Read Ntcham Job 12 Bible Online

Job 12 - Ntcham bible

Job 12

¹Niinee ní Yoob kíí yii:

²Tiŋman, ni lafun nyí tikɔkɔ! Ni nì iciin di làá kpāfì kí kpú.

³Ama ma mun cáá dinyil kii nimbee ní, naa jítiǹ-mi. Tin ni sòon̄ee, báà ŋma pée nyí-tì ní.

⁴M kūuntí ki yíì Unimbɔti ki máká yii u làá kíí-mi, ama ní m-bɔɔbi ŋúb́-mi ki bèel̄. Man un máká Unimbɔti pu, baa kāntí m-pu tibee, bi ŋúb́-mi ki bèel̄.

⁵Binib bin bí mmɔnnee dàkafī yii: «Tí kpèè bin bí agìńnee fám.» Bi sòoǹ nì bin cá kí lítée tibɔbaantiil.

⁶Tiba kaa páb̀ digaŋgam dambi bi-dumpui, bin tákà Unimbɔtee bí ŋgbansɔŋfin ní. Bi-pɔŋŋu di sá bi-nimbɔtiu.

⁷Bàlifì tiwaŋkuti, tì làá dàkà-si, bàlifì inoon in ŋàaǹee, i làá tùkù-si.

⁸Sòoǹ nì kitiŋ, kì làá dàkà-si, tiŋkun jɔmii làá māafì-si tibɔti tikpil.

⁹Tiwaŋkuti nee kɔkɔ kansikinee, kulɔkɔ di kaa nyí yii ti-Dindaan di ŋá tin bí nee kɔkɔ?

¹⁰Tin kɔkɔ cáá kufoouee maŋfal nì unil kamaa fooku kā u-ŋaan ní.

¹¹Bi lì yii: «Ditafal tundi di sá dí nīn pílifí tibɔti, a lì kii dilimbil mun nín dákafí tijin kí béé ti-mɔŋŋu puee.

¹²Binicikitikaabi cee ní a kāntí iciin, ní utikpil di cáá dinyil.»

¹³Ama Unimbɔti di yì iciin nì mpɔn, úǹ di tí yì isaŋki nì dinyil.

¹⁴Kun Unimbɔti yaa gbáń ki wīīyee, ubɔ kaa ŋūǹ kí fàtīí mā, un u yaa cúú ki tɔ́ sarkee, ubɔ kaa ŋūǹ kí nyāntí-u.

¹⁵U yaa cúú utaayee, ŋweel nyáń dee. U yaa tí cúú utaa ki pīitèe, kitiŋ mun bíil̀ dee.

¹⁶Unimbɔti cáá mpɔn nì iciin. Úǹ di yì un kíiĺ u-ba nì un kíiĺ bin kíǹee.

¹⁷U yàntī kitiŋ pu yidambi còom̄ atakulim, u kɔ̄ntí bibɔsoonliibi inaatuu.

¹⁸U fòol̄ bibɔtiibi cee bi-pɔŋŋu ní kí dū disarkabɔkutil kí pèen̄-bi.

¹⁹U yàntī bisaraaŋaliibi còom̄ atakulim, ní ki lábití abee dambi ki cìb̀.

²⁰U pìintí bin nyí isoonee nyɔmmu, ní ki fòol̄ bitikpilib cee bi-nyil.

²¹U kɔ̄ntí duulinya nikpaambi icoo, ní ki gbákaĺ bipɔndambi bi-pɔŋŋu.

²²U nyāntí abɔɔn ŋin bí dibɔmbɔŋkpaandi poonee ki pāantí mpaampiin pu, ní ki bìitī tin bí ŋkúm booŋŋunee.

²³U yàntī atimbun ŋáań akpaan, ní boonee kí fàtīí nàan̄-ŋi. U yàntī ŋí wíiǹ ní ú cúú ŋi-nib kí cùnnì kuyuŋu.

²⁴U yàntī kitiŋ pu kpootiliibi yiliŋ lábití, ní ki yàntī bi tú ki yìiǹ kuteeu kun poon nsan kpée[10].

²⁵Bi táfí dibɔmbɔndin laakin ŋwalifi kpée, ní ki còom̄ ki kpìntī kii bi gbí ndaamee.