Read Ntcham Psaumes 106 Bible Online

Psaumes 106 - Ntcham bible

Psaumes 106

¹Aleeluya, nyɔ̄ŋkìmaan ti-Dindaan! Tí nyɔ̄ŋkì ti-Dindaan, di sá yii u ŋān̄, ní u-neeŋkpaandi bí ki cá jaanjaan[178].

²Ŋma di ŋūǹ kí sòoǹ ti-Dindaan tuŋkpaaŋŋi pu? Ŋma di làá yàntī bí gbìl̄ u-nyɔŋkii pu?

³Bin ŋúb́ Unimbɔti marab, ki ŋáań ŋyunti kamaa tin bí deedeeyee bí mmɔnneeee!

⁴Ti-Dindaan, a yaa bíi dàkà a-nibul a-ŋantee, á téetí m-pu! Jòoń-mi a-fiil pu.

⁵Yàntī ḿ ká bin a lútèe naam, kí yàntī ḿ fàal̀ nì a-nibul ní kí nīn bí dipɔɔpindin nì bin sá a-yabee.

⁶Ti ŋá ikpiti kii ti-baabee, ti ŋá tin kaa kítèe ki fōō dibɔkpil.

⁷Ŋyunti ŋun ti-baabi nìn bí Eejipiti tiŋkinee, baa nìn gbìl̄ ti-Dindaan maamaaci tuuŋŋi taapu. Bi nìn súntì u-neeŋkpaandi din u dàkā-bi ŋfunyɔm tikpilee pu, bi nìn jáń nì u dimɔɔl caŋin, Tikati mɔɔl caŋin[179].

⁸Ama úǹ u-ba yindi puee, u nìn fīī-bi, ki lēē u-pɔŋŋu ki dàkā.

⁹U nìn kpātì Tikati mɔɔl pu ní díǹ fóotì. U nìn yāntì bi cōom̀ dimɔɔl poon kii bi nín còom̄ kuteeun puee.

¹⁰U nìn fīī-bi ki nyántì bin kaa nìn là bi-bɔtee ŋaan, u nìn dá-bi bi-nannanliibi ŋaan ki líì.

¹¹Nnyim nìn fātìi gbí ki léeǹ bi-nannanliibi pu, bi-kansikin báà ubɔ kaa nìn kíǹ[180].

¹²Niinee ní bi fōō Unimbɔti nyɔɔbundi ki kíí, ní ki gāā ilan ki nyɔ́ŋkì-u[181].

¹³Ama an kaa nìn pée súŋkì ní bi súntì tin u ŋée pu, baa nìn cíitì ú ŋá tin u nìn bɔ́ntì kí ŋée.

¹⁴Bi nìn ŋá nnimbitaataam kuteeun. Laakin ubɔ kaa nìn bée, bi nìn cɔ́ŋkì Unimbɔti.

¹⁵U nìn tīī-bi tin bi nìn bālifèe, ama ní ki dū didúntil weeŋŋu ki tɔ́ bi-pu.

¹⁶Bi nìn ŋá Mooyiisi pu ipoompoon dinaapaal pu ki kpáaǹ Aarɔn un ní bi nìn dūu sú ti-Dindaanee.

¹⁷Kitiŋ nìn cúu látì ní ki dū Daatan ki náĺ, kì nìn bīiǹ Abiiram kitil pu.

¹⁸Ŋŋmi nìn wùn̄ dikitil gbanti kɔkɔ, aŋmilimbil nìn wùn̄ binikpitib gbanti[182].

¹⁹Bi nìn mɔ́ɔ́ dinabil Ooreeb jool taapu, bi nìn dū tikúti ki mɔ́ɔ́ diwaal ki gbāaǹ ki jáam̀-dì.

²⁰Bi nìn dū unaa un ŋmóò timoolee naŋku ki kpántì Unimbɔti un sá bi-nyootee.

²¹Bi nìn súntì Unimbɔti bi-fiiliu un di nìn túń atuŋkpaan Eejipiti tiŋkinee pu.

²²Bi nìn súntì maamaaci tuuŋŋi ŋin u nìn ŋá Kaam tiŋkinee, titumbilindi tin u nìn ŋá Tikati mɔɔl caŋinee.

²³Unimbɔti nìn lēē yii u làá kúntí-bi, ama Mooyiisi, unil un u nìn lēēyee nìn yúl̀ u-nimbiin ki pīiǹ-u nsan ú taa kpɔ̀-bi u-ŋuul poon.

