Read Ntcham Job 35 Bible Online

Job 35 - Ntcham bible

Job 35

¹Eeliiwuu nìkī ki lī yii:

²Yoob, mimmee a dàkafī yii an kítì á lì yii: «Unimbɔti, m bí deedeeee?»

³Di sá a bàlifī-u yii: «M-kpitii kaa ká-si, m nín kaa bíi ŋáań ikpitee, m páatì ba?»

⁴Man m-ba di làá kíí-si, ní kí kíí kí kpáaǹ a-bɔɔbi mun!

⁵Wáaǹ kí kpèè kutaa, kpèè atagban nín bí a-yilpu puee!

⁶A yaa bíi ŋáań ikpitee, an ŋáań Unimbɔti tibaaa? A yaa jáń nì u ki kūbitì ki jáń nì u, an ŋáań-u ba? Báà tiba!

⁷A yaa ti bí deedee, ba ní an kútí-u? Ba paatii ní u kāntí poon?

⁸A-nijutiibi di làá jī a-kpitii pu falaa, a yaa tí bíi ŋáań tiŋanaaa, binib ní án làá kèetī[24].

⁹Binib bin bi wɔ́b́ an tin nyāŋkèe bí ki yáliŋkí, bi yáliŋkí ki nyàab̀ ubɔ ń dāá fīī-bi kí nyāntí upɔɔl ŋaan.

¹⁰Ama bi-kansikin ubɔ kaa bàlifī yii: «Unimbɔti un náań-mee bí la? Úǹ un yàntī binib gà ilan kunyataasiiu,

¹¹ki dì ipeel pu ki dàkà-ti, nì inoon pu ki yàntī ti kāntí dinyilee?»

¹²Binib gbáà ibiil an kɔkɔ pu ki nyàab̀ bí fīī-bi kí nyāntí binikpitib bin yòontí bi-ba yilpuee ŋaan, ama Unimbɔti kaa kíí-bi.

¹³Bi gbáà ibiil fám, ama Unimbɔti kaa pílifiǹ-bi, Unimbɔti Mpɔŋkɔdaan kaa fātìi tɔ́ gba.

¹⁴An yaa sá mimmee, Yoob, kin mana ní Unimbɔti làá pīlifiǹ-si ŋyunti ŋun ní a lì yii: «Maa wāĺ-u, u nyí man bɔti, m làá nīn pée kā ní ki cí-u.»

¹⁵Tiŋman Unimbɔti kaa bíi dàkà u-ŋuul, an bí kii u-tafal kpá binib nín yíkì ki jáà nì u pu puee ní.

¹⁶Di sá yii tin Yoob sòoǹee sá kii kubuŋuee ní, u sòoǹ tikpil ama ní kaa nyí tin u sòoǹee.