Read Ntcham Job 36 Bible Online

Job 36 - Ntcham bible

Job 36

¹Eeliiwuu nìkī ki lī yii:

²Yoob, jī m-pu kimɔtii fiii ḿ dàkà-si. M gíti cáá kí sòoǹ Unimbɔti yil pu.

³M-nyil nyánní ndandati ní, m làá pɔ̀ Unimbɔti m-náanliu.

⁴Tin m cáá kí tùkù-see sá ibaamɔn páaa ní, uciŋfiti páaa di bí kɔ́ĺ-si nee.

⁵Unimbɔti sá mpɔndaan ní, waa kpèé ubɔ fám, u sá mpɔŋkpaandaan ní, u yaa lēē kí ŋá tiŋyee míǹ ní u ŋáań.

⁶Waa yàntī binikpitib ń nīn bí dimaŋfalin ki cá, ama u pɔ̀ binandambi.

⁷Waa fàtī u-boon kí tīī deedeedambi. U kàantí bibɔtiibi dibeel ní ki tìì-bi tinyool ki cáa cá jaanjaan. Ama bíǹ dūú kpántí bilambidambi ní.

⁸Báà bi yaa kpántì bisarkadambi bi bóob́-bi ikusakaaa, bi bíi jīǹ falaayaaa,

⁹Unimbɔti di bíi dàkà-bi atuŋkpiti ŋin bi ŋée, bi nín ŋá ikpiti in dilambil poonee.

¹⁰U pìitī bi-tafaliŋ bí gbìl̄ tin u bíi wòoǹ-bee taapu, ní ki bàlifī-bi bí fàtī bi-boon kí tīī ikpiti.

¹¹Bi yaa pílifì ki sīntì bi-ba taapu ki tīī Unimbɔtee, bi làá kúntí bi-maŋfal wiiŋyi dipɔɔpindin ní kí kúntí bi-biŋŋi mmɔnni.

¹²Ama bi yaa kaa pílifèe, bi làá tàkan̄ nsan ŋun cáǹ unil ditaŋkpiilinee, ní kí kpú, di sá yii baa béè.

¹³Bin kaa fōō Unimbɔti ki kíí bi-pɔbiliŋinee gbíntí bi-ŋuul poon ní, Unimbɔti yaa bóob́-bi ikusakee, baa yíì-u ú jòoń-bi.

¹⁴Bi dáá pɔ̀ɔǹ ní kí kpú, bi-maŋfal wiiŋyi kúntí kii nlaakpaamuee ní.

¹⁵Unimbɔti dù disool ní kí fīī usoodaan, u ŋátí bi-tafaliŋ dinimbinaamandi poon ní.

¹⁶Dinimbinaamandin ní Unimbɔti nyántìń-si ní ki nìn yāntì a nìn bí digbilin. Tijimmɔntiil di nìn tɔ́kɔ́ a-teebiliu pu.

¹⁷Ama Unimbɔti kūū a-bɔti kii binikpitibee, ní aa ŋūǹ kí kpántí tiba ibɔsoon in poon a bée.

¹⁸Taa yàntī tigaajati ń kīil̀-si! Taa dàkafì yii a ŋūǹ kí dū tiwampɔkaal kí dā Unimbɔti.

¹⁹A-gaajati nì a-sindaariyau kaa ŋūǹ kí tɔ̄ ditundi, míǹ mbaantiim ní a-pɔ́ɔǹtam kaa ŋūǹ kí tūtuǹ-si.

²⁰Taa nín kā ki cɔ́tí yii kunyeeu kun bi làá kpìkitī atimbun kí fée ń mɔ́.

²¹Á nīn nyíǹ a-ba kí taa fàtī a-ba kí túĺ ikpiti, di sá yii an pu ní a bí nnaabu nee poon.

²²Tiŋman, Unimbɔti sá ukpaan ní ki cáá mpɔn. Udakal ulɔu di ŋūǹ kí dàkà kí jītíǹ-u?

²³Ŋma di ŋúń ki tùkū-u tin u máaǹ kí ŋée? Ŋma di ŋúń ki tùkū-u dalba yii: «A ŋá tin kaa kítèe»?

²⁴Binib pée gà ilan ní ki nyɔ́ŋkí-u. Si mun téetí kí nyɔ̄ŋkì-u u-tuuŋŋi pu.

²⁵Báà ŋma ŋūǹ kí wāl̀ tin Unimbɔti ŋée, bi kāntí-tì ndan ní.

²⁶Di sá yii Unimbɔti sá ukpaan ní taa ŋūǹ kí gbìl̄ taapu, taa ŋūǹ kí kàaǹ u-biŋŋi.

²⁷U dátí nnyim ki cāabìń u-cee, ní kí dūú kpántí ntaanyim.

²⁸Nnyim gbanti ní atagban cáa yàantí ní mì jòotī kitiŋ nib pu.

²⁹Ŋma di ŋūǹ kí gbìl̄ atagban nín còom̄ puee taapu? Kí gbìl̄ ditaadundi nín fátí pu kutagbɔŋunee taapu?

³⁰Úǹ di yàntī utaa ŋmóò ki ŋmíntí ki pùntī kutagbɔŋu, ama ní ki cáá dibɔmbɔndi ki bìintí tiŋku taapu.

³¹Atagban gbanti ní u cáa sòoǹ binib bɔti ní ki tìì-bi tijin tikpil.

³²U dū ntaaŋmɔŋmɔ ki bál̀ u-ŋaan ní ki tìì-ŋi mara ŋí yā laakin u dàkà-ŋee.

³³Ditaadundi di dàkà yii utaa làá nì kubuŋkpaaŋŋu dòoń, ki kpáaǹ tiwaŋkuti