²⁴Míǹ boonee, bi nìn kpēē kitimmɔntii nee fám, di sá yii baa nìn fōō Unimbɔti poondi ki kíí.

²⁵Bi nìn bí bi-tantibin ki gbùkum̄, baa nìn tɔ́ ti-Dindaan nyɔkɔ.

²⁶Niinee ní u yōoǹ u-ŋal yilpu ki pūtì kí kpɔ̀-bi kuteeun[183],

²⁷kí jà bi-naantiibi bí yàl̄ atimbun kɔkɔn, ní kí yàntī bí kpú nnicantimun[184].

²⁸Bi bàn̄ Peewɔɔree ní ki kíĺ ki bíi tòotī diwaal Baal, ní ki ŋmɔ́ tiwaŋkuti tin bi dūu tōotì bitaŋkpiibee nanti.

²⁹Bi nìn ŋá míǹ ki gbítì Unimbɔti ŋuul ní nnaabu jéetì bi-pu.

³⁰Ama Piinaasi nìn yíkìi yúl̀ ki ŋáŋkì tibɔti, ní nnaabuee gbēeǹ.

³¹An pu ní ti-Dindaan yíiń-u deedeedaan kí nīn pée cáa cá abin abin[185].

³²Bi nìn tí gbítì ti-Dindaan ŋuul Meeriiba nyimbuliŋu caŋin, ki kɔ́ǹ Mooyiisi digìńdin.

³³Bi nìn kɔ́ Mooyiisi poon ki lēē baadakam, ní úǹ sòon̄ kaa dākafì[186].

³⁴Ti-Dindaan nín nìn bí-bi yii bí kpɔ̀ kí céetí atimbun ŋiŋyee, baa nìn ŋá míǹ[187].

³⁵Ama bi nì binib bin kaa nyí Unimbɔtee nìn ŋá mpèé ní bi bífì bi-koobiliŋ ki kíǹ ki ŋáań míǹ.

³⁶Bi nìn tōotì bi-waaŋi ní ŋíǹ kpántì-bi kutaliŋŋu[188].

³⁷Bi nìn kūū bi-jipɔmbi nì bi-bisalib ki ŋá saraabi ki tīī arasiniibi[189].

³⁸Bi kūū maanyiibab, ki kūū bi-jipɔmbi nì bi-bisalib ki ŋá saraa ki tīī Kanaan yab waaŋi. Bi kūū binib míǹ ki kɔ́ǹ kitiŋ tijɔkɔndi[190].

³⁹Bi-tuuŋŋi gbanti kɔ́ǹ-bi tijɔkɔndin, bi-bimbim yāntì bi kpántì kii kinimpulaakpaayee[191].

⁴⁰Niinee ti-Dindaan fōō u-nibul pu diŋuul, u nìn kíǹ ki ná bin sá u-yabee.

⁴¹U nìn dū-bi ki líì nì atimbun aba, u nìn dū-bi ki ŋá bi-nannanliibi taapu.

⁴²Bi-nannanliibi nìn sāaǹ-bi ní ki nyīī-bi ki múĺ bi-taapu.

⁴³Iyunti tikpilee, ti-Dindaan nìn fīī-bi, ama bíǹ nìn gbíntìi jáà nì u, ní ki nìn mɔ̀tīi múl̀ bi-kpitii poon.

⁴⁴Ti-Dindaan nìn ká dinimbinaamandi din poon bi bée ŋyunti ŋun ní u gbìl̄ bi-biilii puee.

⁴⁵U nìn téetì dipoondi din u nìn pōoǹ-bee pu. U-neeŋkpaandi puee, u nìn kpántì u-landɔkɔŋu.

⁴⁶U nìn yāntì bin kɔkɔ cúú-bi ki cūnnì kuyuŋuee súń bi-saai[192].

⁴⁷Ti-Dindaan ti-Nimbɔtiu, fīī-ti! Nyāntí-ti atimbuncaan ŋaan kí kóoǹ-ti kí kpāfì. Niinee ní tí jāam̀ a-circir yindi, ní kí nīn nyɔ́ŋkí-si dipɔɔpindin.

⁴⁸Tí jāam̀ ti-Dindaan, Isirayeel Nimbɔtiu kí nīn cáa cá jaanjaan. Ní samaa kɔkɔ ń kíí yii: «Ameeni! Tiŋman, an lafun ŋá míǹ! Aleeluya, Nyɔ̄ŋkìmaan ti-Dindaan!»