Read Ntcham Psaumes 103 Bible Online

Psaumes 103 - Ntcham bible

Psaumes 103

¹Daafiidi di ŋmàn̄ nlan nee. M làá jāam̀ ti-Dindaan nì m-naŋki kɔkɔ, m làá jāam̀ u-circir yindi nì m-pɔbil kɔkɔ.

²M làá jāam̀ ti-Dindaan nì m-naŋki kɔkɔ, kaa làá súntí u-ŋanti báà tiba pu.

³Úǹ di cáá m-yìntitam kɔkɔ ki pūǹ-mi, ní ki cāantí m-weeŋyi kɔkɔ.

⁴U nyāntí-mi ŋkúm bookun, ní ki cáá dineeŋkpaandi nì disaasɔl ki cīkintí-mi kii kibeefuuliiyee.

⁵U tìì-mi tiwammɔntiil m-puti poon, u yàntī m fàtīi kpántí unipɔɔn kii ukaalunee.

⁶Ti-Dindaan tūǹ deedee tuuŋŋi, u sòoǹ bin kɔkɔ bi sàantée bɔti nì ibaamɔn.

⁷U nìn yāntì Mooyiisi béè u-sàmbiyaamu, ní Isirayeel yab béè u-tuŋkpaaŋŋi.

⁸Ti-Dindaan poon mɔ̄ ní ki cáá kulaŋŋaŋfitiiu, waa gífí diŋuul malaa ní u-neendi wīikí tikpilku[149].

⁹Waa sòoǹ unil bɔti kaa gbèentí, kaa tí díkì ubɔ pu an kaa kúntí.

¹⁰Waa dátí ti-tafal kii ti-kpitii nín bàà máaǹ puee, waa tí pà ti-yìntitam paati nín bàà máaǹ puee.

¹¹Kii kitiŋ nì kutagbɔŋu nín dátì nì tɔb puee, míǹ ní dineeŋkpaandi din u cáá bin fàŋkí-uee puee wīikí.

¹²Kii ŋwìiń nyalaŋki nín dátì nì ŋu-jeetilaŋki puee, míǹ ní u kàkatī ti-kpitii ki wàatī-ti.

¹³Kii ubaati poon nín mɔ̄ u-biyaamu pu puee, míǹ ní ti-Dindaan mun poon mɔ̄ bin fàŋkí-uee pu.

¹⁴Di sá yii úǹ nyí kun u dūu máń-tee, waa súntí yii ntam ní ti sá.

¹⁵Unilee, u-maŋfal wiiŋyi bí kii kumoouee ní, kii tisatin supumpukumee, míǹ ní u púkuḿ.

¹⁶Di sá yii kubuŋu yaa fáá nsupumpukumee, mì wáŋkí ní, aa ti béetí laakin mì nìn bée.

¹⁷Ama ti-Dindaan neeŋkpaandi bí bin fàŋkí-uee pu ní ki cá talku. U-deedeeu làá nīn bí bi-naantiibi pu,

¹⁸ŋyunti ŋun bi yaa ŋúb́ u -poondi ní ki dàkafī kí ŋá u-bɔkpaaŋi nín bí yii bí ŋá puee.

¹⁹Ti-Dindaan dū u-beejal ki yóoǹ yilpu, ní ki jīǹ dibeel tin kɔkɔ pée bée pu.

²⁰Jāam̀maan ti-Dindaan, nimbi u-tuuŋyi in di cáá mpɔn ki ŋáań u-nyɔɔbundi nín lī puee, ki tɔ́-u ŋyunti ŋun ni yaa gbìl̄ u-nyɔkɔpuee.

²¹Jāam̀maan ti-Dindaan, nimbi u-janjakitiŋ kɔkɔ, nimbi u-tɔntɔnliibi bin ŋáań u nín là puee.

²²Ní jāam̀maan ti-Dindaan nimbi u-wannaaŋkaati, laakin kamaa ní ni yaa bí u-beelinee. M làá jāam̀ ti-Dindaan nì m-naŋki kɔkɔ.