Read Ntcham Job 16 Bible Online

Job 16 - Ntcham bible

Job 16

¹Niinee ní Yoob kíí yii:

²Tin a sòon̄ee, m gbìl̄ míǹ ŋfunyɔm dilaataal pu. Ni sá biŋmeenliibi bin kaa pée bí tibanee ní.

³Ni bí-mi yii: «Tin a sòoǹ an kaa cáá taapu nee làá kúntí badal dee?» àá: «Ŋma di páb́-si á kíí míǹ ní?»

⁴Ni yaa bàà bí mpaan ŋun pu m bí nee, m bàà làá sòoǹ kii ni nín bíi sòoǹ pu nan ní. M bàà làá bɔ́ntí anyɔɔbun ŋin kítèe kí sòoǹ ni-pu, ní kí nīn gbákafí diyil ki bèel̄-ni.

⁵M bàà làá sòoǹ kí tīī-ni kunyannyaau, ní kí sòoǹ kí taa gbèen̄ áli ni-weeŋyi ń dāá kúntí.

⁶Ama m yaa bíi sòoǹee, m-weeŋyi kaa sɔ̀ŋkī, m yaa tí ŋmíl̀aaa, an kaa tí sɔ̀ŋkī.

⁷Ibaamɔn poonee, Unimbɔti yāntì m gīī, u kúntì bin kɔkɔ nìn māntìi tú-mee.

⁸M-wunti nín dáaĺ pu ŋmìiiyee sá m-seeradaaŋwu, m nín dúntì puee kɔ́kɔĺ-mi ní ki kù m-bɔti.

⁹Unimbɔti tɔ̄ntì-mi u-ŋuul poon, u kùl̄ ki kāl̀ m-pu u-nyiŋŋi gà kàkaka. U sá m-nannanliu ní ki kpèé-mi címmm.

¹⁰Binib wàatī bi-nyɔmmu bàaa m-pu, bi fátí-mi itampa ki sìí-mi, bi kpáfí kinyɔkɔ kí jáǹ-mi.

¹¹Unimbɔti dū-mi ki líiǹ campɔntib bin kaa bí tibanee, u dū-mi ki ŋá binikpitib ŋaan.

¹²M nìn bí ŋgbansɔŋfin ní Unimbɔti dɔ́miń ki cīŋkì-mi. U tɔ́ ki kíĺ m-sil ki dū-mi ki lúkú kitiŋ, ní ki màkā-mi kii ukpanee.

¹³U-piiŋyi ŋàaǹ an kɔkɔ pu fìrrr fìrrr. U yá-mi an kɔ́ ki sāā m-ceebiliŋ an kaa cúú-u isaa, u yāntì m-kaami cɔ́tì ki dɔ̄ ki pùub̀ kitiŋ.

¹⁴U wúliń m-pu kii ujanjalee, u yá-mi ki tīī-mi tiweendi.

¹⁵Kpɔsata ŋma ní m kíǹ ki pèentí, ní m dū m-nimbiin ki múĺ ntamin.

¹⁶M súń áli m-nimbiliŋ mántì cínciŋ, ní m-niŋgbunti dūu nyīŋfì maa ti kpáàa wāĺ tiŋan.

¹⁷Ama ma mun kaa ŋá tipɔmbɔti jaanjaan. M pée mèé Unimbɔti nì dipɔbil diba ní.

¹⁸Kitiŋ, taa bìin̄ m-fatikuu pu, yàntī bí nīn pée gbìl̀ m-kuŋkuuntii pu[12].

¹⁹Di sá yii m cáá kɔŋkɔnnee seeradaan ubɔ yilpu, tiŋman, m cáá ubɔ yilpu niin u mɔ́tí m-pu.

²⁰M-bɔɔbi bíi bèel̄-mi, ama Unimbɔti ní m sūǹ ki kpèé.

²¹M-seeradaaŋwu ń nīn sá un làá pàtī man nì Unimbɔtee, kii unil nín mɔ́tí u-juti pu puee.

²²M-maŋfal wiiŋyi kaa ti kíǹ ki náaǹ, m tākaǹ nsan ŋun pu unil yaa nóó waa ti gítińee.