Read Ntcham Psaumes 109 Bible Online

Psaumes 109 - Ntcham bible

Psaumes 109

¹Daafiidi di ŋmàn̄ nlan nee ki tīī bilaŋgaaliibi kpiliu. Unimbɔti un m nyɔ́ŋkée, taa nín̄ ŋmí míǹ,

²di sá yii binikpitib nì binyimɔndambi kɔ́kɔĺ-mi, bi sòoǹ ki bíiĺ-mi.

³Bi nín ná-mi ki sòoǹ tiŋyee māntìi tú-mi an kɔkɔ pu, maa ŋá-bi tiba ní bi jáà nì mi.

⁴M yaa bíi dàkà-bi m-neendee ní bíǹ bí ki kɔ́kɔĺ-mi, ama ní m mèé ki tìì-bi.

⁵M yaa ŋá-bi tiŋanee, tikpitil ní bi dùú téeǹ-mi, ní m yaa tí dàkā-bi dineendee, bí dū kináŋ kí téeǹ-mi.

⁶Bi sòoǹ m-pu yii: «Tí lēē unil ubɔ ú jáǹ-u, ukɔkɔli ubɔ ń yūĺ u-ŋaŋgiil pú[196].

⁷Bi yaa sòon̄ u-bɔtee, ú jī dibɔkpil, ní u-wimmeem ń kpántí-u ikpiti.

⁸U-maŋfal wiiŋyi ń bàtī, ubɔ ń fōō u-tundi[197].

⁹U-jipɔmbi ń kpántí ataŋkpiibil ní u-nimpuu ń kpántí ukpiipu!

¹⁰U-jipɔmbi ń kpántí naayeekub kí nīn mèé ki jīǹ, bí nīn nyēē bi-digbuŋkatiŋ poon ki mèé ki jīǹ!

¹¹Un u jíń dipɔndee ń dāá kóoǹ u-wanti kɔkɔ, ní binicambi ń dāá fūkul̀ u nín túń ditundi ki ká tiŋyee.

¹²Ubɔ ń taa dàkà-u kulaŋŋaŋfitiiu, ubɔ ń taa sɔ̄ u-taŋkpiibiliŋ saai!

¹³U-naantiibi ń kúntí bí taa ti gbìl̄ bi-yiŋŋi pu abin ŋin dòońee poon!

¹⁴Bí téetí ti-Dindaan u-baabi kpitii pu, tiba ń taa pítí u-na kpitii!

¹⁵Ti-Dindaan ń nīn pée téetí bi-kpitii pu ní kí yàntī bí taa ti téetí bi-pu kitiŋ pu!

¹⁶Di sá yii kijapaai nee kaa pée dākafì kí ŋá tiŋan, ama ní ki sāaǹ ki tin kūū ufalaadaan nì unandaan un wunti yɔ̄tèee.

¹⁷U nìn néeń ki tòó binib mbusu, mbusu ń gítí u-pu. Waa nìn pée néeń dibiindi bɔti, dibiindi ń sāǹ kí wàatī-u.

¹⁸U nìn dū mbusu ki pēeǹ kii dibɔkutikpaandee, dí kɔ́ u-poon kii nnyimee[198] ní kí kɔ́ u-kpabiŋin kii ŋkpamee.

¹⁹Dí nīn bīī u-pu kii tiwampeeŋkaalee, kí nīn pée gbìn̄ u-caŋ kii dambalee!»

²⁰Ti-Dindaan nín làá pà bin kɔ́kɔĺ-mi ki sòoǹ ki bíiĺ-mee puee dee!

²¹Ama sii ti-Dindaan m-Nimbɔtiu, a-yindi puee, ŋá-mi tiŋan, a-neeŋkpaandi ŋanti puee, fīī-mi.

²²Di sá yii ufalaadaan nì unandaan ní m sá, m-poon kaam cɔ́tì.

²³M bíi cá dee kii mboon nín wáŋkí puee, bi bíi jì-mi kii unaakitoonee.

²⁴M bóob́ kinyɔkɔ áli m-tabiŋyiliŋ kíǹ ki jìkì, ní m dúntì ki kíǹ akpab ŋma.

²⁵Bi bèel̄-mi, ní bi yaa ká-mee, bi gbákafí bi-yiliŋ.

²⁶Ti-Dindaan m-Nimbɔtiu, jòoń-mi, a-neeŋkpaandi puee, fīī-mi.

²⁷Yàntī bí béé yii sii di ŋá, sii ti-Dindaan di ŋá míǹ ki tīī-mi.

²⁸Bi tòó mbusu, ama ní sii bìintí. Bi yaa bíi jáà nì mi, icoo làá cúú-bi, ní man a-tɔntɔnliu ń nīn fàal̀.

²⁹Yàntī icoo ń cúú bin kɔ́kɔĺ-mee, bí dū bi-cooi kí bìin̄ bi-ba pu kii dibɔkutikpaandee!

³⁰M làá gāā ilan mpɔn kí jāam̀ ti-Dindaan, m làá nyɔ̄ŋkì-u kunipaau kansikin.

³¹Di sá yii u yú ufalaadaan ŋaŋgiiliŋu pú kí fīī-u kí nyāntí bin bíi kù u-bɔtee ŋaan.