Read Ntcham Psaumes 105 Bible Online

Psaumes 105 - Ntcham bible

Psaumes 105

¹Ní nyɔ̄ŋkìmaan ti-Dindaan kí yòon̄ u-yindi yilpu, ní yàntīmaan anibul kɔkɔ ń béé u-tuŋkpaaŋŋi.

²Ní gāāmaan ilan kí pàkà-u, kí gāā ilan kí nyɔ̄ŋkì-u, ní dàkafìmaan u-maamaaci tuuŋŋi kɔkɔ pu.

³Nimbi bin nyàab̀ ti-Dindaanee, án nīn mɔ̄ǹ-ni u-circir yindi pu, ní nīn bí dipɔɔpindin.

⁴Ní nyàab̀maan ti-Dindaan nì u-pɔŋŋu, nyàab̀maan kí nīn bí u-nimbiin.

⁵Ní téetímaan maamaaci tuuŋŋi ŋin u ŋáaǹee nì u-tuŋkpaaŋŋi pu, nì ibɔsoon in kɔkɔ ní u sòon̄ee.

⁶Nimbi u-tɔntɔnliu Abraam naantiibi, nimbi Jaakɔb naantiibi bin u lēēyee, téetímaan.

⁷Úǹ di sá ti-Dindaan ti-Nimbɔtiu, úǹ di sòoǹ kitiŋ pu nib kɔkɔ bɔti.

⁸Waa pée súntí u-poondi pu dalba dalba, tibɔti tin u yóoǹ án nīn sá mara ki tīī anaantitɔntɔkɔ kutuku puee[151].

⁹Dipoondi gbanti ní u nìn pōoǹ Abraam, díǹ ní u nìn pūtì ki pōoǹ Isaaki mun[152],

¹⁰díǹ ní u nìn dūu síiǹ Jaakɔb dibɔkpaal, talku poondi gbanti ní u nìn pōoǹ Isirayeel[153],

¹¹ki lī-u yii: «M làá tīī-si Kanaan tiŋki, án nīn sá sii nì a-naantiibi wanti[154].»

¹²Baa nìn náaǹ báà fiii, bi nìn pée sá binikaaŋkaabi ní ki kāl̀ niin kunicaŋu[155].

¹³Bi nìn kàal̀ atimbun ní ki kpántí, ki kàal̀ dibeel diba poon ní ki yíkí ki nìkì din kíǹ poon.

¹⁴Ama Unimbɔti kaa kíí báà unil ń sàaǹ-bi, bi-pu ní u dáaĺ bibɔtiibi tafal ki lī yii:

¹⁵«Ní taa gbēē bin m lēēyee, ní taa pée ŋá m-bɔnaatiliibi tikpitil tiba[156].»

¹⁶U nìn cáań ŋkùm kitiŋee pu, tijin kaa nìn gíti bí binib ń jī.

¹⁷U nìn dū unil ubɔ ki tú bi-nyɔkɔpu, Jooseefi un bi nìn nyáfì u kpántì uyumbuee[157].

¹⁸Bi nìn bá u-taaŋi akpambaa, bi nìn dū ikusaka ki tɔ́ u-neen[158],

¹⁹ki cáá sāā ŋyunti ŋun ní tin u nìn sòon̄ee dāa jítì míǹ deedeedeeyee. Ti-Dindaan nyɔɔbundi nìn cɔ́ŋkì-u ki pɔ̀n̄-u[159].

²⁰Ubɔti nìn pú kinyɔkɔ bí báatí-u u-kpambaaŋi, anibul kpiliu nìn yāntì bi líì-u[160].

²¹U nìn dū-u ki kāaǹ u-dicaŋku pu ukpil, ní ki nìn yāntì u kpòotī tin kɔkɔ u cááyee[161],

²²kí ŋmā kí dàkà u-bɔtibiliŋ u nín là puee, ní kí ŋmā kí tīī bitindaŋkpilib iciin.

