Read Ntcham Job 17 Bible Online

Job 17 - Ntcham bible

Job 17

¹Maa ti cáá ŋfam, ní m-maŋfal wiiŋyi kaa ti náaǹ. Ntaŋkpiifal di kíǹ ki dɔ̄ ki cí-mi.

²Bibeeliliibi māntìi tú-mi, bi nín jáà nì mi puee yāntì maa ti ŋūǹ kí gèeǹ.

³Unimbɔti, pà m-pɔndi kí fīī-mi kí líí, di sá yii ŋma di gíti bí ki làá ŋá míǹ kí tīī-mi?

⁴Ibaamɔn puee, a pīiǹ m-bɔɔbi ciiŋyi pu, taa yàntī bí jī m-pu dinyandi.

⁵Bi náań nì un yíiń u-bɔɔbi bí jī tijin, ní u-biyaamu dɔ̄ ŋkùmee ní.

⁶M kpántì nlan ní binib cáa gà ki lāā. M sá unil un nimbiin bi tíiĺ ki làbitēe ní.

⁷Kunimbaau yāntì maa ti wāĺ tiŋan, m-ŋalii nì m-taaŋi kpántì kii kujiliŋuee ní.

⁸Bibulcinnib yaa ká-mee, bi bàkatī ní. Maanyiibab fòol̄ bikpitib pu mbum ní.

⁹Bi lì yii: «Deedeedaan ń nīn pɔ̄ɔntí, bin ŋalii bí circiree ń mɔ̀tīí ká mpɔn!»

¹⁰Nimbi m-bɔɔbee, dāam̄maan, ni-kɔkɔ ń gítiń! Ama maa ká uciŋfiti báà ubɔ ni-kansikin!

¹¹M-maŋfal wiiŋyi dóò, tin m bɔ́ntèe kɔkɔ nì m-mákal kɔkɔ tɔ́ nnyimin.

¹²M-bɔɔbi bíi lì yii kunyeeu làá fōō ŋwiimpu paaŋŋu, ní kutaa tóob́ kí wúntí. Kaa nyí yii kunyeeu di bíi móotí.

¹³M gíti máká ba pu? An yaa kaa sá ŋkɔŋkoon pu ditaŋkpiilin, an yaa kaa sá ḿ bíĺ m-kampeeku dibɔmbɔndin!

¹⁴M tùkū m-kaakul yii: «Sii di sá m-baa», ní ki tùkū dikɔtuul yii: «Sii di sá m-na nì m-niisal!»

¹⁵M-mákal gíti bí la? Ubɔ ká m-naam laŋkaaa?

¹⁶M-mákal nì m-naam ń táá-mi tí nīn sìntī ditaŋkpiilin, ti-liitil lítì ntamin.