Read Ntcham Psaumes 108 Bible Online

Psaumes 108 - Ntcham bible

Psaumes 108

¹Nlan. Daafiidi di ŋmàn̄ nlan nee.

²M cáá dimákal, m-Nimbɔtiu, m làá gāā nlan kí nyɔ̄ŋkì-si nì m-naŋki kɔkɔ.

³Iŋmii saalaa beeku nì saŋgu, fìntīmaanee, m làá péeǹ kutaa kí fìntī.

⁴Ti-Dindaan, m làá nyɔ̄ŋkì-si anibul kansikin, m làá gāā ilan kí pàkà-si atimbun kansikin.

⁵Di sá yii a-neeŋkpaandi wīikí ki jítiǹ kutagbɔŋu, ní a-baamɔŋyi wīikí ki tin sāā atagban.

⁶Unimbɔti, a sá ukpaan ki jítiǹ kutagbɔŋu, yàntī a-nyooti ń gbí kitiŋ kɔkɔ!

⁷Dū a-pɔŋkpaaŋŋu kí fīī-ti kí fōō ti-wimmeem, án nín làá ŋá pu a-nib bin a néeńee ń ká difiilee.

⁸Unimbɔti sòon̄ u-circir diiku poon. M jáń ki jíń! M làá yàkatī Siikeem tiŋki, ní kí ŋmàntī Sukooti tantakal.

⁹Man di yì Galaadi, man di tí yì Manasee mun. Eefiraayiim di sá man janjafuuliiki, ní Juuda sá m-beel pɔŋŋu.

¹⁰Moowaab sá kusampeeu kun poon m fùul̀ee ní. M tákatì m-naatakal ki lúkú Eedoom tiŋki pu[195], m fátí dijajil kuŋkuuntii Fiiliistii tiŋki pu.

¹¹Ŋma di làá cùnnì-mi kitiŋ kin bi máń digundi ki túee poon ní? Ŋma di làá cùnnì-mi Eedoom tiŋkin,

¹²an yaa kaa sá sii Unimbɔti un di dū-ti ki fá, kaa ti cēentí ti-janjakitiŋee?

¹³Dāá tūtuǹ-ti tí já nì unannanli, di sá yii unil tūtuntam sá fám ní.

¹⁴Unimbɔti yaa bí ti-ceeyee, ti làá já kí jī, úǹ di làá tāā kí mátí ti-nannanliibi.