Read Ntcham Job 42 Bible Online

Job 42 - Ntcham bible

Job 42

¹Niinee ní Yoob kíí ti-Dindaan yii:

²M nyí yii a ŋūǹ kí ŋá tikɔkɔ, a ŋūǹ kí ŋá tin kɔkɔ a lèe.

³A lī yii: m sòon̄ kii ugbaanee ki bíil̀ tin a bɔ́ntì kí ŋée. Tiŋman, m sòon̄ tibɔti tin jítiǹ-mee, maa nìn gbìl̀ tì-taapu kaa nyí-tì mun!

⁴A nìn bí yii: «Pīlifì, m làá sòoǹ, m làá bàlifì-si tibɔti ní á kíí-mi.»

⁵Tin bi nìn sòon̄ a-pu m gbìl̄ee baba ní m nìn pée nyí, ama kɔŋkɔnnee, m wál̀-si nì m-nimbil.

⁶An pu ní m kɔ́ntì m-nyɔkɔ tin m sòon̄ee pu, m làá kàl̄ ntamin nì ŋfantamin kí dàkà yii m béè m-yìntitam.

⁷Ti-Dindaan nín sòon̄ nì Yoob míǹ ki dóòyee ní u bí uteemanja Eeliifaasi yii: «M gíí a-pu diŋuul ki kpáaǹ a-bɔɔbi liitil. Di sá yii naa sòon̄ m-pu ibaamɔn kii m-tɔntɔnliu Yoob nín sòon̄ puee.

⁸Kɔŋkɔnnee, ní nyàab̀ inajaa iluli nì ipijaa iluli kí cùú ká m-tɔntɔnliu Yoob. Ni yaa bàn̄ee, ní dū tiwaŋkuti gbanti kí ŋá saraawɔkaa nimbi ni-ba yil pu. Ŋyunti gbantee, Yoob làá nīn bí ki mèé ki tìì-ni. M làá fōō u-wimmeem nì kulaŋŋaŋfitiiu ní kí taa kpèè ni-gbaandi pu kí kɔ́ǹ-ni icoo, min kamaa ní naa sòon̄ m-pu ibaamɔn kii úǹ nín sòon̄ puee.»

⁹Uteemanja Eeliifaasi nì usuwaja Biilidaadi nì unaamaja Soofaar cūtìi ŋá kii ti-Dindaan nín bí yii bí ŋá puee. Ti-Dindaan nìn fōō Yoob wimmeem.

¹⁰Ŋyunti ŋun Yoob nìn bíi mèé ki tìì u-bɔɔbee ní ti-Dindaan fātìi gíiǹ tin kɔkɔ u nìn fōō u-ceeyee ki tīī-u. Yoob gaajawanti tin u nìn cááyee, ti-Dindaan nìn fātìi tīī-u míǹ mili pu ní.

¹¹Niinee Yoob naalib nì u-niisalib nì bin kɔkɔ nìn pée nyí-u njaminee dɔ́miń ki māntì u-pu. Bi nì u nìn kpáfì ki jíń tijin u-dumpu, ní bi dàkā-u dineendi ki ŋméeǹ-u agìń ŋin kɔkɔ ti-Dindaan nìn cáań ki tɔ́ u-puee pu. Míǹ boonee ní báà ŋma pú-u animbil kúti dikúndi diba nì sindaariya bɔmbiki kiba.

¹²Ti-Dindaan nìn bīiǹ Yoob maŋfal wiiŋyi iluŋkikaa pu ki jítiǹ u nín nìn bí puee. Míǹ ní Yoob nìn ká ipii kutukub ubɔ kpá saalku nì igutaamu kutukub biluu nì inajaa in bi kpàl̀ i kù tikpaalee kutukub bili nì mmansalimu kutuku.

¹³U nìn gíti ká mbininjabiyaamu mululi nì nnimpubiyaamu muta.

¹⁴U nìn pú kibinimpubiki kipeekaayee diyindi yii Yeemiima ní ki pú kililiitii yii Keesiiya ní ki pú kitataatii yii Keereem-Apuuki.

¹⁵Kitiŋ kɔkɔ puee, baa nìn kāntí unimpu ubɔ ŋān̄ ki bàn̄ Yoob sapɔmbi. Bi-baa nìn tīī bi mun difakal kii u nín nìn tīī bi-niijab puee ní.

¹⁶Míǹ boonee, Yoob gíti kāl̀ kitiŋ pu abin dilaataal nì imuŋku ili ní. U nìn kāl̀ ki ká u-biyaamu nì u-naantiibi áli anaantitɔntɔkɔ minaa pu.

¹⁷Yoob nìn púĺ ki kāl̀ ki bál̀ ní ki nín kpíì.