Read Ntcham Job 11 Bible Online

Job 11 - Ntcham bible

Job 11

¹Niinee ní unaamaja Soofaar fōō dinyɔɔbundi ní ki bí Yoob yii:

²Unil un sòoǹ tikpil kii a nín sòoǹ pu nee kaa kāntí ubɔ ń kíí-uaaa? A yaa nyí isoonee di dàkà yii a cáá ibaamɔnaaa?

³A nín cáá kinyɔkɔee di làá yàntī binib ń kpántí bimuumbaaa? A làá bèel̀ binib ubɔ ń taa wòoǹ-saaa?

⁴A lī gba yii: «Tin m sòoǹee sá ibaamɔn, Unimbɔti kaa làá ká m-pu tiba kí sòoǹ.»

⁵M bàà pée là yii Unimbɔti ń wàan̄ kinyɔkɔ kí sòoǹ kí kíí-si u-ba!

⁶U bàà làá lēē dinyil bɔɔŋŋi kí dàkà-si. Abɔɔn gbanti jítiǹ unil ciiŋyi ń ŋmā kí gbìl̄ taapu. A bàà làá gbìl̄ niin yii Unimbɔti súntì a-kpitii dijandi pu.

⁷Ŋma ŋūǹ kí béé kí cíĺ Unimbɔti? Ŋma di ŋūǹ kí béé Unimbɔti Mpɔŋkɔdaan nín sá ukpaan puee gbeennyɔkɔ?

⁸Unimbɔti ciiŋyi nyóò kii yilpu nín dátiǹ kitiŋ puee ní, ba ní a ŋūǹ kí ŋá? I nyóò ki jítiǹ ditaŋkpiilin. Tilati ní a ŋūǹ kí béé?

⁹I wāā ki jítiǹ kitiŋ, ki wāā ki jítiǹ tiŋku.

¹⁰Unimbɔti yaa cúú dibɔkpil daan ki pīiǹ kudii, ní ki yaa yíiń udaan ibeeyiinee, ŋma di ŋūǹ kí pìin̄ nsan?

¹¹Di sá yii Unimbɔti nyí binib bin kaa bí tibanee. An kaa bàlifī ú kpèè címmm ní kí nín ká laakin ikpiti bée.

¹²Ama ugbaan kaa ŋūǹ kí kpántí uciŋfiti dalba dalba, a lì kii kumooun maŋki di kaa ŋūǹ kí kpántí kimɔŋkimaŋ puee ní.

¹³Yoob, dū a-pɔbil kí tīī Unimbɔti, ní kí yòon̄ a-ŋalii kí túĺ-u kí mèè-u.

¹⁴Ikpiti yaa táká a-ŋaliiyee, á pítí-i kí fá, kí taa yàntī tin kaa bí deedeeyee ń ká mpaan a-dumpu.

¹⁵Niinee a làá gántí a-yil kí nyā icoon, tiba kpá kí cìŋkì-si, ní aa làá fàŋkì tiba mun.

¹⁶Di sá yii a làá súntí a-nimbinaamandi pu, a làá dāá súntí kii nnyim min pùub̄ ki búntèe ní.

¹⁷A-maŋfal wiiŋyi làá wāl̀ bɔ́iii kí jītíǹ kuwiŋkaŋu pu, ní dibɔmbɔndi ń kpántí kii kutaafaauee.

¹⁸A làá dāá nīn cáá dimákal ní kaa làá fàŋkì tiba. Báà icoo boonee, a làá dāá gèeǹ nì ŋgbansɔŋfi.

¹⁹A yaa láa bíi ŋùŋfēe, ubɔ kaa làá dāá pìkil̀-si. Binib tikpil gba làá dāá nyàab̀ kí pàkà-si.

²⁰Ama binikpitib làá dāá nyàab̀ dijòońdi áli bi-nimbiliŋ ń lóoĺ. Baa làá dāá ká kibalilaŋ. Bi-mákal kɔkɔ di dāa sá ŋkúm.