Read Ntcham Job 27 Bible Online

Job 27 - Ntcham bible

Job 27

¹Yoob nìkī ki sòon̄ yii:

²Nì Unimbɔti un bí dimaŋfalin kaa là kí pɔ̀-mi nee yindi puee, nì Unimbɔti Mpɔŋkɔdaan un cɔ́tì m-poon kaam nee yindi puee,

³m pūtì yii m nín dáá cáá kufoou m-ni, Unimbɔti fooku nyēē m-maŋfataabuŋyin nee,

⁴m-nyɔkɔ kpá kí sòoǹ tibɔkpitil, m-limbil kpá kí sòoǹ tinyimɔmbɔti!

⁵M kpá kí tīī-ni ibaamɔn. M kpá kí lì yii m fōō dibɔkpil kí cáá sāā ŋkúm dal.

⁶M gbíntìi ŋúb́ yii m bí deedee, ní m kpá kí kɔ́ntí m-nyɔkɔ, m-landɔkɔjaatiŋu kaa làá kɔ̄kɔl̀-mi dalba dalba.

⁷Unimbɔti ń dáaĺ m-nannanliibi tafal kii binikpitibee. Ú dáaĺ bin jáà nì mee tafal kii digaŋgam dambee[19]!

⁸Unikpiti gíti máká ba pu ŋyunti ŋun ní Unimbɔti lēē u-maŋfalee?

⁹Dinimbinaamandi yaa jéetì u-puee, Unimbɔti gíti pílifí u-biiliiyaaa?

¹⁰U kāntí u-mɔŋŋu Unimbɔti Mpɔŋkɔdaannaaa? U nìn mèé Unimbɔti ŋyunti kamaaa?

¹¹M làá dàkà-ni Unimbɔti pɔŋkpaaŋŋu, maa làá báĺ-ni Unimbɔti Mpɔŋkɔdaan landɔkɔi.

¹²Ni-kɔkɔ dáań ki ká míǹ ni-ba. Kin ba pu ní tin ni sòoǹee kaa cáá taapu míǹ?

¹³Kpèèmaan kun Unimbɔti bɔ́ntì ki cíitì unikpitee, kun ní Unimbɔti Mpɔŋkɔdaan bɔ́ntì ki cíitì bipɔndambee:

¹⁴Báà u-jipɔmbi yaa būtì, dikɔ̀ndin ní bi làá kpɔ̀-bi, ní u-naantiibi ń dāá lóó tijin.

¹⁵Bìlbil kúm di làá dāá kpɔ̀ bin kíǹ kaa kpíìyee, bi-kpiipoobi kaa làá dāá ŋmā kí kàl̄ bi-kpool kí sɔ̄.

¹⁶Báà unikpiti yaa kōontí animbil ki kpūkuntí kii ŋkpɔŋkpɔmee, àá ki kpūkuntí tiwampeeŋkaal kii kuyɔkɔuee,

¹⁷ú nīn gbíntìi nìkì ki kpūkuntí! Deedeedaan ubɔ di làá dāá pèen̄-tì, ubulcinnil di làá dāá jī u-nimbiliŋ.

¹⁸Kudii kun unikpiti māāyee náań nì kii tinaŋgbantalindee ní, a lì kii kibiŋ kin un cí bukpaayee gāāyee.

¹⁹U kóò kí dòon̄ ki sá ugaaja, ama ní an sá u-luŋkikaam, u dāa yíkí kí ŋúbití u-nimbiliŋee, báà tiba kaa ti bí.

²⁰Dinyoondi làá jēetí u-pu kii nnyiŋgbeen nín lēentí unil pu waa nyí puee ní. Kunaakpaabuŋŋu làá yòon̄-u kunyeeu.

²¹Ŋwìiń nyalaŋki pú buŋku làá yòon̄-u kí cáá tɔ̄ kí fá ndandati, ku làá yòon̄-u mpɔn u-kɔŋkooŋŋun.

²²Ku làá nīn fátí-u kaa làá sɔ̄ u-saai, see ú dāá pɔ́ɔǹ kí sāǹ-ku kí ŋmátí.

²³Bi làá dāá kpāafì iŋal kí bèel̀-u, laakin u kóòyee, bi làá dāá nīn búǹ ifoon ki lāā-u.