Read Ntcham Job 3 Bible Online

Job 3 - Ntcham bible

Job 3

¹Míǹ boonee ní Yoob dāa wāaǹ kinyɔkɔ ki tɔ́ ŋwiin ŋun bi màl̄-uee mbusu[2].

²U nín nìn sòon̄ puee sɔ̀.

³M bàà là yii Unimbɔti ń kúntí ŋwiin ŋun ní bi màl̄-mee, kí kúntí kunyeeu kun ní m-na cáá m-poolee.

⁴Ŋwiin gbanti ń kpántí dibɔmbɔndi wiiŋŋu! Ŋu-bɔti ń taa ti nín̄ ká Yilpu Fɔ́ŋŋŋ Nimbɔtiu! Ŋwalifi ŋubɔ ń taa ti ŋmíntí-ŋu!

⁵Dibɔmbɔndi nì ŋkúm booŋŋu ń nīn bàlifī ŋu-pu, atagban ń nīn pée bīī ŋu-pu, uŋmal ń cúú ŋwìiń ŋwiin gbanti.

⁶Kunyeeu kun ní m-na díkí m-poolee ń nīn bɔ̀ǹ kí jītíǹ tinyati kɔkɔ, bí taa ti kàaǹ-ŋu kí kūtì dibindi poon wiiŋyi pu, ní bí taa ti kàaǹ-ŋu kí kūtì iŋmal wiiŋyi pu!

⁷Unimpu ubɔ ń taa ti cáá dipool kunyeeu kun ní m-na nìn cáá m-poolee, bí taa ti gbìl̄ ifaal kuŋkuuntii pu kunyeeu gbanti!

⁸Bin tòó iwiin mbusu, ki nyí bi nín fìntī kupeebiliŋŋu Draagɔn puee ń tɔ̄ kunyeeu gbanti mbusu.

⁹Ku-taafaaŋmalbijaai ń kpántí dibɔmbɔndi! Kú cīití kutaa wúntitam kí gīī kí taa wāl̀ ntaafaawìiń!

¹⁰Di sá yii kuaa ŋá tiba ki pīiǹ m-na maaliŋu ki yāntì u màl̄-mi m dāa kɔ́ nnaabu ŋun poon m kɔ́ nee.

¹¹Ba pu ní maa kpíì m-na poon ní? Ba pu ní bi nín màl̄-mi kpalaayee, maa kpíì ní?

¹²Ba pu ní m ká ataa ali ŋin làl̄-mee ní? Ba pu ní m ká abii ali ki ŋáam̀ ní?

¹³Kɔnampu nee m bàà bí ŋgbansɔŋfin dikaakulin. M bàà dɔ̄ ki gèeǹ ki ŋùŋfī

¹⁴nì bibɔtiibi nì kitiŋ pu yidambi bin nìn fātìi máń tibɔtinaakɔti tin nìn lítèe,

¹⁵nì abɔtibil ŋin cáá sindaariya ní animbil gbí bi-diiŋŋinee.

¹⁶Àá ba pu ní baa dū-mi ki bál̀ kitiŋin kii kibiki kin bi lēē ki fée, a lì kii kibiki kin bi màl̄ kaa yōoǹee.

¹⁷Dikaakulinee, binikpitib kàal̀ soooo, ní binib bin túń ditundi ki gīīyee kāntí diŋuŋfil.

¹⁸Bisarkadambi kāntí dibatɔl, baa ti gbìl̀ bijanjaliibi bin cí-bee nyɔkɔ pu.

¹⁹Ŋwaamu nì bikpaambi kɔkɔ bí niin ní, uyumbu kpiliu kaa ti cáá u-pu mpɔn.

²⁰Ba pu ní Unimbɔti yàntī bin jīǹ falaayee gbíntì bí dimaŋfalin ní? Ba pu ní bin poon kaam cɔ́tèe gbíntìi fòotī ní?

²¹Bi kā ki cí ŋkúm, ama ŋkúm kaa dòoń[3], bi fíkití an kɔkɔ pu ki nyàab̀-mì kii tigaajawammɔntiilee.

²²Bi yaa bàà ká dikaakul diba poon kí dòon̄, bi bàà làá nīn bí dipɔɔpindin ki fàal̀ ní!

²³Ba pu ní Unimbɔti tìì unil un kaa nyí laakin u cée dimaŋfal ní? An niliu ní Unimbɔti dù kunaabakau kí bàkā u-pu!

²⁴Diniindi di kpántì m-jinti, ní m dùǹ kii nnyim nín pùub̀ puee.

²⁵Kun fàantí-mee di bàń-mi, kun m fàŋkée ní m kāntí.

²⁶Maa cáá ŋgbansɔŋfi, kaa cáá dibatɔl, kaa cáá diŋuŋfil, ama iyaliŋki di māntìi tú-mi.