Read Ntcham Job 28 Bible Online

Job 28 - Ntcham bible

Job 28

¹Tiŋman, an cáá laakin bi gbì kí ká animbilee, ní ki cáá laakin bi gbì sindaariya ki fíntí-uee.

²Bi gbì kitiŋ ní kí nyāntí tikúti, ní kí dùntī ditaŋkpal kí nyāntí tasa.

³Binib yòontí ŋwalifi ní kí kɔ́ kitiŋ taapu. Bi gbì ní kí kɔ́ kitiŋ taapu taapu ki nyàab̀ ataŋkpee dibɔmbɔndin.

⁴Laakin binib kaa kóòyee, bi gbìn̄ ifal kii tumbuŋku faliiyee, laakin unil taal kaa pée tāā ki kée, binib lúń iŋmii pu ki fīintí.

⁵Kitiŋ yilpu lòon̄ tikpaajin, ama ní kitiŋ taapuee, a lì kii ŋŋmi lábitì tikɔkɔ ki cìb̄ee.

⁶Kitiŋ taŋkpeeŋin ní ataŋkpamɔnti ŋin bi yíì safiiree bí, ŋi poon ní bi kāntí sindaariya kpɔŋkpɔm.

⁷Ikaabu kaa nyí kitiŋ taapu saŋyi gbanti, ikaalun nimbil kaa wál̀-i.

⁸Ipeecuncuti taal kaa tāā isan gbanti pu ki ká, míǹ ní gbikinti mun kaa nóó-i ki ká.

⁹Ama unil gbì ditaŋkpal din pɔ̄ɔ̄yee, u gbì ajoon kí tin bà ŋi-taapu.

¹⁰U gbáń ki wīī ditaŋkpal ki gbìn̄ ifal, tin kɔkɔ sá tigaajawanee, u-nimbil wāĺ tikɔkɔ.

¹¹Bi gbíŋkí ibun nyimbulnimbiliŋ ní kí nyāntí tin nìn bí dibalinee kí páań mpaampiin pu.

¹²Ama la ní bi ŋūǹ kí ká iciin? La ní dinyil bí ní?

¹³Iciin kaa bí binifoobi tiŋkin, an puee binib kaa nyí i-nyampooku.

¹⁴Tiŋkukpaan bí yii: «Iaa bí doo», ní dimɔɔl mun bí yii: «Iaa bí m-cee.»

¹⁵Baa ŋūǹ kí dū disindaariyakúndi kí kpántí-i, baa tí ŋūǹ kí ŋmàntī animbil kí dūú dā-i.

¹⁶Sindaariyamɔnti kaa cá i-cee, míǹ mbaantiim ní ataŋkpamɔnti mun kaa cá i-cee.

¹⁷I cáá kunyampoou ki jítiǹ digitil nì sindaariya, baa ŋūǹ kí dū sindaariyamɔnti disambil kí dā-i.

¹⁸Baa tí sòoǹ atakpamɔnti ŋin bi yíì kooraal nì kriistaalee pu. Unil ń nyàab̀ iciinee sɔ́ǹ ú nyàab̀ abeedimbil.

¹⁹Eetiiyoopii tiŋkin taŋkpamɔntiil din bi yíì toopaasee kaa cá i-cee. Taa ŋūǹ kí dū sindaariyamɔmmɔnti kí ŋmàntīǹ-i.

²⁰Ama la ní iciin nyánní ní? Dinyil kɔŋkooŋŋu bí la ní?

²¹Bi dū-i ki bál̀ binifoobi kɔkɔ, ki dū-i ki bál̀ unoon un ŋàaǹ kutaa puee.

²²Ŋkúm nì ditaŋkpiilin bíi lì yii: «Ti gbìl̄ bi sòon̄ i-pu.»

²³Ama Unimbɔti nyí nsan ŋun pu bi dì kí ká-iee, úǹ baba di nyí laakin bi ŋūǹ kí ká iciinee.

²⁴Di sá yii u-nimbil làaǹ kitiŋ kɔkɔ pu ní ki wāĺ tin kɔkɔ bí ki-puee.

²⁵Ŋyunti ŋun u tīī kubuŋu ku-nyiŋfiŋu ki ŋmāntì inyiŋfee,

²⁶ŋyunti ŋun u tīī utaa laakin u làá nīn nì ki gbèentée ní u cátì nsan ŋun ditaadundi làá nīn dèe,

²⁷ŋyunti gbanti ní u ká iciin ní ki béè i-nyampooku. U nìn cɔ́ŋkì-i ní ki béè i-daaku.

²⁸Niinee ní u bí binib yii: «Á fàŋkì ti-Dindaanee di sá iciin! Á fàtī a-boon kí tīī tikpitilee di sá dinyil[20]!»