Read Ntcham Job 19 Bible Online

Job 19 - Ntcham bible

Job 19

¹Yoob fōō dinyɔɔbundi ní ki bí yii:

²«Ni làá nīn sàantí-mi yéè kí cáá sāā ŋyunti ŋulɔŋu ní? Kí cáá sāā ŋyunti ŋulɔŋu ní ni làá dū ni-nyɔɔbuŋŋi kí nàan̄-mi ní?

³Ŋfunyɔm saalaa sɔ̀ ni nín bí ki sìí-mee. Ni nín bí ki sàantí-mi pu nee kaa cáá-ni icoooo?

⁴«Báà an yaa sá ibaamɔn yii m yīntì, man nì m-bɔti deeyaa!

⁵Báà ni yaa dàkafī yii ni jítiǹ-mi, ní m-falaau dàkà yii m sá unikpitaaa,

⁶ní béémaan yii Unimbɔti di yì m-bɔti ní ki yāntì m jéetì u-laaŋkun.

⁷Báà m yaa bíi gbáà ibiil yii bí fīī-maaa, ubɔ kaa làá kíí-mi, m yaa fáá ibiil yii bí jòoń-maaa, ubɔ kaa làá dāan̄ kí pɔ̀-mi.

⁸Unimbɔti bàkā m-saŋŋu pu ḿ taa ŋmā kí jītí, u dū dibɔmbɔndi ki tɔ́ m-saŋŋu pu.

⁹U gbákal̀ m-nyooti kɔkɔ, u fōō tin nìn sá kii kibeefuulii ki cíkí m-yil puee.

¹⁰«U pée nāaǹ-mi ijaan kɔkɔ pu ní m làá kpú nín̄ nee, u cúú m-mákal ki lēē kii bi nín fùkù busubu puee.

¹¹U-ŋuul fòol̄ m-pu ní lìblib, m kpántì u-nannanliu ní.

¹²U-janjakitil kpáfì dicilpu ki dòoń ki náaǹ, bi nyàab̄ nsan ki bāań-mi ki māntìi tú m-diiku kí jáǹ-mi.

¹³Unimbɔti kākatì m-nabiyaamu ki wāatì-mi. Bin nìn nyí-mee kíǹ ki sáń-mi ní.

¹⁴M-nabiyaamu kiŋkiŋ wáŋkì, m-bɔɔbi súntì m-pu.

¹⁵M kpántì kii unicaanee ní ki tīī bin nìn kɔ́ m-puee nì m-tɔntɔnliibi, bi ŋáań-mi kii unil un baa nyée ní.

¹⁶M yaa yíiń m-tɔntɔnliu, waa kíikí, báà m yaa gbāam̀-u.

¹⁷«M-fooku nín núù puee, m kíǹ ki cáá m-nimpuu titantan, m-nabiyaamu mun m nì bi pēē nee núutì-mi.

¹⁸Ki kpáaǹ gba campɔntib kpèé-mi fám. M yaa kíĺ ki bíi sòoǹee, ní bi bèel̄-mi.

¹⁹M-bɔɔbi bimɔntiibi nimbil kaa ti là kí wāl̀-mi, ní bin m nìn néeńee fātì bi-boon ki tīī-mi.

²⁰M-gbaŋŋu di pée kíǹ ki bīī m-kpabiŋ pu, m ŋman pée kpíì ní.

²¹Nimbi m-bɔɔbi, sɔ̄maan m-saai, sɔ̄maan m-saai, di sá yii Unimbɔti ŋal di fáá-mi!

²²Ba pu ní ni mun bíi sàantí-mi kii Unimbɔtee ní? Naa sāaǹ-mi ki gīīii?

²³«M bàà là yii bí ŋmà m-nyɔɔbuŋŋi nee kí síiń, bí ŋmà-ŋi kí ŋá kugbɔŋun.

²⁴M bàà là yii bí dū kigaai kí cáká m-nyɔɔbuŋŋi nee kí nákań ditaŋkpal pu, ŋí nīn bí ki cá jaanjaan!

²⁵Mamee, m nyí m-mɔtiliu nín bí dimaŋfalinee, úǹ di làá sòoǹ kí pɔ̀-mi kitiŋ nee pu.

²⁶Bi yaa láa bíil̀ m-wuŋgbaŋŋu nee ki dóòyee, mama m-ba làá dāá wāl̀ Unimbɔti.

²⁷Mama m-ba làá dāá wāl̀-u nì m-nimbibuliŋ. Mama m-ba di làá dāá wāl̀-u kaa sá ubɔ. Ŋyunti gbanti ń bàń malaa, di sá yii an júkufí-mi ní.

²⁸«Ni yaa bālifì ni-ba yii: <Mana ní ti làá ŋmā kí sàaǹ-u ní kí ká nnaakpal kí yíiń-u tibuul?>

²⁹Ní fàŋkìmaan kitàataajiki ni-ba pu, di sá yii ni nín kā m-pu puee máaǹ ŋkúm ní. Ní béémaan yii ibɔsoon bí.»