Read Ntcham Job 9 Bible Online

Job 9 - Ntcham bible

Job 9

¹Niinee ní Yoob kíí yii:

²Tiŋman, m nyí yii an lafun sá míǹ. Di sá yii mana ní unil ŋūǹ kí nīn bí deedee Unimbɔti nimbiin?

³Unil nì Unimbɔti yaa làá kpáká, Unimbɔti kaa làá kíí anyɔɔbun kutuku poonee dibaba gba.

⁴U-ciiŋyi nyóò ní u-pɔŋŋu sá ŋkpaan, ŋma di ŋūǹ kí yūĺ u-nimbiin kaa ká ditafadaaldi?

⁵Úǹ di kpìkitī ajoon dicilpu dicilpu ní ki lábití-ŋi ki cìb̀ u-ŋuul poon.

⁶U yàntī kitiŋ nyeel cìŋkī, u yàntī ki-jaantalkub kpìntī.

⁷Úǹ di tìì ŋwìiń mara ní ŋú taa nyā, ní kí dū iŋmalbijaa kí pìin̄ kudii í taa ŋmíntí.

⁸Úǹ baba di kpátì kutagbɔŋu, ní ki dū u-taaŋi ki tɔ́kɔǹ tiŋkub nyiŋgbanti pu ki cōom̀.

⁹Úǹ di náań iŋmalbi kitiŋi nín bí pu aba abee: dikitil din bí ŋgan púee nì din bí ti-yil kansikinee nì din bí ŋgiil púee[8].

¹⁰U tūǹ atuŋkpaan ŋin ubɔ kaa ŋūǹ kí gbìl̄ ŋi-taapuee, ní ki ŋáań maamaaci tuuŋŋi ŋin kaa cáá ŋkaanee.

¹¹Kpèè u ŋūǹ kí jītí m-caŋin ḿ taa wāl̀-u, ní u yaa tí búntì ndanaaa, maa làá kpáàa béé.

¹²U yaa fìkī tiba, ŋma di ŋūǹ kí yàntī ú fàtīí gíiǹní-tì? Ŋma di ŋūǹ kí bàlifì-u yii: «Ba ní a ŋáańee?»

¹³Unimbɔti yaa gíí diŋuulee, waa gítí u-boon. Tipeebilindi tin bí tiŋkunee dòoń ki gbàantí u-taaŋi taapu, an dàkà yii Raab nì u-naacimbi.

¹⁴Kin mana ní man un bí nee, m làá ŋmā kí kíí-u? La ní m làá ká anyɔɔbun kí dūú kíí-u?

¹⁵Báà m yaa cáá ibaamɔn, maa làá ŋmā kí kíí-u. Kun m pée ŋūǹ kí ŋée di sá ḿ mèè m-bɔsoonliu ú sɔ̄ m-saai!

¹⁶Báà m yaa yíiń-u ní u kíí-mi, maa máká yii u làá pīlifiǹ m-nyɔkɔ.

¹⁷U yāntì u-buŋkpaaŋku fáá-mi ki lúkú, u bíi tìì-mi tiweendi fám.

¹⁸Waa yàntī ḿ fòotī báà fiii, ama ní ki yāntì m-nyɔkɔ túŋkì.

¹⁹Mimmee man nì Unimbɔti ń mɔ̀ɔɔ? Báà an yaa sá dimool, u pɔ̄ɔǹ-mi sɔ́kɔ sɔkɔ! Ḿ cùnnì-u ibɔsoonaaa? Báà an yaa sá ibɔsoonaaa, ŋma di làá yíiń-u tibuul ní?

²⁰Báà m-bɔti yaa ŋān̄aaa, tin m làá sòoǹee làá fàtīí kpɔ̀ m-bɔti. Báà m yaa kaa ŋá tibaaa, m-nyɔɔbuŋŋi làá tīī-mi dibɔkpil.

²¹Maa kalin ŋá tibaaa? Maa ti kpáàa nyí gba. M gīiǹ nì m-ba ní.

²²Man ceeyee, a ŋá tibaaa, aa ŋá tibaaa, an sá ubaanti ní. An pu ní m lì yii: Unimbɔti yàntī maanyiiba nì dibɔkpil daan kúù.

²³Nnaabukpaan ŋubɔ yaa jéetì kitiŋ pu ki kūū binibee, Unimbɔti bí ní ki lāā maanyiibab bi-nimbinaamandi poon!

²⁴Unimbɔti yaa dū duulinya ki líiǹ binikpitibee, ní ú bìin̄ bibɔsoonliibi nimbiin! An yaa kaa sá úǹ di ŋáań míǹ, ŋma di gíti ŋūǹ kí ŋá míǹ?

²⁵M-maŋfal wiiŋyi sáń malaa malaa ki jítiǹ utaatanli, i sáǹ kaa kpáàa ká nnaam ki dáká.

²⁶M-maŋfal wiiŋyi sáń malaa malaa kii meelabee, a lì kii ukaabu nín tòó pu yilpu kí cúú u-jintee.

²⁷M yaa bàà bí yii m làá súntí m-yaliŋkii pu, kí bútí m-nimbiin kí lēe,

²⁸ní falaa un poon m bée fàantí-mi. Di sá yii m nyí sii Unimbɔti nín kaa làá sòoǹ kí pɔ̀-mee.

²⁹Kii a nín sòon̄ ki kūū m-bɔtee, ba pu ní ḿ gíti tīī m-ba digìńdi fám?

³⁰Báà m yaa dū fɔfɔ ki fùl̄ ki dū njeem ki fíntì m-ŋalii,

³¹a làá fàtīí gíiǹ-mi kí tɔ̄ tikpatin, ní m-wampeeŋkaati gba kaa dāa gíti là-mi.

³²Di sá yii Unimbɔti kaa sá unil kii mamee ḿ ŋmā kí kíí-u, àá ḿ ŋmā man nì u ń cù ibɔsoon.

³³Upàtil ubɔ mun kpá kí ŋmā kí dū u-ŋal kí páań ti-liitil pu kí pàtī-ti.

³⁴Udaan bàà fòol̄ mbambaan ŋun Unimbɔti cáa gbáà-mi nee, ní kí yàntī ú taa ti fàaǹ-mi.

³⁵M bàà làá ŋmā kí sòoǹ nì u kí taa fàŋkì. Ama míǹ ní an kaa sá, maa ti yì m-ba.