Read Ntcham Job 34 Bible Online

Job 34 - Ntcham bible

Job 34

¹Niinee ní Eeliiwuu nìkī ki lī yii:

²Nimbi bin sá biciŋfitiibee, pīlifìmaan tin m cáá kí sòoǹee, nimbi binyiliibee, pīlifimaan-mi.

³Ditafal tundi di sá dí nīn pílifí tibɔti, a lì kii dilimbil mun nín dákafí tijin kí béé ti-mɔŋŋu puee[22].

⁴Míǹ puee tí nyàab̀ kí béé tin bí deedeeyee, dicilpuee, tí nyàab̀ kí béé tin ŋān̄ee!

⁵Yoob bí ki lì yii: «M sá deedeedaan, ama Unimbɔti kaa là kí pɔ̀-mi.

⁶Min kamaa m sá deedeedaanee, m kpántì kii unyimɔndaanee. U yá-mi mpiin ki tīī-mi tiweendi, min kamaa maa ŋá ikpitee.»

⁷Ni gíti ká ubɔ u bí kii Yoobeeee? U sìí Unimbɔti sɔkɔmii kii bi nín nyù nnyim puee ní!

⁸U nì bikpitiŋaliibi di tāatí, u nì binikpitib di cáá mpèé.

⁹Di sá u lī yii: «Ba ní an kútí unil ú nyàab̀ kí nīn fáatiǹ Unimbɔti ní?»

¹⁰Nimbi bin gbìl̀ tibɔti taapuee, pīlifìmaan-mi! Unimbɔti kaa ŋūǹ kí ŋá tikpitil dalba dalba, Yilpu fɔ́ŋŋŋ Nimbɔtiu kaa ŋūǹ kí ŋá tin kaa bí deedeeyee!

¹¹Ama u pà binib bi-tuuŋŋi paati ní, báà ŋma bimbim nín máaǹ kuŋyee ní u fòol̄[23].

¹²Ibaamɔn poonee, Unimbɔti kaa ŋáań tikpitil, Unimbɔti Mpɔŋkɔdaan kaa pɔ̀ gandi!

¹³Ubɔ di dū kitiŋ ki kpāaǹ Unimbɔtaaa? Ama úǹ baba di cáá duulinya kɔkɔ pu mpɔn.

¹⁴Unimbɔti yaa bàà dàkafī úǹ baba pu, ní ki fàtīi fòol̄ u-fooku kun tìì dimaŋfalee,

¹⁵binifoobi kɔkɔ bàà pée kúù dicilpu ní, ní binib ń fàtīí kpántí ntam.

¹⁶Yoob, a nín cáá dinyilee, pīlifì tin bí nee, kpòon̄ a-tafal kí pīlifì tin m làá sòoǹee.

¹⁷Unimbɔti yaa bàà ná tin bí deedeeyee, u bàà ŋūǹ kí jī dibeelaaa? A là kí kpɔ̀ un baba bí deedee ki cáá mpɔnee bɔtaaa?

¹⁸Úǹ baba di ŋūǹ kí tùkù ubɔti yii: «Aa bí tiban!» ní kí tùkù abɔtibil yii: «Ni sá binikpitib.»

¹⁹Úǹ baba di sá un kaa yūlifí bibɔtiibi boonee, waa sòoǹ kí pɔ̀ ugaaja kí kpɔ̀ usoodaan bɔti, di sá yii úǹ di náań bi-kɔkɔ.

²⁰Ni dāa kā kunyataasiiu tantaasee, bi kpíì. Samaa yíkí kaa kíikí bi-ba pu ní bí cúú bikpootiliibi kí kpɔ̀. Bi pée cútí upɔndaan ní kí kpɔ̀ sɔkɔmii.

²¹Unimbɔti nimbil cɔ́ unil bimbim pu ní ki kpèé u-saŋkindi kɔkɔ.

²²Dibɔmbɔndi diba kaa bí ki bɔ̀ǹ kí ŋmā kí pìin̄-u nsan ú taa wāl̀ bikpitiŋaliibi.

²³An kaa bàlifī Unimbɔti ń yíiń ubɔ tibuul ní udaan ń nín cù ú sòoǹ u-bɔti.

²⁴An kaa bàlifī ú nyàab̀ kí béé ní kí nín nàan̄ abɔtibil, kí dū biba kí kàan̄ bi-paaŋŋu pu.

²⁵Di sá yii u nyí bi-tuuŋŋi kɔkɔ, u kpákatí-bi kunyabaantiiu ní kí nàb̀ dúsi dusi.

²⁶U fátí-bi kí bíĺ binib nimbiin, kii digaŋgam dambee.

²⁷Binib gbanti nìn fātì bi-boon ki tīī-u, baa nìn dū u-dàkatam ki yíiń tiba.

²⁸Bi yāntì bisoodambi biilii bāań-u, bi yāntì Unimbɔti gbìl̄ binandambi biilii pu!

²⁹Báà Unimbɔti yaa lēē kí nīn ŋmí, ŋma làá kpɔ̀ u-bɔti? U yaa dū u-ba ki bál̀, ŋma làá wāl̀-u? Ama úǹ di kpèé atimbun nì binib,

³⁰ki pìintí unikpiti nsan ú taa jī binib pu dibeel, unil un di mɔ́ntí binibee.

³¹Tí dūú ŋmàntī yii ubɔ bí Unimbɔti yii: «M ŋá ikpiti, ama m pōoǹ yii maa ti làá ŋá ikpiti.

³²Dàkà-mi ikpiti in ní maa ŋúń ki wál̀ee. M yaa yīntì, maa ti làá ŋá míǹ.»

³³Sii ceeyee, Unimbɔti làá dáaĺ u-tafalaaa? M nyí an nín kaa ká-see. An sá sii di lēē, an kaa sá man, míǹ puee tùkù-mi tin a nyée.

³⁴Binib bin cáá dinyilee nì biciŋfitiibi bin pílifiǹ-mee làá lì yii:

³⁵«Yoob bíi sòoǹ, ama waa nyí tin u sòoǹee, u-nyɔɔbuŋŋi dàkà yii waa nyí tiba.

³⁶U sòoǹ kii unikpitee, see bí gíti nyɔ̀kɔfì u-bɔti nee tiŋan.

³⁷U ŋá ikpiti ní ki gíti yíkì kaa kíí u-ba pu, ki bíi jáà nì Unimbɔti kaa gbèentí. U yāntì ti kɔ́ digugufil poon.»