Read Ntcham Job 1 Bible Online

Job 1 - Ntcham bible

Job 1

¹Uninja ubɔ nìn bí Uusi tiŋkin bi yíì-u Yoob. Baa nìn kāntí u-pu tikpitil tiba ní u-pɔbil nìn bí diba nì Unimbɔti. U nìn fàŋkí Unimbɔti ní ki nìn fàtī u-boon ki tìì ikpiti.

²U nìn cáá mbininjabiyaamu mululi nì nnimpubiyaamu muta.

³U nìn cáá ipii kutukub biluli, igutaamu kutukub bita, inajaa kutuku nì mmansalimu alaataa aŋmoo nì bitɔntɔnliibi tikpil. Ŋwìiń nyalaŋki púee, ubɔ kaa nìn cáá tigaajati ki bàn̄ Yoob.

⁴Yoob jipɔmbi kansikin ubɔ nìn ŋáań tijin u-dumpu ní u nì bin kɔkɔ kíǹee ń kpāfì kí jī. Bi nìn ŋáań míǹ ní ki kpántí ní ki nìn yíì bi-niisalib bitee, ní bí kpāfì kí jī kí nyɔ̀.

⁵Bi yaa nìn jíń jíń míǹ ki dóòyee ní Yoob ń yíiń-bi ní kí ŋá-bi circir. U nìn yíkí kutaafaau pɔ̀lpɔl ní kí ŋá saraawɔkaa u-biyaamu kɔkɔ yil pu, di sá yii u nìn lì yii: «An yaa yíì m-jipɔmbi ŋá ikpiti ki tɔ́ Unimbɔti mbusu bi-pɔbiliŋin.» Míǹ ní Yoob nìn pée ŋáań ŋyunti kamaa.

⁶Dalba, Unimbɔti tuuŋyi dɔ́miń ti-Dindaan kpafil. Sitaan, ukuŋfil mun nìn bí bi-kansikin.

⁷Ti-Dindaan nìn bālifì Sitaan yii: «La ní a nyánní ní?» Ní Sitaan kíí ti-Dindaan yii: «M cūtìi yìin̄ yìin̄ ki māntì kitiŋ pu ní.»

⁸Niinee ní ti-Dindaan bí Sitaan yii: «A ká m-tɔntɔnliu Yoobaa! Waa cáá juti kitiŋ pu. Baa kāntí u-pu tikpitil tiba ní u-pɔbil bí diba nì mi. U fàŋkí man Unimbɔti ní ki fàtī u-boon ki tìì ikpiti.»

⁹Ama ní ukuŋfil kíí-u yii: «A nyí yii an sá fám ní Yoob fàŋkí-saaa?

¹⁰Sii di kaa dū a-wundi ki bàkā u nì u-dicaŋku nì u-gaajati kɔkɔ pu kii digundeeee? A bīiǹ u-tuuŋŋi kɔkɔ pu ní ki yāntì u-waŋkuti būtì ki gbí kitiŋ kɔkɔ.

¹¹Ama a yaa là, á tàntī a-ŋal kí fōō tin kɔkɔ u cááyee kí kpèè u yaa kaa sòon̄ ki bíil̀-si[1]!»

¹²Niinee ní ti-Dindaan bí ukuŋfil yii: «Too, tin kɔkɔ u cááyee bí a-ŋaan. Ama á nīn nyíǹ a-ba kí taa gbēē úǹ u-ba.» Niinee ní ukuŋfil nyáń ti-Dindaan nimbiin ki nín cá.

¹³Dalba Yoob bisalib nì u-jipɔmbi kpáfì bi-maan ukpil cee ki bíi jīǹ ki nyù,

¹⁴ní ntuun dūu bāań Yoob cee ki bí-u yii: «Inaa bàà bíi kù tikpaal ní mmansalimu bí ki kɔ́ĺ-i ki ŋmóò timool,

¹⁵ní Seeba yab péetì-i ní ki kūū a-tɔntɔnliibi. Man baba di pée ŋmátì ní ki dɔ́miń kí tùkù-si.»

¹⁶Yoob tɔntɔnliuee nìn dáá bíi sòoǹ u-nyɔkɔ kaa láá ŋmíl̀ ní ubɔ mun dūu bāań ki bí-u yii: «Unimbɔti ŋmiŋu ŋubɔ nyánní yilpu ki wùn̄ ipii nì a-tɔntɔnliibi kɔkɔ. Man baba di pée ŋmátì ní ki dɔ́miń kí tùkù-si.»

¹⁷U nìn dáá bíi sòoǹ kaa láá ŋmíl̀ ní ubɔ mun tí bāań ki bí yii: «Kaaldee yab ŋá akiti ata ki dɔ́miń ki jéetì a-gutaamui pu ki péetì-i ní ki dū ntàataajimu ki kūū a-tɔntɔnliibi kɔkɔ. Man baba di pée ŋmátì ní m dɔ́miń kí tùkù-si.»

¹⁸U nìn dáá bíi sòoǹ kaa láá ŋmíl̀ ní ubɔ mun tí bāań ki bí yii: «A-bisalib nì a-jipɔmbi bàà bí bi-maan ukpil cee ki bíi jīǹ ki nyù

¹⁹ní kubuŋkpaaŋŋu kubɔ nyánní kuteeu pú ki yá kudii jannaatiliŋ. Kudiiyee lítì ki tàb̄ binipɔmbee ki kūū-bi. Man baba di pée ŋmátì ní m dɔ́miń kí tùkù-si.»

²⁰Niinee Yoob nyīī yíkì ki cúú u-bɔkutikpaandi ki dáaĺ ki cátì ní ki kōol̀ u-yil diyibaakpandi ní ki tātìi gbāaǹ u-yigbeel tūū kitiŋ

²¹ki lī yii: «M nyáń m-na poon dicancaŋgbeel ní, dicancaŋgbeel ní m làá tí fàtīí gítí. Ti-Dindaan di tīī, ti-Dindaan di cúú ki fōō. Ti-Dindaan yindi ń ká tinyool!»

²²Agìń gbanti kɔkɔ poonee, Yoob kaa nìn ŋá ikpiti. Waa nìn sòon̄ ki bíil̀ Unimbɔti.