Read Ntcham Job 24 Bible Online

Job 24 - Ntcham bible

Job 24

¹Ba pu ní Unimbɔti Mpɔŋkɔdaan kaa síiǹ ŋwiin ŋubɔ kí sòoǹ binib bɔti ní, ŋwiin ŋun ní deedeedambi làá kée ní?

²Binib bí ki cóotí bi-kpaanyɔmmu taŋkpeeŋi ki nìkì[17], ní ki ŋúb́ ipii in bi yùn̄ee ki kpàá.

³Bi fòol̄ ditaŋkpiibil maŋki ní ki yòontí ukpiipu naau toolima.

⁴Bi kàkatī binandambi ki wàatī nsan, ní ki páb̀ bifalaadambi bi sáń ki bāal̀.

⁵Bifalaadambi bí kii kumooun mammu mun di cá kuteeun kí nyàab̀ mu-jintee ní. Nsan ŋun baba pu bi ŋūǹ kí ká tijin kí tīī bi-biyaamuee dee.

⁶Biba saakun ní bi cá ki cēē timool ní ki lúlifí utɔŋfiti fiinyi kpaabun.

⁷Ama baa cáá sata kí bìin̄ kunyeeu, tiwool yaa bée, baa cáá satabiiŋkaa.

⁸Utaa un nyánní dijool pu ki sɔ̀m̀ee di gbáà-bi. Bi nākantí ataŋkpee pu, di sá yii baa cáá ŋkɔŋkoon.

⁹Binikpitib bàbitī ditaŋkpiibil di-na biil pu. Bi yòontí usoodaan bipɔŋki toolima kí pà dipɔndi.

¹⁰Baa cáá tiwan kí pèen̄ ní bi yàntī bi còom̄ ki gàaǹ, bi yàntī bi tūntí bilee abɔn abɔn, kaa jíń tiba.

¹¹Bi yàntī bi ŋmāam̀ ɔliifi biliŋ ki nyāntí ŋkpam, ki yàntī bi ŋmāam̀ fiinyi biliŋ ki nyāntí ndaam, ama ní nnyinnyoo làá kpɔ̀-bi.

¹²Binib bí ki yáliŋkí kitiŋin, bin fōō tiweendee bíi gbáà ibiil ki yíì Unimbɔti ń jòoń-bi, ama atuŋkpiti gbanti kaa sòoǹ Unimbɔti tiba!

¹³Bin tūǹ atuŋkpiti gbantee kaa là ŋwalifi bɔti. Baa nyí ŋwalifi saŋyi, kaa tí dì ŋu-sàmbiyaamu.

¹⁴Unikpɔl yíkí ntaafaabɔmbɔm ní ki kù usoodaan nì unandaan, ní kunyeeu yaa mɔ̄ee ní ú kpántí unaayuu.

¹⁵Uninja un nyēē u-nimpuu boonee cí kunyeeu yaa bíi móotée ní ú lì yii: «Ubɔ kaa làá wāl̀-mi». U lī mimmee ní kí nyàab̀ tiba kí bìin̄ u-nimbiin.

¹⁶Kunyeeu ní unaayuu cífí adiin, ama kutaa yaa wúntèe ní ú dūú pìin̄ u-ba pu u-diikun. Ŋwalifi sá tiwancan ní ki tīī-u.

¹⁷Bíǹ gbanti kɔkɔee, kutaafaau sá kii ŋkúm bɔmbɔndee ní, di sá bi mántì nì kunyeeu tumbilinti ní.

¹⁸Ni lì yii: «Binikpitib bí kii tiwan tin dēē nnyim pu mì cáa féeńee ní. Unimbɔti tɔ́ bi-kpaatanti mbusu, baa ti cá bi-fiinyi kpaaŋŋin ki tūǹ ditundi.

¹⁹Kii ŋwìiń nín gbáà ntaayim pu mí dùntī kí wāŋkì puee, míǹ ní binikpitib wáŋkí kí cù ditaŋkpiilin.

²⁰Unimpu un màl̄-bee kaa ti téetí bi-pu, bi kpántí diina jinti ní kí tīī akoosibil, baa ti pée sòoǹ bi-pu. Bi nàn̄ ikpiti dúsi dusi kii ndɔee ní.

²¹Binib gbantee nìn sāaǹ unimpuŋmaŋŋmanti un kaa nìn ŋúń ki màl̄ee, ní kaa dàkā bikpiipoobi kulaŋŋaŋfitiiu.

²²Ama Unimbɔti cáá mpɔn kí nyāntí bipɔndambi. U yaa yíkì bi-puee, baa ti làá nīn máká kí nīn bí dimaŋfalin.

²³Unimbɔti pée yàntī bí nīn bí ŋgbansɔŋfin ní, ama ní u-nimbikpeeŋu pée cɔ́ bi-saŋkindi pu.

²⁴Binib gbanti pée yíkí ŋyunti ŋubɔ fiii ní, ama boonee an dóò bi-pu dee. Bi làá tìntī bi-yil kii nsupumpukum min bíi kúùyee ní, bi làá cā-bi kii bi nín cēē idifin puee ní.»

²⁵M yaa mɔ́ntì, ubɔ ń dàkà-mi yii m mɔ́ntì, udaan ń dàkà yii tin m sòon̄ee kaa sá míǹ.