Read Ntcham Job 8 Bible Online

Job 8 - Ntcham bible

Job 8

¹Niinee ní usuwaja Biilidaadi fōō dinyɔɔbundi ki bí yii:

²A làá nīn pée sòoǹ yéè kí cáá sāā ŋyunti ŋulɔŋu ní? Anyɔɔbun ŋin nyēē a-nyɔkɔnee bí kii kubuŋkpaaŋŋuee ní.

³Unimbɔti pɔ̀ gandaaa? Unimbɔti Mpɔŋkɔdaan kaa sòoǹ tibɔti ti-púɔɔ?

⁴A-jipɔmbi máaǹ ki tin ŋá ikpiti, an pu ní u dáaĺ bi-tafal bi-kpitii pu.

⁵Ama sii, a yaa nyàab̄ Unimbɔti, ki yaa gbāam̀ Unimbɔti Mpɔŋkɔdaan,

⁶a yaa kaa ŋá tiba ní a-pɔbil bí dibee, u làá wúń a-pu ní kí fàtīí tīī-si mpaan ŋun máaǹ-see.

⁷A nín nìn bí min njaminee kaa làá nīn téé a nín làá dāá nīn sá kun foolee.

⁸Bàlifì bin līntiǹ-tee, ní kí dàkafì bi-naanjab nín nìn kántì kántì tiŋyee pu.

⁹Bi màl̄-ti nee, taa yúntì ní kaa nyí tiba mun. Ti-maŋfal wiiŋyi kitiŋ nee pu jītí malaa kii mboonee ní.

¹⁰Ama bíǹ làá dàkà-si ní kí sòoǹ nì si. Bi làá lēē tin bi kāl̀ ki kée poon iciin nyɔɔbundi nee kí tùkù-si yii:

¹¹«Dikal ŋūǹ kí nyā laaba an yaa kaa sá kupuunaaa? Kukaluu ŋūǹ kí nyā laakin nnyim kpéeee?

¹²Nnyim yaa kpée, ku péetíǹ timool tin kíǹee kí kpā, ŋyunti ŋun ku dáá púkuḿ baa láá gāā-kuee!»

¹³Bin súntí Unimbɔti puee nín kúntíǹ puee dee. Binikpitib mákal nín kúntí puee dee.

¹⁴Kun pu bi mákée cúu tīl̀, di sá yii bi-mákal gbanti bí kii tinaŋgbantalindee ní.

¹⁵Bi yaa bàà dīntì bi-diiku puee, ku cìŋkī ní màkà maka, báà bí nyā kí báań ku-pu, see kú lítí.

¹⁶Bi bí kii busubu bun cáá ŋkpiim tikpil ki wīintí ŋwìiń puee ní, bu tòó bu-paŋŋi bukpaa bun poon bu cɔ́ee.

¹⁷Bu tòó bu-nyaaŋyi ataŋkpee kansikin, ní ki nyàab̀ nsan ki kóò ataŋkpee poon.

¹⁸Ama bi yaa kpīkitì-bu mpaan ŋun pu bu nìn yúee, mpaan gbanti làá lì yii màa pée ká-bu jaanjaan.

¹⁹Bin súntí Unimbɔti puee naam nín kúntí laakiŋyee dee! Biba di làá nyā kí fōō bu-paaŋŋu.

²⁰Unil un baa kāntí u-pu tibee, Unimbɔti kaa féeń-u, ní kaa tútúǹ un ŋáań ikpitee.

²¹U làá yàntī á fàtīí ká tilaal, ní kí yàntī á nīn bí dipɔɔpindin ki fàal̀.

²²Icoo làá cúú a-nannanliibi, binikpitib làá wāŋkì.