Read Ntcham Job 15 Bible Online

Job 15 - Ntcham bible

Job 15

¹Niinee ní Eeliifaasi fōō dinyɔɔbundi ki lī yii:

²Uciŋfiti un bí kii siiyee kaa kíikí tibɔti kí tɔ̄ kutaa, waa sòoǹ tibɔti an kaa cáá taapu.

³A cáá anyɔɔbun ŋin kaa cáá dikílee ki mɔ́tí a-ba pu, a pée sòoǹ yii an nín sá á sòoǹee ní.

⁴Áli gba a bíi bíiĺ dinimbɔtinool, a bíi nàantí ŋwimmeem Unimbɔti nimbiin dee.

⁵A bíi sòoǹ míǹ kun puee a sá unikpiti, ní ki sòoǹ kii mili mili dambee.

⁶A-nyɔkɔ poon nyɔɔbuŋŋi di bíi kù a-bɔti, an kaa sá man. Tin kɔkɔ a sòon̄ee fātìi bíi kɔ́kɔĺ-si.

⁷A dàkafī yii sii di sá unipeepeekaa un bi màl̄ kitiŋ pueeee? Mimmee bi màl̄-si ki wāatì ní ki nín náań ŋgbantamuɔɔɔ?

⁸A nyí Unimbɔti nín nìn bɔ́ntì tin dibalin kí ŋéeee? Sii baba di cáá iciinaaa?

⁹Ba ní sii baasii nyí ní timbi kaa nyí ní? Ba ní sii gbìl̀ taapu ní timbi kaa gbìl̀ ní?

¹⁰Kpèè utikpil un yúntèe bí ti-kansikin, unil un kpíǹ a-baayee!

¹¹A dàkafī yii aa nyàab̀ Unimbɔti ŋmeendi din u dī ti-nyɔɔbummɔɔŋŋi pu ki tìì-si nee níii?

¹²Ba pu ní an yòontí-si míǹ? Ba pu ní a dàab̀-ti míǹ?

¹³Ba pu ní a díkí Unimbɔti pu míǹ? Ba pu ní a yāntì anyɔɔbun nee juti nyáń a-nyɔkɔn?

¹⁴Unil sá ba ní ki gà u-bindi yii u bí circir? Ninsaal sá ŋma ní ki dàkafī yii u bí deedee?

¹⁵Unimbɔti yaa kaa máká úǹ u-ba tuuŋyi pu, ní kutagbɔŋu yaa kaa bí circir u-ceeyee,

¹⁶kin ataa aŋa pu ní unil un cáá titantan kaa bí tiban, unil un ŋáań ikpiti kii bi nín nyù nnyim pu nee pu ní u làá nīn máká?

¹⁷Pīlifì, m làá dàkà-si tiba, m làá māafì-si tin m kée.

¹⁸M làá māafì-si biciŋfitiibi dàkal, didàkal din ní bi fōō bi-naanjab ceeyee.

¹⁹Unimbɔti nìn dū kitiŋ ki tīī bíǹ baba ní, báà unicaan kaa nìn kɔ́ bi-pu.

²⁰«Unikpiti jīǹ falaa ní u-maŋfal wiiŋyi kɔkɔ poon, ní uwɔ́bil maŋfal wiiŋyi kaa náaǹ.

²¹Ineen in fàantée lɔ́kɔfí u-tafaliŋin. Ŋgbansɔŋfi yuntiŋu ní digaŋgam dambi lítí u-pu.

²²Waa ti cáá dimákal yii u làá ŋmā kí ŋmátí kí nyā dibɔmbɔndin. Di sá yii binib cí kí dū kitàataajiki kí kpɔ̀-u.

²³Kaasaabi di làá jī-u. U nyí tiŋan yii dibɔmbɔndi wiiŋŋu kaa ti dátiǹ-u.

²⁴Dibɔmbɔndi wiiŋŋu ŋun dòoń gbantee kɔ̄ntí-u dinyoondi, dinimbinaamandi nì ilandɔkɔ làá jēetí u-pu, kii ubɔti janjakitil nín bɔ́ntì kí kíĺ dikɔ̀ndi puee ní.»

²⁵Di sá yii u tāntì u-ŋal kí fáá Unimbɔti, u yíkì kí jáǹ Unimbɔti Mpɔŋkɔdaan.

²⁶U sáń ki cá u-yil tīī kí jáǹ Unimbɔti, digbampɔɔl din gbìfèe wúń u-pu.

²⁷U gbīfiǹ ŋkpam dūu bīiǹ u-nimbiin ní u-wunti bí gbàlgbal.

²⁸Ntimu mun bi kpéelikèe poon ní u kóò, adiin ŋin poon baa ti kóòyee poon, di sá yii ŋi nìn bíi lítí ní.

²⁹Unil gbantee kaa ŋūǹ kí kpántí ugaaja dalba dalba, ní u-gaajati kaa làá yúntí. U kpá kí jī dinyandi kitiŋ pu.

³⁰Waa làá ŋmā kí ŋmátí kí nyā dibɔmbɔndin. U làá nīn bí kii busubu bun ŋŋmi wùn̄ee ní, ní Unimbɔti fooku ń yòon̄-u kí tɔ̄ kí fá ndan.

³¹Dimuuldi pu ní u máká. Ama dimuuldi kaa sá nsammɔnti, di sá yii dimuuldi ní bi làá gíiǹ kí pà-u.

³²Míǹ làá bàń-u kí wàatī ní u-maŋfal wiiŋyi ń nín kúntí, ní u dāa gíti kpá kí túkú tifaapɔn.

³³U làá nīn bí kii bufiinyisubu biliŋ yaa kaa láá bīń an nín gbátí puee ní, àá kii ɔliifi supumpukum nín gbátí puee.

³⁴Unikpiti dicaŋkun yab làá kpántí biŋmaŋŋmantiibi ní. Ŋŋmi di làá wà u nín fìkī binib wanti ki máń kudii kuŋyee.

³⁵Unil un yaa cáá ikpiti poolee màal̀ nnaabu ní. Kun ní u bɔ́ntì u-pɔbilinee làá ŋmàtiǹ úǹ u-ba ní.