Read Ntcham Job 23 Bible Online

Job 23 - Ntcham bible

Job 23

¹Niinee ní Yoob kíí yii:

²M gbíntìi bíi jáà nì Unimbɔti ki yáliŋkí díǹ, m-yaliŋkii dáá gbíntìi pɔ̄ɔ̄.

³M yaa bàà ŋūǹ kí béé laakin Unimbɔti bée, m bàà làá tin gbàtī u-beejal nimbiin ní!

⁴M bàà làá dū m-bɔti kí bíĺ u-nimbiin, ní kí sòoǹ kí cántí m-bɔti nee taapu kɔkɔ kí tùkù-u.

⁵M bàà làá béé u nín làá kíí-mi puee, ní kí gbìl̄ tin u cáá kí tùkù-mee taapu.

⁶Unimbɔti kalin làá dū u-pɔŋŋu kɔkɔ kí jáǹ-mi níii? Aayee! Úǹ làá pīlifiǹ-mi.

⁷Ubulcinnil ŋūǹ kí sòoǹ nì u u-bɔti niin, ní Unimbɔti un sá m-bɔsoonliuee ń pɔ̀-mi kí nīn cáa cá talku.

⁸Ama m yaa nín cá ŋwìiń nyalaŋki púɔɔɔ, Unimbɔti kaa bí niin. M yaa tí nín cá ŋwìiń jeetilaŋki púɔɔɔ, maa kāntí-u.

⁹U kalin bíi tūǹ ditundi ŋgan pú níii? Aayee, maa wāĺ-u. U kalin bál̀ ŋgiil pú níii? Maa wāĺ tiba.

¹⁰Ama u nyí nsan ŋun poon m còom̄ee, u yaa cɔ́ŋkì-mi, m làá nyā dándan kii sindaariyee ní.

¹¹M-taaŋi pée tàkā u-tabɔbiliŋin ní, m pée ŋúb́ u-saŋŋu ní kaa kpēeǹ ki cūtì laaba.

¹²Maa fātì m-boon ki tīī u-marab, m kpáafì u-bɔkpaaŋi kɔkɔ m-pɔbilin.

¹³Ama úǹ di lèekī tin u làá ŋée. Ŋma di ŋūǹ kí yàntī ú kpántí nlandɔkɔ? Kun mɔ̄ǹ-uee ní u ŋáań.

¹⁴Tin u bɔ́ntì kí tīī-mee ní u làá ŋá, ní u bɔ́ntì tiwan tikpil kí tīī-mi.

¹⁵An pu ní m bí dinyoondi poon u-nimbiin. M yaa bíi dàkafī tin bí nee kɔkɔ puee, an cútí-mi tifaandi ní.

¹⁶Unimbɔti bíil̀ m-pɔbil, Unimbɔti Mpɔŋkɔdaan fāaǹ-mi.

¹⁷Min kamaa dibɔmbɔndi bée, min kamaa kunyeeu mɔ́ m-puee, maa ŋmíl̀.