Read Ntcham Psaumes 104 Bible Online

Psaumes 104 - Ntcham bible

Psaumes 104

¹M làá jāam̀ ti-Dindaan nì m-naŋki kɔkɔ! Ti-Dindaan m-Nimbɔtiu, a sá ukpaan tikpilku! Tinyool nì jilma ní a pēē,

²ní ki dū ŋwalifi ki bīiǹ a-ba pu kii dibɔkutikpaandee. A kpátì kutagbɔŋu kii tantee.

³A máń a-kɔŋkooŋŋu inyiŋfi in bí yilpuee pu. Atagban di sá-si janjatɔrɔku, a còom̄ kubuŋu feeŋyi pu ní.

⁴Kubuŋu di sá a-tuuŋyi, ní aŋmilimbil sá a-tɔntɔnliibi[150].

⁵A dū kitiŋ ki tɔ́kɔǹ ki-nyeel pu, kì kpá kí cìŋkì ŋwindal.

⁶A dū tiŋku ki bīiǹ ki-pu kii dibɔkutilee, inyiŋfi nìn bīī ajoon pu.

⁷Ama ní a kpātì i-pu ní i sáǹ ki kátì. A téeń i-pu kii ditaadundee ní i sáǹ

⁸ki dàb̄ ajoon, ki sīntì atantakan ki nín cá laakin a bɔ́ntì ki síiǹ-iee.

⁹A síiǹ-i kikpaanyɔkɔ kin iaa máaǹ kí pùub̀ kí jītée, án nín làá ŋá pu i taa ti dāan̄ kí bìin̄ kitiŋ puee.

¹⁰A cáǹ nnyim min nyēē anyimbulnimbilinee ibunni, mì pùub̀ ajoon kansikin,

¹¹ní ipeel kɔkɔ dòoń ki nyù. Niin ní kumooun mammu nyù.

¹²Inoon kóò ki kɔ́ĺ-mì, ní ki gà ilan tifaalin.

¹³A yàntī utaa nyēeń yilpu ki nì ajoon pu, a yàntī nnyim bà kitiŋ.

¹⁴Sii di yàntī timool nyēē ní tiwaŋkuti kāntí ki jīǹ, ní ki yàntī tin unil kùee nyēē. Kitiŋ di tìì unil u-jikaati.

¹⁵Kíǹ di tìì unil ndaam min u nyù an mɔ̄ǹ-uee, ki tìì-u ŋkpam min u ŋmìtī u-nimbiin ŋān̄ee, ní ki tìì-u tijin tin u jīǹ ki kāntí mpɔnee.

¹⁶Ti-Dindaan sufii kāntí ntaanyim min máaǹee, Leebanɔn sufii in u cóoǹ bi yíì seediree.

¹⁷Inoon pāantí i-diti i-pu, ní naakpaapiimbi kóò siipreesi sufii pu.

¹⁸Njooŋɔjamu kóò ajoon ŋin fɔ̀kɔ̀ee pu, ní itaŋkpalɔkɔ sá ŋkɔŋkoon ki tīī ijangbeenapul.

¹⁹A náań uŋmal tí nīn cáa béetí iyunti, nì ŋwìiń ŋu nyí kukúluu kun ŋu máaǹ kí jēetée.

²⁰A yaa cáań dibɔmbɔndee ní kunyeeu ń mɔ́, ní kubambaŋŋun peelii kɔkɔ ń kíĺ ki bíi còom̄.

²¹Agbikintipɔmbil mùuǹ ki nyàab̀ upeel kí ŋmɔ́, ní ki bàlifī sii Unimbɔti á tīī-ŋi ŋi-jinti.

²²Ŋwìiń yaa nyáńee ní ŋí jītíi kɔ́ kí dòon̄ ŋi-diiŋŋin,

²³ní unil ń nyā kí búntí u-tundi, kí gbàfì kí cáá sāā kujoou.

²⁴Ti-Dindaan, a-tuuŋŋi wīikéeee! A dū iciin ní ki ŋá atuun gbanti kɔkɔ, a-wannaaŋkaati di gbí kitiŋ kɔkɔ.

²⁵Kpèè tiŋku di dɔ̄ pàaa kí cée, tiwaŋkuti tikpaandi nì ŋwaamu gbí poon an kaa cáá ŋkaan.

²⁶Meelab tɔ́kɔ́ u-pu ki cá ki gítiń, ní kupeebiliŋŋu Leefiyatan kun a náańee bí u-poon ki gbíiĺ.

²⁷Tiwaŋkuti gbanti kɔkɔ máká a-pu á tīī-tì tijin ŋyunti ŋun a máaǹee tí jī.

²⁸A yaa tīī-tèe ní tí yòon̄ kí jī, a yaa tāntì a-ŋalee ní tí ká kí jī kí díkí.

²⁹Ama a yaa fātì a-boon ki tīī-tèe, ní tifaandi ń cúú-tì. A yaa cúú ti-fooku ki lēēyee ní tí kpú kí fàtīí gítí ntamin.

³⁰A yaa tīī-tì a-fookuee, a náań-tì dee, ní kí fàtīí pɔ̀ntī tikɔkɔ kitiŋ pu.

³¹Ti-Dindaan nyooti ń nīn bí ki cá jaanjaan! An nīn mɔ̄ǹ ti-Dindaan u-tuuŋŋi pu!

³²U yaa kpēē kitiŋee, kì cìŋkī ní, u yaa gbēē ajoonee, ŋi dùkù ní.

³³M-maŋfal wiiŋyi kɔkɔ poonee, m làá gāā ilan kí pàkà ti-Dindaan, iwiin in kíǹ-mi nee, m làá dūú gāā ilan kí nyɔ̄ŋkì m-Nimbɔtiu ní.

³⁴M-yaliŋkii ń nīn fáatiǹ-u. Mamee, ti-Dindaan pu ní m làá nīn fàal̀.

³⁵Bikpitiŋaliibi ń kúntí kitiŋ pu, binikpitib ń taa ti nín̄ bí! Tiŋman, m làá jāam̀ sii ti-Dindaan! Aleeluya, nyɔ̄ŋkìmaan ti-Dindaan!