Read Ntcham Job 5 Bible Online

Job 5 - Ntcham bible

Job 5

¹Fáá mbiil kí kpèè ubɔ yaa kíí-si. U-tuuŋyi ŋulɔŋu ní a ŋūǹ kí sòoǹ nì ní?

²Ugbaan ŋuul di kù-u, kinaatuui poompooŋyi di yàntī u kúù.

³Tiŋman, m lafun ká an bútì ugbaan, ama maa tāaǹ ní ki tɔ́ u-kɔŋkooŋŋu mbusu yii:

⁴«U-biyaamu ń taa ká dijòońdi! Bí sòoǹ kí kpɔ̀ mu-bɔti kubɔsoondiin, ubɔ ń nīn kpá kí mɔ̄tì mu-pu!

⁵Kun udaan cáńee, bin ŋkùm cááyee ń dūú jī! Bí yòon̄ kí kpáàa búntí, min kamaa bi dū ikuŋkum ki bàkēe! Bin nnyinnyoo cááyee ń gbáb́ kí bìin̄ u-gaajati pu.»

⁶Di sá yii nnaabu kaa nyēeń kitiŋ, míǹ ní falaa mun kaa ti cɔ́tiń kitiŋ.

⁷Ama bi màl̄ unil digìńdi pu ní, a lì kii iŋmiyatiyaal nín yíkí ki ŋàaǹ puee.

⁸Man di yaa bàà sá siiyee, m bàà làá nyàab̀ Unimbɔti ní, úǹ ŋaan ní m bàà làá dū m-bɔti kí ŋá.

⁹U tūǹ atuŋkpaan ŋin nyóò unil kaa ŋūǹ kí gbìl̄ ŋi-taapuee ní. U-maamaaci tuuŋŋi kaa cáá ŋkaan.

¹⁰Úǹ di yàntī utaa nì kitiŋ pu, ki yàntī nnyim nyēeń yilpu ki sɔ̀ŋkī tisati.

¹¹Úǹ di yòontí bin dɔ̄ kitiŋ ki fìlim̀ee yilpu, ní ki yàntī bin kā dikpoolee kāntí mmɔn.

¹²Úǹ di bíiĺ milimilidambi nín bɔ́ntì kí ŋá tiŋyee. Waa yàntī an bútí-bi.

¹³Úǹ di gīintí biciŋfitiibi ciiŋyi ki fàtīi cáa cútí-bi[4], ní ki bíiĺ milimilidambi nín bɔ́ntì puee.

¹⁴Bi gbéetí dibɔmbɔndi ŋwiimpu, ní ki táfí kuwiŋkaŋu pu kii kunyeeuee.

¹⁵Ama Unimbɔti fìil̄ unandaan ki nyāntí bi-nyɔmmun, u fìil̄ ufalaadaan ki nyāntí ubaatandaan ŋaan.

¹⁶Uwɔfi kíǹ ki cáá dimákal, ama Unimbɔti pīiǹ binikpitib nyɔmmu.

¹⁷Kpèè, unil un tafal Unimbɔti dátée bí mmɔnneeee! Míǹ puee Yoob, taa kpèè Unimbɔti Mpɔŋkɔdaan tafadaaldi fám[5].

¹⁸Unimbɔti di tìì unil tiweendi, úǹ di tí nyìitī u-buuŋŋu, úǹ di kù unil ní kí tí cáaǹ-u mun[6].

¹⁹U làá nyāntí-si agìń poon ŋfunyɔm miluu pu, ní nluluútiimee, tikpitil tiba kaa làá ŋá-si.

²⁰Ŋkùm yuntiŋuee, u làá fīī-si kí nyāntí ŋkúm ŋaan, ní kí fīī-si kí nyāntí kitàataajiki ŋaan kujaau yuntiŋu.

²¹Unimbɔti làá wúń a-pu bikuŋfiliibi ń taa ŋá-si tiba, nnaabu yuntiŋuee, aa làá fàŋkì tiba.

²²Nnaabu nì ŋkùm yuntiŋuee, a làá nīn bí ní ki lāā, ní kaa làá fàŋkì ipeel mun.

²³Ataŋkpee kaa làá páb́-si a-saakun, ní ipeel ń kpántí a-bɔɔbi.

²⁴Ŋgbansɔŋfi làá nīn bí a-dicaŋkun. A làá dāá kpèè a-waŋkuti ní kí ká yii kubɔ kaa wáŋkì.

²⁵A làá dāá ká yii a-maaliŋu būtì. A-naantiibi làá dāá nīn bí kii timool nín nyēē kitiŋ pu puee ní.

²⁶A làá dāá púĺ kí bà a-wiiŋyi ní kí nín kpú, kii kudiceeu yuntiŋu bi nín cēē idi kí páań kukaatuŋu pu puee.

²⁷Kpèè, ti nín nyàab̄ ki dāa ká kuŋyee dee, ní an lafun sá ibaamɔn. Pīlifì tiŋan kí dūú kpāafì kí tīī a-ba.