Read Ntcham Job 20 Bible Online

Job 20 - Ntcham bible

Job 20

¹Unaamaja Soofaar fōō dinyɔɔbundi ní ki bí Yoob yii:

²M-landɔkɔi bíi téekí-mi ḿ kíí-si, di sá yii an bíi lùkutī m-ni.

³Tin a sòon̄ee sá disiibil ní ki tīī-mi, ama m-nyil bíi lɔ́kɔfí-mi tin m làá dūú kíí-see.

⁴Mimmee aa nyí yii doooo cannaaku, ŋyunti ŋun ní Unimbɔti náań unil ki kāaǹ kitiŋ nee puee,

⁵binikpitib nyandi kaa cá ndan, ní bi-pɔɔpindi mun kaa súŋkáaa?

⁶Báà udaan yaa fɔ̀kɔ̀ ki tūū kutaa, báà u-yil yaa tùutī atagban,

⁷u làá dāá kúntí kii úǹ u-ba bintee ní. Bi nìn nyí-uee làá dāá bàlifì yii: «U bí la?»

⁸U làá dāá wāŋkì kii kudamintiiuee ní, baa làá dāá gíti ká-u. U làá dāá wāŋkì kii kunyeeu leedakalee ní[13].

⁹Bi nìn kpààa kāntí kijapaai gbanti, ama baa ti làá ká-u. Laakin u nìn kóòyee, baa ti làá ká-u niin.

¹⁰U-biyaamu làá gíiǹ tin u nìn fìkī biwɔfib ceeyee kí tīī-bi, úǹ u-ba di làá gíiǹ u-gaajati kí tīī.

¹¹U nìn cáá mpɔn kii unaacimpɔɔnee ní, ama u nì u-pɔŋŋu gbanti di làá kpāfì kí dòon̄ ntamin.

¹²Ikpiti mɔ̄ u-nyɔkɔn ní cɔ́ncɔŋ, u cáá u-limbil ní ki bìintí i-pu.

¹³U móotí-i ní kaa gbèentí, u pée kpùkū-i ní an mɔ̄ǹ-u.

¹⁴Ama tijin tin u jíńee làá sūū u-poon ní kí kpántí ukoobu looti niin.

¹⁵Tigaajati tin u nìn dūu náĺee, u làá wùliŋkì-tì, Unimbɔti làá yàntī ú nyāntí tin nìn kā u-poonee.

¹⁶Tin u nìn móotée nìn sá ukoobu looti ní, u làá kpú kii ukoowaati di jú-uee.

¹⁷Waa ti làá ká mbùmbiyaamu mun poon ŋkpam pùub̀ee, ibun in poon tisiil nì nnaabiim kpam pùub̀ee.

¹⁸Kun u bìn̄ ki kée, u làá dūú tīī kaa làá ká kí dáká. U nín bāntì kí ká ipaati iŋyee, waa làá ká kí jī.

¹⁹Di sá yii u wɔ́b́ biwɔfib kaa tútuǹ-bi. An nín bàà sá u mā u-diikuee ní u fìkī binib diiŋŋi.

²⁰U-pɔbil nín kaa sɔ̀m̀ tin u cááyee pu puee, waa làá ŋmā kí kpāafì u-gaajati.

²¹U sá upoofu ní ubɔ kaa ŋūǹ kí ŋmátí kí nyā u-ŋaan, an pu ní u-naam mun kaa làá yúntí.

²²U làá nīn bí digbilin ní dinimbinaamandi ń jēetí u-pu, bifalaadambi kɔkɔ ŋalii làá nyīī-u kí múĺ.

²³Ŋyunti ŋun u bíi gbēentí u-poolee, ní Unimbɔti ń kpáatí u-ŋuul kí sìtī u-pu. An làá dāá nì u-pu kii utaayee, an di dāa sá u-jinti.

²⁴Báà u yaa sáǹ ki ŋmátì tikúti kpaŋki kaa cúú-uaaa, tasa kúti piiŋŋu làá cúú-u[14].

²⁵U làá dáaĺ kí fɔ́fí mpiin kí nyāntí u-wuntin, ní kí nyāntí mpiin ŋun nyɔkɔ cɔ́m̀ee u-pɔɔlin. Ama dinyoondi làá nīn dī-u.

²⁶Dibɔmbɔŋkpaandi di dɔ̄ ki cí-u dibalin, ŋŋmi ŋun ubɔ kaa tūūyee làá wà kí céetí-u, ní kí wà tin kíǹ u-diikunee nyíki nyiki.

²⁷Yilpu làá bìitī atuŋkpiti ŋin u túńee kɔkɔ pu, ní kitiŋ ń lēē u-pu seera kí jáǹ-u.

²⁸Nnyiŋgbeen làá yòon̄ u-gaajawanti ŋwiin ŋun Unimbɔti ŋuul làá dāá pōōyee.

²⁹Kun dɔ̄ ki cí ukpitee dee, Unimbɔti nín bɔ́ntì tin ki cíitì-uee dee.