Read Ntcham Job 41 Bible Online

Job 41 - Ntcham bible

Job 41

¹Kpèè, u-nimbiinee unil mákal ŋáań fám ní, unil yaa pée wál̀-uee, u-wunti kúù ní[34].

²Ubɔ kaa wáatì kí táká-u tibɔti. Too, ŋma di sá-u kí jáǹ-mi?[35]

³Ŋma di pīnnì-mi tiba ní an sá ḿ téeǹ udaan? Tin kɔkɔ bí kitiŋ puee, man di yì!

⁴M làá sòoǹ kɔŋkɔnnee Leefiyatan taaŋi pu, ní kí sòoǹ u-pɔŋkpaaŋŋu nì u-nyaaŋku pu.

⁵Ŋma di ŋūǹ kí cúú u-wampeeŋkaati kí cátí nyɔkɔpu pú? Ŋma di ŋūǹ kí sāā kí pùutī u-gbampɔɔl?

⁶Ŋma di ŋúń ki cúú u-nyɔkɔ ki tábitì? Unil yaa pée wál̀ u-nyiŋŋee, dinyoondi cútí-u ní.

⁷Agbampɔɔ ikuul kupaau di bīī u-boon ki síkí ki cúú tɔb tiŋan.

⁸Ipɔkɔ pìl̄ tɔb ní ki síkí síkí áli gba kubuŋu kaa ŋūǹ kí jītí i-kansikin.

⁹Mpɔkɔ kamaa dàb̄ ŋun dī-ŋuee ní i cúú tɔb an píkí, tiba kaa ŋūǹ kí yàkatī-i.

¹⁰Leefiyatan yaa cíiǹee, ŋwalifi nyēē ní, ní u-nimbiin jìl̀ kii ntaafaawìińee.

¹¹Aŋmilimbil nyēē u-nyɔkɔn ní ki ŋmóò an kɔkɔ pu làka laka.

¹²Nnyiim nyēē u-maŋfataabuŋyin, a lì kii daansee un tɔ́kɔ́ ŋŋmi puee, àá ikuŋkum in fōō ŋŋmi ki dùkùee.

¹³U yaa fōotèe, akoon fòol̄ ŋŋmi ní aŋmilimbil nyēē u-nyɔkɔn.

¹⁴Mpɔn ŋubɔ bí u-sil pu, u-nimbiinee, see tifaandi ń cúú-si.

¹⁵Áli gba u-wunti pu laakin bí màlmalee pɔ̄ɔ̄ ki jítiǹ tikúti pu gba.

¹⁶U-pɔbil pɔ̄ɔ̄ ní kaŋkaŋ kii ditaŋkpalee, di pɔ̄ɔ̄ ní kaŋkaŋ kii kunaauee.

¹⁷U yaa yíkìi síl̀ee, inimbɔti fàŋkí, ní i-wunti ń kpú ní í sāǹ.

¹⁸Báà kpaca yaa gāā-uaaa, an kaa kóò, míǹ mbaantiim ní kikpaŋ nì kitàataajiki nì ipiin kaa ŋáań-u tiba.

¹⁹Úǹ ceeyee, kukúluu bí kii timɔkulindee ní, ní tasa kúti bí kii ndɔ ŋun bùkūee.

²⁰Mpiin kaa ŋūǹ kí yàntī ú sāǹ, ní kujaataafuŋ taŋkpal bí kii timɔkulindee.

²¹Ditambɔndi sá u-cee kii ŋkpaŋkpaanee ní, kikpaŋ wooku mɔ̄ úǹ cee tilaal ní.

²²Ataŋkpee ŋin nyɔkɔ cɔ́m̀ee di bīī u-pool pu, u yaa cōom̀ ki jítì tikpati puee, a lì kii dikool ní bi dūu kùn̄ee.

²³U yaa kɔ́ nnyiminee, mi nùuǹ kii bi tɔ́kɔǹ-mì ŋŋmi puee ní, dimɔɔl kpántì kii kikumbɔbiki kin bi cáa tɔ̄kɔntí ŋkpamee ní.

²⁴U yaa jítèe, u yàntī ŋwalifi sàmbiki u-boon, a lì kii tiyikpipin ní bi bóob́ an dēē nnyim min nyóòyee yilpuee.

²⁵Waa cáá juti kitiŋ pu, m náań-u ú taa nín̄ pée fàŋkí tiba ní.

²⁶U kpèé ki sìŋkīǹ u-nannanliibi bin sá bikpaambee, úǹ di sá ipeecuncuti kɔkɔ bɔtiu.