Read Ntcham Job 6 Bible Online

Job 6 - Ntcham bible

Job 6

¹Niinee ní Yoob fōō dinyɔɔbundi ki kíí yii:

²M̀mm, unil yaa bàà ŋūǹ kí ŋmàntī m-gìńdi, unil yaa bàà ŋūǹ kí dū m-nimbinaamandi kí ŋá saniya pu kí ŋmàntī!

³Ama m-nimbinaamandi nyìm̀ ki jítiǹ tiŋku bul. An pu ní m bíi sòoǹ fám fám.

⁴Tiŋman, Unimbɔti Mpɔŋkɔdaan dū u-piiŋyi ki yá-mi, ní m kíǹ ki bíi nyù i-looti. Unimbɔti nyoondi bíi jáà nì mi.

⁵Kumooun maŋki sūǹ ŋyunti ŋun ní timɔsɔn dɔ̄ ki-nimbiin kí ŋmɔ́ee? Àá unaa gíti sūǹ ŋyunti ŋun ní bi tīī-u timool ú ŋmɔ́ee?

⁶A ŋūǹ kí jī tijin kaa ŋá ŋyaam an nīn mɔ̄ɔɔ? Àá mmɔn ŋulɔŋu ní dijindi laakin pīiǹee cáá?

⁷M yíì kí gbēē tijin tin bí mimmee. M-falaau sá tijin tin di núutì-mee ní.

⁸M bàà là yii ubɔ ń ŋá tin m mēēyee kí tīī-mi, Unimbɔti ń tīī-mi kun m lèe.

⁹Unimbɔti yaa bàà kíikí kí nà-mi dúsi dusi, u yaa bàà kíikí kí tàntī u-ŋal kí púntí-mi.

¹⁰M bàà làá yùkū nì dipɔɔpindi digìńdi din poon m bí an kaa kúntí nee, ní kí bàà ká diŋmeendi. Maa bàà làá nyā Unimbɔti circirdaan nyɔɔbuŋŋi boon.

¹¹Ama maa ti cáá mpɔn kí nīn gbíntìi kā ki cɔ́tí. M làá nīn bí dimaŋfalin kí tɔ̄ dilal? Maa cáá foolboon ubɔ dee.

¹²M-pɔŋŋu kaa sá ditaŋkpal pɔŋŋu, ní m-wunti mun kaa tí pɔ̄ɔ̄ kii tasa kútee.

¹³Maa tí cáá mpɔn ŋubɔ m-ni kí ŋmā kí fīī m-ba, ní ubɔ mun kaa ti bí laaba kí tíkiń-mi.

¹⁴Unil un wunti yɔ̄tèe cáá nsan u-juti ń sɔ̄ u-saai, yaa sá fám, u dù Unimbɔti Mpɔŋkɔdaan faaŋku kí fá ní.

¹⁵M-nabiyaamu fātì bi-boon ki tīī-mi kii mbun ŋun fóotèe, a lì kii mbùmbiyaamu mun poon kūńee.

¹⁶Anyintaŋkpee nì ntaayim yaa dūntèe ní dinyiŋgbagbal ń gbí ibun gbanti.

¹⁷Ama ní dipeel puee, ní í fóotí, kutuntuŋu yuntiŋuee ní í kpā dicilpu dicilpu.

¹⁸Kpaŋgulib kaa ti pàatī ibun gbanti cee, bi dūú bɔ̄ kuteeun ní kí tin wāŋkì.

¹⁹Kpaŋgulib bin nyánní Teema tiŋkinee nimbiliŋ nìn cɔ́ i-pu ní, bisaŋkinliibi bin nyánní Seeba tiŋkinee nìn máká i-pu ní.

²⁰Ama an wùn̄-bi bi nín dū bi-mákal ki páaǹ kibùmbikee puee: bi bàn̄ee, kun pu bi nìn mákée ŋá fám.

²¹Ni sá kii ibun gbantee ní ki tīī man ni-bɔɔ! Ni nín ká m-naabuŋuee ní an cúú-ni tifaandi.

²²M bālifì-ni yii ní tīī-mi tibaaa, àá ní lēē ni-gaajawanti poon tiba kí pɔ̄-maaa?

²³M bālifì-ni yii ní fīī-mi kí nyāntí m-nannanliu, àá upɔɔl ubɔ ŋaanaaa?

²⁴Dàkàmaan-mi, m làá ŋmīĺ, dàkàmaan-mi tin poon m yīntèe.

²⁵Tibulcin nyɔɔbuŋŋi kaa tìì unil tiweendi. Ama ní tùkù-mi kun pu ni wòoǹ-mee.

²⁶Ni là kí wòoǹ m-nyɔɔbuŋŋi fám níii? Ama an sá anyɔɔbun fám ní, unil un kaa ti cáá dimákalee nín sòon̄ ki tɔ́ kutaa puee.

²⁷Ni yaa ká kí tɔ̄ ditaŋkpiibil pu kasi, kí dū nimbi ni-ba bɔɔ kí nyāfì, ni là!

²⁸Too, m gbàam̄-ni, kpèèmaan-mi, kí tùkù-mi m yaa bíi mɔ́ntí-ni.

²⁹Ní fàtīí gítímaan ni-boon, nín̄ sámaan deedeedambi. Fàtīí gítímaan! Ní béémaan yii maa ŋá tikpitil tiba.

³⁰Mili mili bɔti nyēē m-nyɔkɔnaaa? Ni dàkafī yii m-limbil kaa gbìl̀ falaa níii?