kí kpɔ̀ ní[16]?

²³An puee ti làá nyā kí còom̀ iwiin ita kuteeu pu ní ti-Dindaan ti-Nimbɔtiu ń dàkà-ti saraabi bin an sá tí ŋá kí tīī-uee.»

²⁴Ní Faaroo bí-bi yii: «M kíí kí yàntī ní cù kuteeu pu kí ŋá saraabi kí tīī ni-Dindaan ni-Nimbɔtiu, ama ní taa nyā kí cù ndan. Ní mèèmaan ni-Nimbɔtiu kí tīī-mi.»

²⁵Mooyiisi kíí-u yii: «M yaa pée nyáń a-ceeyee, m làá mèè ti-Dindaan ní foolee ú fu kúntí ikpiŋki sii a-ba pu nì a-kpambaliŋ nì a-tiŋki nib pu. Ama sii Faaroo, á taa ti mɔ̄ntì-ti kí pìin̄ samaa nsan bí taa cù kí ŋá saraabi kí tīī ti-Dindaan.»

²⁶Mooyiisi nyáń Faaroo ceeyee ní ki mēē ti-Dindaan.

²⁷Ti-Dindaan nìn ŋá min Mooyiisi bālifèe, ki kúntì ikpiŋki Faaroo nì u-kpambaliŋ nì u-tiŋki nib cee, báà ukpiŋki kaa ti kíǹ.

²⁸Ama min bí nee muee, Faaroo fātìi tí pɔ́ɔkì u-pɔbil kaa yāntì Isirayeel nibul búntì.