Read Ntcham Job 38 Bible Online

Job 38 - Ntcham bible

Job 38

¹Ti-Dindaan yíiń Yoob kubuŋkpaaŋŋu poon ní ki bālifì-u yii:

²Ŋma ní a sá ní ki sòoǹ kii ugbaanee, ki bíiĺ tin m bɔ́ntì kí ŋée ní?

³Gbìn̄ a-gbajau kí yūĺ kii uninjee! M làá bàlifì-si tibɔti ní á kíí-mi.

⁴La ní a nìn bí ŋyunti ŋun ní m bíl̀ kitiŋ nyeeleeee? A yaa nyí ibaamɔnee, á tùkù-mi.

⁵A nyí un di lēē kitiŋ nín máaǹ kí nīn wāā pueeee? A nyí un di tɔ́ ŋŋmii ki ŋmāntì-kèeee?

⁶A nyí jaantalkub bin tíkí kitiŋee nín tɔ́kɔ́ kun pueeee? Ŋma di máń ki tá kitiŋ nyeel

⁷ŋyunti ŋun kutaafaau ŋmalbijaai gà ilan ki kìntī tɔb, ní Unimbɔti tuuŋyi fàal̀ee?

⁸Ŋyunti ŋun tiŋku nyim púń ki nyánní kitiŋinee, ŋma di nìn dū punuubi ki pīiǹ mi-pu ní?

⁹An sá man di dū atagban ki pēeǹ-u, m dū dipɔ̀ńdi din nyìm̀ee ki fìn̄-u.

¹⁰U nín wúliń pu ki dòońee, man di cúú-u ní ki síiǹ-u laakin u làá gbèen̄ee ní ki dū punuubi ki pīiǹ u-pu.

¹¹M tùkū-u yii: «Á dāan̄ doo, á taa bà lapu, a-nyiŋgbanti bilambidambee làá gbèen̄ doo ní[25]!»

¹²A-maŋfal wiiŋyi poonee, a pée ŋúń ki tīī kutaa mara dibaba ja yii kú wúntáaa? A ŋúń ki kāaǹ ntaafaabɔmbɔm ŋu-paaŋŋu,

¹³ŋú cúú kitiŋ nyɔɔgbaŋŋi kí cìŋkì binikpitib bin bí ki-puee ń lítáaa?

¹⁴Ntaafaabɔmbɔmee, kitiŋ mántí ní wèeee, a lì kii kuyɔkɔu kun pu bi dū kijalii ki nyīīyee, ní an ŋá kii kitiŋ pu wanti pēē tiwampeeŋkaalee.

¹⁵Ama binikpitib kaa ti cáá bi-walifiŋu[26], ŋŋal ŋun bi bàà dúkutì kí fááyee cúu kɔ́fì.

¹⁶A gíti láá cūtì dimɔɔl nyimbulnimbil laŋkaaa? A cōom̀ dimɔɔl taapu ki yìin̄aaa?

¹⁷Bi dàkā-si ŋkúm punyɔmmu a káaa? A ká mpunyɔmu mun pìitī unil ń kɔ́ ŋkúm booŋŋuneeee?

¹⁸A nyí kitiŋ waaŋŋu nín sá pueeee? A yaa nyí tíǹ gbanti kɔkɔee, á tùkù-maa!

¹⁹A nyí ŋwalifi nín kóò laakiŋyeeee? La ní dibɔmbɔndi kóò ní?

²⁰A ŋūǹ kí céeǹ-bi kí cùnnì bi-dumpuyaaa? A nyí nsan ŋun cáǹ bi-kɔŋkooŋyi laŋkeeee?

²¹A máaǹ kí nīn nyí tiŋan, di sá yii bi nìn màl̄-si ŋyunti gbanti ní a-maŋfal pu wiiŋyi náaǹ tikpilku.

²²A ŋúń ki cūtì laakin bi kpáafí ntaayimeeee? A gíti dáá ká ataanyiŋkumbil cakalaauaaa?

²³M bɔ́ntì-bi ki cíitì dinimbinaamandi yuntiŋu ní, dikɔ̀ndi nì kujaau yuntiŋu ní m bɔ́ntì-bi[27].

²⁴A nyí laakin ŋwalifi nyáńeeee? Ŋwìiń jeetilaŋki pú buŋku nyēeń la ní kí dāan̄ kitiŋ pu ní?

²⁵Ŋma di cátì nsan ki bíl̀ utaa ní? Ŋma di cátì didandi ki tīī ditaadundi tagbandi ní?

²⁶Ŋma di yàntī utaa nì kitiŋ kin pu binib kaa kóò, kuteeu kun pu ní báà ubɔ kpée?

²⁷Ŋma di yàntī utaa ń nì kitiŋkuliŋŋi ń cɔ́tí nnyim, timool ń nyā kí wíiǹ ní?

²⁸Utaa cáá baaa? Ŋma di màl̄ dimalindi ní?

²⁹Dinyintaŋkpal na sá ŋma ní? Nnyim min nyáń yilpu ki kìl̄ee, ŋma di màl̄-mì?

³⁰Niinee ní nnyim ń dūú pɔ̄ɔkì kii ditaŋkpalee, ní dimɔɔl yilpu ń dūú jìlifì kí pɔ̄ɔkì.

³¹Kpèè iŋmalbi acuku. A ŋūǹ kí bóob́ dicukul diba dicilpuɔɔɔ, dicukul diba ní a ŋūǹ kí bútí ní?

³²A ŋūǹ kí yàntī iŋmalbijaa ń nyā ŋyunti ŋun an máaǹee, àá kí kpòotī iŋmalbi in nyēē kutaa ŋgan pu púee?

³³A nyí marab bin di kpòotī kutaayeeee? Sii di kpòotī-bi kitiŋ puɔɔɔ?

³⁴A ŋūǹ kí tīī atagban mara utaa ń nì nnyim ń gbí kí léeń a-puɔɔɔ?

³⁵Utaa yaa ŋmɔ́ee, sii di tūǹní-uaaa? U tùkù-si yii: «M sèéee»?

³⁶Ŋma di tīī kinɔmbiki kin bi yíì yii Ibiisee[28] iciin ní? Ŋma di tīī ukooja dinyil ní?

³⁷Ŋma di ŋūǹ kí kàaǹ atagban ní kí kpòon̄-ŋi nnyim min kā ŋi-poonee ń kpáatí kí fá ní?

³⁸Ŋyunti gbantee, kukpɔŋkpɔŋu ń dūú jìl̄ kí pɔ̄ɔkì ní tikpati ń dūú dàb̄ tɔb.

³⁹Sii di cútí ipeel ki tìì ugbikintinaataaa? Sii di tìì agbikintipɔmbil tijin ŋi jīǹ

⁴⁰ŋyunti ŋun ŋi gbāā itaŋkpalɔkɔn àá ŋi náká kimɔgbaayin kí cúú tibeeee?

⁴¹Sii di bɔ́ntí tijin ki tìì digaliŋgaal ŋyunti ŋun di-biyaamu bíi gbáà ibiil ki yíì Unimbɔti ki yìiǹ an kɔkɔ pu ŋkùm làá kpɔ̀-mueeee?