Read Ntcham Job 4 Bible Online

Job 4 - Ntcham bible

Job 4

¹Niinee ní uteemanja Eeliifaasi fōō dinyɔɔbundi ní ki bí yii:

²An nín píĺ-si puee, taa bàà là kí sòoǹ. Ama taa ŋūǹ kí nīn ŋmí míǹ ki cá.

³A nìn dàkā binib tikpil ki nìn tútuǹ biwɔfib bi ká mpɔn.

⁴A-nyɔɔbuŋŋi nìn tīkintí bin cá kí lítée. A nìn tìì bin gīīyee mpɔn.

⁵Kɔŋkɔnnee, sii ní agìń bāań a-wunti yɔ̄tèe. An bāań-si dee, ní tifaandi cúú-si!

⁶A nín fàŋkí Unimbɔti puee kaa sá a-mákalaaa? Bi nín kaa kāntí tikpitil tiba a-puee kaa tìì-si dimákalaaa?

⁷Téetí tin bí nee, Unimbɔti pée nāaǹ maanyiiba dalba a káaa, àá u nāaǹ ubulcinnil ní a ká ní?

⁸M dáań ki ká tin bí nee yii: Unil yaa kùn̄ tikpitil ki búĺ agìńee, u dāa cēē tikpitil nì agìń mun ní.

⁹Unimbɔti yaa fōotèe, bi kúù ní, u-ŋuul fooku di wù-bi kii ŋŋmee.

¹⁰U yàntī gbikinti kaa ti mùuǹ ní upeecuncuti kaa ti sūǹ ní agbikintipɔmbil nyiŋŋi kɔ́fí.

¹¹Ugbikintija kúù, kun puee waa ká tiba kí cúú kí ŋmɔ́, ugbikintinaati biyaamu sáǹ ki yàl̄.

¹²M fōō tibɔti tiba dibalin, bi lɔ́kɔfì tibɔti tiba m-tafalin,

¹³ŋyunti ŋun binib dámintí kunyeeu bi-landɔkɔi kóò fikil fikil poonee, ŋyunti ŋun binib dɔ̄ ki gèeǹ fɔ̀rtititee.

¹⁴M nìn fāŋkì ní tiwool kɔ́-mi ní m-wunti bíi jìkì.

¹⁵Kubuŋu kubɔ nìn bíi fátí m-nimbiin ní m-wunti sáǹ yàrrr.

¹⁶Ubɔ nìn yú niin maa béè-u tiŋan, kujiliŋu kubɔ nìn bí m-nimbiin. An nìn dáá ŋmí, ní boonee m dāa gbìl̄ m-neen ŋubɔ pu yii:

¹⁷«Nisaal ŋūǹ kí nīn bí deedee Unimbɔti nimbiinaaa? Unil ŋūǹ kí nīn bí circir un náań-uee nimbiinaaa?

¹⁸Unimbɔti kaa máká u-tuuŋyi pu, u kāntí úǹ u-ba tɔntɔnliibi pu tikpitil ki sòoǹ.

¹⁹Kin ataa aŋa pu ní u làá nīn máká nisaalib pu? Di sá yii kuyɔkɔu ní bi dūu máń-bi ní bi-wunti sá ntam. Baa pée pɔ̄ɔ̄ dimatil kii kugbuluŋgbuŋŋuee ní!

²⁰Unil ŋūǹ kí nīn bí dimaŋfalin kutaafaau, ama ku dāa jóotée, u kpántì un kaa ti bée kí nīn cá jaanjaan, ní ubɔ kaa kpáàa dūu yíiń tiba.

²¹Ŋŋmii ŋun ŋúb́ bi-maŋfalee cúu tīl̀, ní bí kpú kaa kpáàa ká iciin.»