Read Ntcham Job 10 Bible Online

Job 10 - Ntcham bible

Job 10

¹M gīī nì m-ba, an puee maa làá ŋmā kí cúú m-ba kí taa yāliŋkì. M-poon kaam cɔ́tì ní m làá sòoǹ kí tùkù-u.

²M làá tùkù Unimbɔti yii: taa kpɔ̀ m-bɔti, tùkù-mi kun ní m ŋá ní a wòoǹ-mee.

³An mɔ̄ǹ-si á nīn sàantí-mi, kí fàtī a-boon kí tīī a-wannaaŋkaati, ama ní kí yàntī án bútí binikpitibaaa?

⁴Nisaal nimbiliŋ ní a cáaa? Unil nín kpèé ki wāĺ tiwan puee, míǹ ní si mun kpèé ki wāĺ-tàaa?

⁵A-maŋfal wiiŋyi kaa náaǹ kii unilee níii? A-biŋŋi jītí malaa malaa kii unil yaŋee níii?

⁶Ba pu ní a nyàab̀ kí béé m-yìntitam ní? Ba pu ní a fíkití ki nyàab̀ kí ká m-kpitii ní?

⁷Sii a-ba pée nyí yii maa ŋá tiba ní kaa tí ŋūǹ kí ŋmátí kí nyā a-ŋaan[9].

⁸Sii a-ba ŋalii ní a dūu máń-mi ki náań-mi. Íǹ di māntìi tú-mi, ní a là kí nàan̄-mi!

⁹Téetí yii sii di máń-mi kii bi nín māā ditansambil puee, ama ní a là kí nà-mi dúsi dusi ḿ kpántí ntam.

¹⁰Sii di náań-mi ki tākaǹ m-na poon kii bi nín bàtī nnaabiim kí ŋá disambilin mí kìl̄ puee.

¹¹A dū anancal nì ŋwuŋgban ki bīiǹ-mi, ní ki ŋá-mi akpab nì igiin ki túkuǹ tɔb pu.

¹²Míǹ boonee ní a ŋá-mi tiŋan ki tīī-mi dimaŋfal, ní ki wúń m-pu tiŋan.

¹³A dū abɔɔn bɔti tiba ki bál̀ a-pɔbilin. M nyí kun ní a dàkafēe:

¹⁴A là kí ká-mi m bíi ŋáań ikpiti ní, ní kaa là kí dū m-yìntitam kí pɔ̄-mi.

¹⁵M yaa lafun ŋá ikpitee, mbusu dɔ̄ ki cí-mi! Báà m yaa kaa ŋá tibaaa, maa máaǹ kí yáatí m-yil. Icoo nì falaa yāntì m gbí kii m nyùn̄ ndaamee.

¹⁶M yaa gántì m-yilee, a jì-mi kii gbikintee ní, a ŋáań maamaacib kí gbéeǹ m-weeŋyi pu.

¹⁷A jáà nì mi kaa gbèentí, diŋuul din a gíí m-puee mɔ̀tīí gbēentí, ní a-janjaliibi dòoń akiti akiti kí jáǹ-mi.

¹⁸Ba pu ní a nyántìń-mi m-na poon ní? Bi yaa bàà màl̄-mi kaa yōoǹee, ubɔ kaa bàà kāntí-mi.

¹⁹M bàà pée nyēē m-na poonee, m bàà cá dikaakulin ní dicilpu, m bàà bí kii unil un kaa pée kāl̀ kitiŋ pu ki kée ní.

²⁰M-wiiŋyi kaa ti kíǹ ki náaǹ. Gbèen̄ kí taa ti jáǹ-mi, kí yàntī-mi soooo ḿ pée ká dipɔɔpindi fiii iwiin in kíǹ-mi ḿ dūú kàl̄ nee poon,

²¹kí wàatī ḿ búntí dibɔmbɔndi nì ŋkúm booku tiŋki kin poon bi cá kaa gítińee.

²²Niinee, dibɔmbɔŋkpaandi nì fikil fikil di bí, ní ŋwalifi bí niin kii dibɔmbɔndee.