Read Ntcham Job 2 Bible Online

Job 2 - Ntcham bible

Job 2

¹Dalba muee, Unimbɔti tuuŋyi tí dɔ́miń ti-Dindaan kpafil. Sitaan, ukuŋfil mun nìn tí bí bi-kansikin kí dū u-ba kí dàkà.

²Ti-Dindaan nìn bālifì-u yii: «La ní a nyánní ní?» Ní Sitaan kíí ti-Dindaan yii: «M cūtìi yìin̄ yìin̄ ki māntì kitiŋ pu ní.»

³Niinee ní ti-Dindaan bí Sitaan yii: «A ká m-tɔntɔnliu Yoobaa! Waa cáá juti kitiŋ pu. Baa kāntí u-pu tikpitil tiba ní u-pɔbil bí diba nì mi. U fàŋkí man Unimbɔti ní ki fàtī u-boon ki tìì ikpiti. U gbíntìi yú nì mi nì dipɔbil diba, min kamaa a yāntì m nāaǹ-u fámee.»

⁴Ama ní Sitaan kíí ti-Dindaan yii: «Iween iba kaa wù ki bàn̄ an yaa kā sii a-ba puee! Unil kíikí kí dū tin kɔkɔ u cááyee kí tīī kí ŋmā kí fīī u-ba.

⁵Míǹ puee dū igbaŋween kí tɔ̄ u-pu kí kpèè u yaa kaa sòon̄ ki bíil̀-si!»

⁶Niinee ní ti-Dindaan bí ukuŋfilee yii: «Too, u bí a-ŋaan, ama á taa nín gbēē u-maŋfal ní.»

⁷Sitaan nyáń ti-Dindaan nimbiinee ní ki nín cá, ní ki cūtìi dū ibunsoon ki tɔ́ Yoob pu kí kíĺ u-taaŋi taapu kí cáá sāā u-yil kansikin.

⁸Niinee ní Yoob tātìi kāl̀ ŋfantamin ní ki nyàab̄ abɔkati ki kɔ́tí u-ba.

⁹Ní u-nimpuu bí-u yii: «A gbíntìi dáá máká Unimbɔti puɔɔɔ? Pùtì sòoǹ kí bīil̀ Unimbɔti kí kpú!»

¹⁰Ama ní Yoob kíí-u yii: «A sòoǹ kii unimpu un yil kaa bí kudiinee. Ti fòol̄ nnaam min Unimbɔti tìì-tee, kin ba pu ní tí yíí kí taa fōō nnaabu ŋun u tīī-ti nee?» Tin bí nee kɔkɔ poonee, Yoob kaa nìn wāaǹ u-nyɔkɔ ki sòon̄ ki yīntiǹ Unimbɔti.

¹¹Yoob bɔɔbi bita gbìl̄ agìń ŋin jéetì u-puee ní báà ŋma yíkìń u-tiŋkin ki ŋá kinyɔɔbaantii kí cùú sɔ̄ kí tūtuǹ Yoob kí ŋméeǹ-u. Bíǹ di sá uteemanja Eeliifaasi nì usuwaja Biilidaadi nì unaamaja Soofaar.

¹²Bi nín wálìń-u ndanee, baa ti béè-u. Niinee ní bi kíĺ ki bíi sūǹ mpɔn. Bi nìn cúú tiwan tin bi pēēyee ki cátì ní ki nìn dū ŋfantam ki pùkū bi-yiliŋ kí dàkà bi-nimbaaku.

¹³Bi ŋá míǹ ki dóòyee ní ki dɔ́miń ki kāl̀ kitiŋ ki kɔ́ĺ Yoob ki ŋá iwiin iluli ŋwiimpu nì kunyeeu. Báà ubɔ kaa nìn wāaǹ kinyɔkɔ ki sòon̄ nì u, di sá yii bi nìn ká yii u bíi jīǹ falaa tikpil.