Read Ntcham Job 18 Bible Online

Job 18 - Ntcham bible

Job 18

¹Usuwaja Biilidaadi fōō dinyɔɔbundi ní ki lī yii:

²«Kí cáá sāā ŋyunti ŋulɔŋu ní a làá ŋmīĺ ní? Dàkafì kí wàatī ní tí nín sòoǹ nì si.

³Ba pu ní a cáá-ti ki yíì tiwaŋkuti ní? Mimmee a dàkafī yii ti sá bigbaambi deeyaa!

⁴«Diŋuul din a gííyee di bíi tìì-si tiweendi. Mimmee a dàkafī yii sii puee, kitiŋ ń kpántí kuteeu, àá ditaŋkpal ń kpántí di-paaŋŋu ní?

⁵Ukpiti walifiŋu di kúù, ní u-faŋŋu poon ŋmiŋu ń gbèen̄ kaa ti fòol̄.

⁶U-diiku poon walifiŋu làá kpántí dibɔmbɔndi, ní fitila un sàkā u-yil púee ń kpú.

⁷«Dooooyee u nìn còom̄ ní kìbkib, kɔŋkɔnnee u kíǹ ki còom̄ ní yóooo, ní tin u bɔ́ntì kí ŋée làá yàntī ú lítí.

⁸U cōom̀ ki cūtìi kɔ́ kulaaŋŋun, kulaaŋŋu sɔ̀kɔ̄ sɔ̀kɔ̄ u-taaŋi.

⁹Kutaliŋŋu làá sàl̄ u-tagbindi, bi píĺ u-saŋŋu pu ŋŋmii án sàl̄-u.

¹⁰«Ŋŋmii ŋun làá sàl̄-uee bál̀ kitiŋin, kutaliŋŋu dɔ̄ nsanni ki cí-u.

¹¹Ijaan kɔkɔ puee, dinyoondi jì ki bīī u-boon ki tà ki kíbití-u.

¹²Úǹ un nìn pɔ̄ɔ̄yee, ŋkùm cúú-u kɔŋkɔnnee, falaa dɔ̄ ki kɔ́ĺ-u.

¹³Falaa gbanti bíi ŋmóò u-wuŋgbaŋŋu, ní ŋkúm làá ŋmɔ́ kí bīil̀ u-taaŋi nì u-ŋalii kɔkɔ.

¹⁴«Bi làá dāá nyāntí-u u-kɔŋkooŋŋu kansikin laakin u bí ŋgbansɔŋfinee, kí dàtī-u kí cùnnì ditaŋkpiil bɔtiu cee.

¹⁵Ubɔ ŋūǹ kí kɔ́ u-diikun, di sá yii waa ti yì-ku, ní kí dū farwata kí yàaǹ tin kɔkɔ u cááyee pu.

¹⁶U làá nīn bí kii busubu bun kpíìyee ní, bu-nyaaŋyi kūń taapu ní bu-faati fáaḿ yilpu.

¹⁷Binib làá súntí u-pu kitiŋee pu, baa ti pútí u-yindi laaba.

¹⁸Bi làá nyāntí-u ŋwalifin kí cáá tɔ̄ dibɔmbɔndin, ní kí jà-u kitiŋ pu laakin binib kóòyee.

¹⁹U-nibul kansikinee, waa cáá kibiki kaa cáá naantiiu, ubɔ kaa bí u-dicaŋkun ki ŋmátì.

²⁰Tin làá bàń-uee làá kɔ́ǹ ŋwìiń jeetilaŋki pú yab tiwool, án làá kɔ́ǹ ŋwìiń nyalaŋki pú yab tifaandi.

²¹Kun di bàń unikpiti nì u-dicaŋku puee dee. Doo di nìn sá mpaan ŋun pu baa nìn nyí Unimbɔtee.»