Read Ntcham Job 22 Bible Online

Job 22 - Ntcham bible

Job 22

¹Niinee uteemanja Eeliifaasi kíí Yoob yii:

²«Unil mun ŋūǹ kí kèetī Unimbɔtaaa? Báà unil yaa cáá iciin, an sá kí kèetī úǹ u-ba ní.

³A nín bí deedeeyee làá yàntī Unimbɔti Mpɔŋkɔdaan ń páatí ba? Bi nín kaa kāntí a-pu tikpitil tibee làá kūtì-u ba?

⁴«A dàkafī yii a nín fàŋkí unimbɔti puee ní u bíi wòoǹ-si, àá ki bíi sòoǹ a-bɔtaaa?

⁵An kaa sá yii a-yìntitam nín wīikí tikpilee pu, àá a-kpitii nín kaa cáá ŋkaanee puɔɔɔ?

⁶Kpèè, a nìn fōō a-juti cee toolima an kaa cáá taapu, a nìn fōō u-wampeeŋkaati ní u kíǹ ki còom̄ ki gàaǹ[15].

⁷Aa nìn tīī un nnyinnyoo cááyee nnyim u nyùn̄, kaa tí tīī un ŋkùm nìn cááyee tijin u jíń.

⁸Ama a nìn yāntì bipɔɔbi jíń kitiŋ ní ki yāntì binigaakaabi kāl̀ ki-pu.

⁹A jìn̄ bikpiipoobi iŋaŋkulim, ní ki nāaǹ ditaŋkpiibil pɔŋŋu.

¹⁰«An pu ní titalindi māntìi tú-si an kɔkɔ pu, ní dinyoondi jéetì a-pu dicilpu dicilpu.

¹¹Kunyeeu mɔ́ ki bīiǹ a-pu ní aa ti wāĺ tiba, ní nnyiŋkpaam gbí ki léeǹ a-pu.

¹²Unimbɔti kaa bí yilpu atagbannaaa? Kpèè kutagbɔŋu kun pu iŋmalbijaa kēe nín bí yilpu puee!»

¹³Niinee ní a lī yii: «Tilati ní Unimbɔti ŋūǹ kí béé? Atagban bīī u-pu, waa làá ŋmā kí sòoǹ ti-bɔti.

¹⁴Atagban sá kii ŋŋaabiiŋkaa ŋun gbìfèe ní. Unimbɔti yaa còom̄ kí màntīí tū kutagbɔŋuee, waa wāĺ báà tiba.»

¹⁵«A làá nīn gbíntìi còom̄ isaŋkpiki puɔɔɔ, isan in ní binikpitib nìn cōom̀ee pu ní?

¹⁶Bi-wiiŋyi kaa bà ní bí kpú, a lì kii nnyiŋgbeen nín yòontí kudii puee ní.»

¹⁷Bi nìn tùkù Unimbɔti yii: «Yàntī-ti soooo! Ba ní Unimbɔti Mpɔŋkɔdaan ŋūǹ kí ŋá-ti ní.»

¹⁸Úǹ mun di nìn gbéeǹ bi-diiŋŋi tiwammɔntiil. Maa ŋūǹ kí gbìl̄ binikpitib bimbim taapu[16].

¹⁹Deedeedambi làá ká bi-naabuŋu ní kí nīn fàal̀, maanyiibab làá nīn bèel̄-bi ki lì yii:

²⁰«An nāaǹ ti-nannanliibi, ŋŋmi wùn̄ bi-gaajati.»

²¹Si nì Unimbɔti ń mɔ̄ɔkì ní kpántí bibɔɔtiibi, a yaa ŋá míǹ, án làá fàtīí bútí-si.

²²U nín dàkà-si puee, fōō míǹ ní kí dū u-nyɔɔbuŋŋi kí ŋá a-pɔbilin.

²³«A yaa fātìi gítìń Unimbɔti Mpɔŋkɔdaan cee, u làá fōō-si kí fàtīí gíiǹ-si kí kàan̄ mpaan ŋun pu a nìn bí dooooyee. Nyāntí tin kamaa kaa bí deedeeyee a-kɔŋkooŋŋun.

²⁴Dū a-sindaariyau kí lúkú kitiŋ, àá á dū-u kí bíĺ mbun taŋkpeeŋi kansikin.

²⁵Unimbɔti Mpɔŋkɔdaan làá kpántí a-sindaariyau nì a-nimbiliŋ dikpúkul.

²⁶An yaa ŋá mimmee, a làá ká a-mɔŋŋu Unimbɔti Mpɔŋkɔdaanni, ní kí kpèè Unimbɔti nimbiin nì dimákal.

²⁷A yaa mēē-u, u làá pīlifiǹ-si, ní á dāá ŋá kii a nín pōoǹ yii a làá ŋá puee.

²⁸Án làá bútí-si tin kamaa a yaa lēē kí ŋée poon, ní ŋwalifi ń nīn ŋmíntí a-saŋŋu pu.

²⁹«Di sá yii Unimbɔti nàantí bilambidambi tuuŋŋi, ama u fìil̄ unil un di sīntì u-ba taapuee ní.

³⁰Kii Unimbɔti nín fìil̄ maanyiibab puee, míǹ ní u làá fīī-si a nín ŋá tin kítèe pu.»