Read Ntcham Job 33 Bible Online

Job 33 - Ntcham bible

Job 33

¹Ama sii Yoob, pīlifì tin m cáá kí sòoǹee, kpòon̄ a-tafal kí pīlifì m-nyɔɔbuŋŋi.

²Kpèè, m làá wàan̄ m-nyɔkɔ, ní anyɔɔbun bɔ́ntì kí nyā.

³M làá sòoǹ nì si nì dipɔbil diba ní. M-nyunculiŋ làá tábití kí sòoǹ ibaamɔn ní.

⁴Unimbɔti Fam di náań-mi, Unimbɔti Mpɔŋkɔdaan fooku di yāntì m bí dimaŋfalin.

⁵A yaa ŋūǹ, a ŋūǹ kí kíí-mi, bɔ́ntí a-ba kí kpákáǹ-mi!

⁶Unimbɔti nimbiinee, man nì si ŋmà ní, kuyɔkɔu ní bi dūu máń ma mun.

⁷An puee aa máaǹ kí fàŋkì-mi, àá kí dàkafì yii m làá wɔ́b́-si.

⁸M dáá gbíntìi gbìl̀ a-nyɔkɔ pu, ŋyunti ŋun a bí ki sòoǹ ki bùsī yii:

⁹«M bí circir, maa ŋá ikpiti. M bí deedee kaa yīntì.

¹⁰Ama Unimbɔti gbíntìi kāntí dibɔkpil m-pu, u dū-mi ki kútì u-nannanliibi pu.

¹¹U bá m-taaŋi akpambaa, u-nimbil pée cɔ́ tin kɔkɔ m ŋáańee pu ní.»

¹²Ama Yoob, yàntī ḿ tùkù-si yii a yīntì dijandi gbanti pu, di sá yii Unimbɔti jítiǹ unil kpataaa.

¹³Ba pu ní a yíiń-u tibuul? Úǹ kaa cáá kí tùkù ubɔ tin u ŋáańee.

¹⁴Unimbɔti dì isan tikpil pu ki sòoǹ, ama unil kaa dūu yíiń tiba.

¹⁵U sòoǹ kí dūú dī kudamintiiu nì dileedakal poon, ŋyunti ŋun ní kugeembiiu jéetì unil pu u dɔ̄ u-dooŋu pu ki gèeǹee.

¹⁶U lèekī ki dàkà-bi ki kpáafí-bi kaa gbèentí,

¹⁷bí bàà fàtī bi-boon kí tīī bi-tuŋkpitiŋ, kí taa jēetí dilambilin.

¹⁸Míǹ ní u ŋáań ki fìil̄ bi-nammu ki nyāntí ŋkúmin, u fìil̄-bi ki nyāntí nsan ŋun cáǹ unil ŋkúminee.

¹⁹Ama Unimbɔti dù iween kí dáaĺ unil tafal kí bíĺ-u u-dooŋu pu: niinee ní nnaanyeem ń yàntī u-wunti jìkì kaa gbèentí,

²⁰ní tijin kaa ti mɔ̄ u-nyɔkɔn, ki kpáaǹ tijin tin u néeńee, u-nimbil kaa ti là kí wāl̀-tì.

²¹U dúntí ní baa ti wāĺ u-wunnanti, ní ú kpántí akpab ŋma.

²²U-taal kíǹ ki làkā ntaŋkpiifal pu ní, ŋkúm tuuŋyi di kíǹ ki yì u-maŋfal.

²³Ama Unimbɔti tuuŋyi kutukub kutukub bin bí ki tútúǹ binibee ŋubɔbɔ ŋūǹ kí dàkà-u tin kítèe.

²⁴Ntuunee làá sɔ̄ u-saai ní kí gbàam̀ Unimbɔti yii: «Taa yàntī ú dòon̄ u-ŋaliŋu pu, m ká nsan ŋun pu m làá dī kí fīī-u kí lííyee.»

²⁵Niinee ní ubunlee ń fàtīí ŋá gbàlgbal kii kibikee, ní kí fàtīí gítí u-naacimpɔnti yuntiŋu.

²⁶U yaa mēē Unimbɔtee, u pílifíǹ-u, u jáaḿ Unimbɔti nì dipɔɔpindi, di sá yii u fīī-u ki nyántì ŋkúm ŋaan.

²⁷U gà ilan samaa nimbiin ki lì yii: «M nìn ŋá ikpiti, m nìn yīntì mara, ama Unimbɔti kaa dáaĺ m-tafal kii an nín bàà máaǹ puee.

²⁸U fīī m-naŋki ki nyántì ŋkúm ŋaan, m làá nīn bí kí fàtīí ká ŋwalifi.»

²⁹Unimbɔti ŋáań tin bí nee kɔkɔ, ŋfunyɔm mili, mita ki tìì unil,

³⁰kí ŋmā kí fīī udaan maŋfal kí nyāntí ditaŋkpiilin, ní kí yàntī binifoobi walifiŋu ń ŋmíntí u-pu.

³¹Yoob, a máaǹ kí pīlifiǹ-mi tiŋan, á ŋmīĺ fɔ́ŋfɔŋ kí yàntī ḿ sòoǹ.

³²A yaa cáá tiba kí sòoǹaaa, á sòoǹ, di sá yii án làá nīn sá-mi mmɔŋkpaan ḿ tīī-si mmɔ́ɔn.

³³A yaa kaa ti cáá tiba kí sòoǹaaa, á pīlifiǹ-mi, á ŋmīĺ ḿ dàkà-si iciin.