Read Ntcham Job 40 Bible Online

Job 40 - Ntcham bible

Job 40

¹Ti-Dindaan yíiń Yoob ní ki bālifì-u yii[30]:

²Sii un di jáà nì Unimbɔti Mpɔŋkɔdaanee, a làá gíti kpákáǹ-uaaa? Sii un di tìì Unimbɔti isaŋkee, a làá ŋmā kí kíí-uaaa?

³Niinee ní Yoob kíí ti-Dindaan yii:

⁴Maa pée bí tiban. Tilati ní m cáá kí kíí-si ní? M dū m-ŋal ki bīiǹ m-nyɔkɔ pu.

⁵M bàà sòon̄, ama maa ti làá sòoǹ. M sòon̄ tikpil, kɔŋkɔnnee maa ti làá sòoǹ.

⁶Ti-Dindaan kíí Yoob kubuŋkpaaŋŋun yii[31]:

⁷Bɔ́ntí a-ba! Nín̄ sá uninja! M làá bàlifì-si tibɔti ní á kíí-mi.

⁸A là kí lì yii maa sá deedeedaan deeyaa! A là kí kpɔ̀ m-bɔti kí pɔ̀ a-baaa?

⁹A cáá mpɔn kii mama Unimbɔteeee? A-nyɔkɔ cá ndan kii ditaadundeeee?

¹⁰An yaa sá mimmee, dū tinyool nì tikpaandi kí nyɔ̀kɔntì a-ba, dū kunyaaŋŋu nì jilma kí pèen̄[32]!

¹¹Yàntī a-ŋuul ń pōō, kpèè bilambidambi dibaba kí sìntīǹ-bi taapu.

¹²Pée kpèè-bi dibaba ja kí nyīī bi-kɔkɔ kí gùl̄! Nà bikpitib dibool pu niin dúsi dusi.

¹³Dū-bi kí síb́ ntamin dicilpu, dū-bi kí pìin̄ ŋkúm sarka diikun.

¹⁴Niinee ma mun làá gāā ilan kí nyɔ̄ŋkì-si, di sá yii a bàà pɔ́ɔǹ ki jáń ki jíń!

¹⁵Kpèè unaapuyiin, kupeebiliŋŋu. Man di náań-u kii m nín náań si mun puee. U ŋmóò timool kii unaayee ní.

¹⁶Ama kpèè u-caŋ pu pɔŋŋu, kpèè mpɔn ŋun bí u-pool pu nambiliŋ puee!

¹⁷U-juul pɔ̄ɔ̄ kii Seedir dɔŋuee, u-tapaŋŋi cáá igiin in dàfèe.

¹⁸U-kpabiŋ pɔ̄ɔ̄ kii tasa kútee, u-takakal kpabiŋ náań nì tikúti piiŋyi ní.

¹⁹Tin kɔkɔ m náańee poonee, úǹ di līī. Man u-náanliu baba di ŋūǹ kí pɔ̄ɔkiǹ-u.

²⁰Ajoon di tìì-u timool u ŋmóò, ní ipeel māntìi tú-u ki gbíiĺ.

²¹Ama isufi taapu ní u dɔ̀, kupuun, tikati kansikin ní u bāal̀.

²²Isufi cáá i-booŋŋu ki bìintí u-pu, peepiliiyee sufii in bí mbun caŋinee māntìi tú-u.

²³Báà nnyinjil yaa pɔ̄ɔ̄yaaa, an kaa ká-u, báà gba nnyim yaa jɔ́m̀ ki tin bàn̄ u-nyɔkɔnaaa, an kaa sòoǹ nì u tiba.

²⁴Ŋyunti ŋun u yaa wāĺee, ŋma di ŋūǹ kí cúú-u? Ŋma di ŋūǹ kí sàl̄-u kí sāā kí cíĺ u-maŋfal?

²⁵A ŋūǹ kí dū njɔmpiin kí cúú Leefiyatan kupeebiliŋŋuaaa[33]? A ŋūǹ kí dū ŋŋmii kí bóob́ Leefiyatan nyɔkɔ kí táb́aaa?

²⁶A ŋūǹ kí dū kukaluu kí bɔ̄ u-maŋfalinaaa? A ŋūǹ kí dū mpiin kí sāā kí cíĺ unyɔɔkpaweenaaa?

²⁷A dàkafī yii u làá gbàam̀-si kí yúntáaa? U làá sòoǹ nì si anyɔɔbummɔɔnaaa?

²⁸U nì si làá ŋá mpèé ú kpántí a-yumbuu talkuɔɔɔ?

²⁹A làá gbīiliǹ-u kii unooneeee? Àá a làá cúú-u kí gbìn̄ a-binimpubiyaamu ń nīn cáa gbíiĺ?

³⁰Bijɔncuuliibi làá kpāfì kinyɔkɔ kí dū-u kí nyāfàaa? Binyafiliibi làá càkà-u kí nyāfàaa?

³¹A ŋūǹ kí dū mpiin kí sāā kí cíĺ u-gbaŋŋu, àá kí dū kikpaŋ kí sāā kí pùutī u-yilaaa?

³²Dū a-ŋal kí páań u-pu: a yaa téetì dimool din ni làá mɔ̀ee puee, a pée gíti kpá kí ŋá míǹ jaanjaan!