²³Míǹ boonee, Isirayeel nìn cūtì Eejipiti tiŋkin, Jaakɔb nìn kpántì unicaan Kaam tiŋkin[162].

²⁴Ti-Dindaan nìn pú u-nibul mmaal ní ki tīī-bi mpɔn ki jítiǹ bi-nannanliibi.

²⁵U nìn cúú Eejipiti yab pɔbiliŋ ki kpántì, bi nìn kíǹ ki ná u-nibul ní ki nìn ŋmātiǹ u-tɔntɔnliibi[163].

²⁶Niinee ní u dū u-tɔntɔnliu Mooyiisi nì Aarɔn un u nìn lēēyee ki tú[164].

²⁷Unimbɔti nìn yāntì bi ŋáaǹ maamaaci daanti Eejipiti tiŋkin, bi nìn ŋáaǹ maamaaci tuuŋŋi Kaam tiŋkin.

²⁸Unimbɔti nìn cáań dibɔmbɔndi ní an dūu mɔ́, ama báà ubɔ kaa nìn kpákáǹ u-nyɔɔbundi.

²⁹U nìn yāntì nnyim kpántì fatiku ní ki yāntì ijɔm in bí mi-poonee kpíì[165].

³⁰Kpaabi nìn gbí Eejipiti tiŋkin ki kpáaǹ bi-bɔtiu diiŋŋin[166].

³¹Unimbɔti nìn sòon̄ ní ikpiŋki dɔ́miń ní inaacib gbí kitiŋ kɔkɔ pu[167].

³²An nín bàà sá utaa ń nèe, u nìn yāntì ataanyiŋkumbil di lítì, ní utaa tɔ́ ní bi-tiŋki fōō ŋŋmi,

³³ki bíil̀ bi-fiinyi nì bi-fiigi sufii, ní ki kɔ́fì bi-tiŋki pu sufii[168].

³⁴Unimbɔti nìn tí sòon̄ ní inaakicaan, nì inaakitoon in baa ŋūǹ kí kàaǹee dɔ́miń.

³⁵I nìn ŋmɔ́ bi-tiŋki pu mooti kɔkɔ, i nìn ŋmɔ́ kitiŋ nín lòon̄ tikpaajin tiŋyee[169].

³⁶U nìn kūū Eejipiti yab biseebiyaamu nninjabiyaamu kɔkɔ, mun bi péé ki màl̄ ŋyunti ŋun bi-fatikuu dáá tùm̀ee[170].

³⁷U nìn nyántì u-nibul bi tú animbil nì sindaariya[171]. Bi-naakɔti kansikinee, ubɔ kaa nìn gbíntì boon.

³⁸Bi nín nyáńee, an nìn mɔ́ɔkiǹ Eejipiti yab, di sá yii dinyoondi nìn kɔ́-bi[172].

³⁹U nìn kpátì ditagbandi ki bīiǹ bi-pu, ní ki dū ŋŋmi ki ŋmíntì-bi kunyeeu[173].

⁴⁰Bi nìn mēē ní u yāntì njikpacimamu dɔ́miń, u nìn dū yilpu jinti ki kpíiǹ-bi[174].

⁴¹U nìn yāntì ditaŋkpal poon nnyim nyáń[175], ki pùub̄ ki jítì kuteeu pu kii mbunee.

⁴²Di sá yii waa nìn súntì u-circir poondi din u nìn pōoǹ u-tɔntɔnliu Abraamee pu[176].

⁴³U nìn nyántì u-nibul nì ifaal, bin bin u nìn lēēyee iwiliili poon.

⁴⁴U nìn fōō atimbun aba timmu ki tīī-bi, ní bíǹ jíń anibul aba tuuŋŋi paati[177],

⁴⁵án nín làá ŋá pu bí nīn ŋúb́ u-bɔkpaaŋi kí nīn tɔ́ u-marabee. Aleeluya, nyɔ̄ŋkìmaan ti-Dindaan!